Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna beneventa da princip l'intenziun da la confederaziun da simplifitgar sis proceduras da permissiun dal dretg federal u schizunt da las abolir dal tuttafatg. Il cussegl federal aveva fixà ils 2 da favrer 2005 la finamira d'abolir 20 pertschient da las proceduras da permissiun dal dretg federal. Uschia vul el far frunt a la critica en connex cun la dimensiun da la chargia administrativa. In'emprima purziun reguarda las proceduras da permissiun ch'èn cuntegnidas en ina lescha. I vegn proponì d'abolir e da simplifitgar proceduras da permissiun en sis leschas federalas.
La regenza è d'accord d'abolir la permissiun commerziala per metals prezius. Medemamain n'ha la regenza naginas objecziuns en connex cun l'aboliziun da l'obligaziun d'annunzia per interpresas che transportan ruments spezials u che organiseschan lur dismessa. Sustegnida vegn er la revisiun proponida da la lescha da lavur. Quella ha la finamira da simplifitgar la procedura d'approvaziun dal plan e da la permissiun da manaschi. Beneventada vegn plinavant la midada da la lescha davart l'intermediaziun da lavur. Il sboz da revisiun prevesa d'abolir l'obligaziun da dumandar ina permissiun per interpresas d'intermediaziun da lavur, e quai sin plaun chantunal e sin plaun federal e d'introducir percunter in'obligaziun da registraziun pli simpla.
Per finir approvescha la regenza da princip la midada da la lescha federala davart las auas destilladas e sustegna l'intenziun da pussibilitar il commerzi en detagl cun auas destilladas en Svizra mo cun in'unica permissiun chantunala. Percunter sto vegnir mantegnida la cumpetenza dals chantuns da pudair incassar sin lur territori suveran taxas per la vendita d'auas destilladas. La regenza n'è dentant betg perencletga cun l'intenziun da la confederaziun d'abolir l'obligaziun da dumandar ina permissiun per laschar cular aua persa nunsmerdada en in'aua da surfatscha.

Da vischnancas e regiuns
- Fuldera: La revisiun parziala da la lescha communala da taglia da la vischnanca da Fuldera dals 14 da zercladur 2006 vegn approvada.
- Spleia: La lescha davart las taxas da cura da la vischnanca fusiunada da Spleia dals 27 d'avrigl 2006 vegn approvada.
- Zernez: La lescha per midar la lescha davart las taxas da cura e davart contribuziuns per promover l'economia ed il turissem da la vischnanca da Zernez dals 19 d'avrigl 2006 vegn approvada.
- Castrisch: A la vischnanca da Castrisch vegn garantida ina contribuziun da 54'075 francs als custs cun dretg da contribuziun per sanar e per engrondir il stabiliment dal provediment d'aua, 1. e 2. etappa.
- Cumbel: A la vischnanca da Cumbel vegn garantida ina contribuziun da 53'000 francs als custs cun dretg da contribuziun per sanar e per engrondir dal stabiliment dal provediment d'aua, 1. etappa.
- Surselva e Val dal Rain grischuna: Las lavurs da reparaziun da las malauras 2005, regiun Surselva e Val dal Rain grischuna sin il territori da las vischnancas da Schluein, da Tujetsch, da Mustér, da Rueun, da Maiavilla e da Jenins, vegnan approvadas. Per las lavurs vegn concedida ina contribuziun chantunala da 210'000 francs.

Contribuziuns chantunalas a differentas instituziuns
- Uniun grischuna d'artisanadi e da mastergn: A l'uniun grischuna d'artisanadi vegn concedida ina contribuziun da maximalmain 50'000 francs per l'exposiziun professiunala a la GEHLA .
- Societad istorica Val Poschiavo: Il project da la società istorica Val Poschiavo per documentar l'emigraziun or dal Puschlav vegn sustegnida cun ina contribuziun da 9'000 francs.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel