La confederaziun, il chantun Grischun e l'AlpTransit Gottard SA han dà il culp da partenza definitiv a las lavurs da construcziun per las investiziuns preliminaras da la Porta Alpina. Suenter ch'els han suttascrit ina cunvegna correspundenta per questa emprima fasa, ha il cussegl administrativ da l'AlpTransit Gottard SA surdà l'incarica per las emprimas lavurs da construcziun. Questas investiziuns preliminaras èn ina premissa impurtanta per pudair realisar pli tard la staziun sutterrana da la Porta Alpina.
Il project da la Porta Alpina prevesa da nizzegiar sco fermada il post multifuncziunal da Sedrun ch'è planisà en il tunnel da basa dal Gottard. Da là davent duain las passagieras ed ils passagiers pudair cuntanscher - tras galarias e tras in ascensur - 800 meters pli ad aut il vitg da Sedrun e la regiun dal Gottard. Grazia a la meglra cuntanschibladad spetgan ins ch'il svilup economic-turistic da questa regiun vegnia rinforzà.
Las lavurs da construcziun èn vegnidas surdadas sco incarica supplementara per in pretsch global da 12,6 milliuns francs (basa da pretsch: contract d'execuziun da lavurs da l'onn 2001) al consorzi TRANSCO ch'è gia incumbensà al lieu cun la construcziun d'ina part dal tunnel. Sch'i vegn calculà cun pretschs actuals, importa l'incarica da construcziun - inclusiv las reservas, la chareschia e la taglia sin la plivalur - ina summa da 15,8 milliuns francs.
Ils custs per realisar las investiziuns preliminaras (exchavar quatter grondas hallas da spetga sin il nivel dal tunnel) èn vegnids calculads a totalmain ca. 15 milliuns francs. En la sessiun d'enviern 2005 han las chombras federalas concedì ina contribuziun federala da 50%, dentant da maximalmain 7,5 milliuns francs, als custs per questas investiziuns preliminaras. Ils ulteriurs 50% vegnan pajads dal chantun Grischun, da la regiun Surselva e da la vischnanca da Tujetsch sco vischnanca da staziunament.
Il custs per l'entir project vegnan calculads oz cun 50 milliuns francs. Da quels surpiglia il chantun Grischun 20 milliuns francs e la regiun ulteriurs 5 milliuns francs. A la votaziun dals 12 da favrer 2006 ha il pievel grischun gia approvà sia part dal credit da finanziaziun da 20 milliuns francs. Il parlament federal sto percunter anc decider davart la finanziaziun da sia part da 50% vi da las investiziuns principalas. L'approvaziun dal credit è colliada cun ina retscha da cundiziuns ch'il chantun sto ademplir en la proxima fasa dal project.
Tras las investiziuns preliminaras duai vegnir garantì che la Porta Alpina possia vegnir realisada pli tard cun custs raschunaivels. Las lavurs da stgavament ston vegnir fatgas ussa e ston vegnir coordinadas cun il program da construcziun dal tunnel da basa dal Gottard, per ch'i na dettia pli tard, cur ch'il tunnel vegn mess en funcziun, nagins impediments nunnecessaris.

Persuna che dat infurmaziuns:
cusseglier guvernativ Stefan Engler, schef dal departament da construcziun, traffic e selvicultura dal Grischun, tel. 081 257 36 14

Gremi: departament da construcziun, traffic e selvicultura dal Grischun
Funtauna: rg departament da construcziun, traffic e selvicultura dal Grischun