La regenza grischuna beneventa las novaziuns previsas da la lescha federala davart mesiras cunter la propaganda violenta e cunter la violenza a chaschun d'occurrenzas da sport. Las disposiziuns executivas proponidas reglan las mesiras preventivas per evitar che persunas violentas vegnian activas a chaschun d'occurrenzas da sport. Tar quellas mesiras tutgan per exempel il scumond da raiun, l'obligaziun d'annunzia e la fermanza da polizia tras ils chantuns sco er la disposiziun davart la restricziun da bandunar il pajais tras la confederaziun. Che l'execuziun da las quatter mesiras preventivas saja vegnida realisada en ina moda e maniera che permetta a la confederaziun ed als chantuns d'evitar communablamain che persunas violentas vegnian activas, scriva la regenza en sia consultaziun. La regenza parta dal fatg ch'ils chantuns possian sut tschertas circumstanzas er revegnir a mesiras tenor il dretg chantunal, mesiras ch'èn magari pli restrictivas che quellas dal dretg federal.

La lescha planisada davart la perscrutaziun vi da l'uman vegn da princip beneventada
Il sboz preschentà da la confederaziun per ina disposiziun en la constituziun e per ina lescha federala davart la perscrutaziun vi da l'uman vegn da princip giuditgà positivamain da la regenza grischuna. La finamira primara da la regulaziun è da proteger la dignitad e la persunalitad da l'uman en la perscrutaziun.
Per examinar independentamain ils projects da perscrutaziun tras cumissiuns eticas propona la confederaziun dus models: u che las cumissiuns chantunalas eticas vegnan engaschadas vinavant u ch'i vegn numnada ina nova cumissiun etica da la confederaziun. Tegnend quint da las incumbensas ch'èn colliadas cun questas examinaziuns preferescha la regenza grischuna la varianta federala. Che l'extensiun dal sectur d'incumbensas da la cumissiun chantunala etica - sco quai ch'ella è previsa en la lescha - surpassia numnadamain las capacitads da tala, constatescha la regenza en sia consultaziun a la confederaziun.

La regenza ha resalvas areguard la revisiun dal dretg d'aczias e da rendaquint
La regenza grischuna beneventescha da princip las finamiras che vegnan aspiradas cun la regulaziun nova dal rendaquint. Quai exprima la regenza en sia consultaziun davart la revisiun dal dretg d'aczias e da rendaquint en il dretg d'obligaziuns. Las pretensiuns al rendaquint vegnan fixadas da nov sin fundament da l'impurtanza economica d'ina interpresa e betg pli sin fundament da la furma da dretg. Spezialmain las disposiziuns davart la "contabilitad commerziala" sajan vegnidas meglieradas, cumpareglià cun in sboz da pli baud. Applitgond consequentamain la valitaziun da las consequenzas da la regulaziun sin il sboz da revisiun constatescha la regenza dentant che las interpresas pitschnas e mesaunas (IPM) ston prender en cumpra per part bler dapli lavur per far il rapport da gestiun e vegnan uschia confruntadas cun grevezzas administrativas e finanzialas supplementaras. Quai giaja cunter las stentas dal chantun Grischun da distgargiar l'administraziun da las IPM.

Il chantun Grischun sa participescha a la cunvegna davart l'armonisaziun da la terminologia da construcziun
La regenza grischuna ha concludì da sa participar a la cunvegna interchantunala davart l'armonisaziun da la terminologia da construcziun (CIAC). Ozendi datti da chantun a chantun e da vischnanca a vischnanca per part definiziuns fitg differentas da la terminologia da construcziun, uschia per exempel en connex cun la moda e maniera co che la lunghezza, l'autezza u la distanza dal cunfin vegnan mesiradas. La finamira da la CIAC è d'unifitgar quests secturs formals per tut la Svizra e da simplifitgar uschia il dretg da construcziun sco er da minimar ils custs per las persunas che projecteschan e per las autoritads d'examinaziun. Ils aspects materials, per exempel la fixaziun da las limitas concretas per la lunghezza u per l'autezza d'edifizis en il schema da zonas, duain percunter restar en mintga cas vinavant en la cumpetenza autonoma da las vischnancas.
L'armonisaziun dal dretg formal da construcziun tutga tar las finamiras formuladas da la regenza ed er dal cussegl grond en la revisiun totala da la lescha davart la planisaziun dal territori per il chantun Grischun ch'è vegnida fatga da curt. Las singulas definiziuns da las noziuns e las modas da mesirar da la cunvegna na daventan cun la participaziun betg automaticamain ina part da l'urden giuridic, mabain ellas ston l'emprim vegnir transferidas en il dretg chantunal respectiv. Quest transferiment duai vegnir fatg en il chantun Grischun tras adattaziuns da las leschas da construcziun communalas. L'occasiun per far quai è favuraivla, perquai che las leschas da consturcziun communalas ston tuttina vegnir revedidas succesivamain ils proxims onns, e quai pervi da la lescha davart la planisaziun dal territori per il chantun Grischun ch'è entrada en vigur il 1. da november 2005.

Il project "schanza per il Grischun" vegn prolungà
Il project " schanza per il Grischun" ch'è vegnì lanschà l'october 2004 dal post da stab per dumondas d'egualitad dal chantun Grischun vegn prolungà per trais onns. La regenza grischuna ha approvà la cuntinuaziun dal project fin l'onn 2010.
Cun il project "schanza per il Grischun" ch'era planisà uriundamain fin l'onn 2007, duai vegnir cuntanschida ina midada da tenuta tar las scolaras e tar las persunas d'instrucziun areguard il process d'eleger la professiun ed areguard ils maletgs da las rollas en connex cun la professiun e cun la famiglia. Il project, al qual sis scolas sa participeschan, è en ses gener unic en Svizra. La lavur ch'è vegnida prestada fin ussa cun las persunas d'instrucziun ha mussà ch'i exista d'ina vart in grond interess al project, ma che da l'autra vart stoppian denant anc vegnir meglieradas las enconuschientschas dal rom e las enconuschientschas professiunalas da las persunas d'instrucziun en il sectur da l'instrucziun sensibilisada per las schlattainas.

Da vischnancas e regiuns
- Puschlav: A la vischnanca da Puschlav vegn garantida ina contribuziun maximala en l'import da 277'775.- francs per optimar e per engrondir la serenera Li Geri.
- Samedan: La revisiun parziala da la planisaziun locala concludida da las votantas e dals votants da la vischnanca da Samedan a la radunanza communala dals 15 da december 2005 vegn approvada cun resalvas.
- Sent: Il plan general d'avertura 1:2'000 Flüs da la vischnanca da Sent dals 12 da december 2005 vegn approvà.
- Lü: Il plan da zonas 1:1'000 "Aboliziun da la zona da tegnair liber en il territori Chomp Grond" da la vischnanca da Lü dals 6 d'october 2005 vegn approvà.
- Schlarigna-Samedan: Il plan dal cunfin tranter las vischnancas da Schlarigna-Samedan vegn approvà.
- Via da Zignau: Sin la via da Zignau, davent da la bifurcaziun da l'implant da gera e betun fin tar la punt da Zavragia, vegn dauzà il pais maximal permess da 13 a 28 tonnas.
- Swiss Bike Masters: A l'organisatura dal "Swiss-Bike-Masters" vegn concedida la permissiun per duvrar la ruta previsa en il territori dal Partenz per la cursa da sonda, ils 22 da fanadur 2006 sco er da dumengia, ils 23 da fanadur 2006.
- Maraton d'inline da l'Engiadina: Als organisaturs dal "maraton d'inline da l'Engiadina" vegn concedida la permissiun da pudair duvrar il percurs previs per il maraton d'inline-skating en Engiadina per la cursa da sonda, ils 24 da zercladur 2006.

Contribuziuns chantunalas a differentas instituziuns
- Viafier retica: La regenza conceda a la viafier retica (VR) ina contribuziun d'investiziun da 1'876'000.- francs. Ils meds servan per sanar la staziun da La Punt-Tumein.
- ViaStoria: L'organisaziun professiunala ViasStoria survegn per l'elavuraziun e per la producziun dal "Magazin d'eveniments Grischun" ina contribuziun da 150'000.- francs.
- Baselgia claustrala e parochiala Engelberg: La regenza garantescha per la restauraziun totala da la baselgia claustrala e parochiala dad Engelberg - che tutga a l'uvestgieu da Cuira - ina contribuziun da 30'000.- francs.

Projects da vias
La regenza ha approvà en total circa 3'000'000 francs per construir e per sanar differents trajects da via:
- via da la Tumleastga: punt da la Val da Tumegl
- via da Mut: tunnel da la Val da Mut - cumenzament dal vitg da Mut
- via sursilvana da la vart dretga dal Rain: Underhof - bifurcaziun Stussavgia

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun