La cumissiun predeliberanta dal cussegl grond ha tractà la missiva
da la regenza tar la revisiun parziala da la constituziun dal chantun,
tar il relasch d'ina lescha davart la relaziun da lavur da las
collavuraturas e dals collavuraturs dal chantun Grischun e tar la
revisiun parziala da l'urden da gestiun dal cussegl grond. La cumissiun
propona unanimamain al cussegl grond d'entrar en il project. La
cumissiun vegn presidiada dal deputà Mario Cavigelli. A las sesidas da
la cumissiun è sa participada la cussegliera guvernativa dr. Eveline
Widmer-Schlumpf.
Il motiv formal da questa missiva è la constituziun chantunala che
prescriva stringentamain en l'art. 31 al. 1 che tut las disposiziuns
impurtantas ston vegnir relaschadas dal cussegl grond en furma d'ina
lescha. L'ordinaziun dal persunal vertenta è in'ordinaziun dal cussegl
grond e sto perquai vegnir reglada sin il stgalim da la lescha. Cun
questa chaschun vegnan messas en discussiun er singulas adattaziuns da
dretg material, la revisiun da l'art. 50 al. 3 da la constituziun
chantunala sco er in'adattaziun minimala da l'urden da gestiun dal
cussegl grond.
Cun la revisiun da la constituziun chantunala ch'è vegnida
deliberada unanimamain da la cumissiun per mauns dal cussegl grond vegn
stgaffida la pussaivladad da delegar cumpetenzas legislativas - ch'èn
actualas cunzunt en il dretg da persunal - als instituts chantunals
autonoms. La delegaziun da cumpetenzas legislativas è dentant liada a
tschertas premissas. Tras la pussaivladad numnada qua survart sa laschan
evitar en quest sectur conflicts da cumpetenza tranter la regenza ed ils
instituts.
Tenor il sboz da la regenza tar la lescha davart la relaziun da
lavur da las collavuraturas e dals collavuraturs dal chantun Grischun
(lescha dal persunal, LP) èn ils puncts centrals da la revisiun
d'observar ils standards minimals dal dretg d'obligaziuns (DO), da
renviar en general e betg mo en cas singuls al DO cun l'intent
d'emplenir largias, da delegar las cumpetenzas da la regenza als
departaments e da quests als posts da servetsch, d'abolir il temp da
cumprova che n'è betg sa cumprovà en la pratica, da resguardar las
disposiziuns davart la protecziun cunter la desditga e las disposiziuns
da sancziun tenor ils art. 336a e 337c DO sco er da reprender il scumond
da far chauma en in tschert rom. Suenter il studi detaglià da las
propostas da la regenza sustegna la cumissiun predeliberanta quellas
senza resalvas. Tar il sistem da salarisaziun propona la cumissiun
dentant ina soluziun che divergescha fitg dal model da la missiva. Qua
duai vegnir remplazzà en spezial l'augment annual da stgalims tras in
model che fixescha individualmain ed annualmain ils salaris sco er tras
premias da prestaziun e tras premias spontanas. Il sistem da las 28
classas da salari, da la cumpensaziun da la chareschia e dal plan da
classificaziun na duai dentant betg vegnir tatgà er tenor questa
versiun. Er la regenza po ir d'accord cun questa midada da paradigma en
il sistem da salarisaziun.
Ina minoritad da la cumissiun vul excluder dal champ d'applicaziun
da la lescha dal persunal las emploiadas ed ils emploiads dals instituts
chantunals autonoms e dependents. Questas relaziuns da lavur duessan sa
drizzar tenor il DO. Ina maioritad da la cumissiun sustegna percunter la
pussaivladad dals servetschs psichiatrics dal Grischun da pudair
stabilir cun in contract da dretg privat las relaziuns da lavur per
plazzas da cader. La cumissiun era malperina quai che pertutga la
dumonda d'incumpatibilitad d'uffizis. Ina minoritad da la cumissiun vul
excluder dal tuttafatg la pussaivladad per collavuraturas e per
collavuraturs en in pensum parzial da sa laschar eleger en il cussegl
grond.
La midada da l'urden da gestiun dal cussegl grond è vegnida tractada
da la cumissiun senza gronda discussiun.
Suenter ina predeliberaziun detagliada dal project durant dus dis ha
la cumissiun deliberà, cun midadas impurtantas e cun intginas propostas
da minoritad, la missiva da la regenza per mauns dal cussegl grond. Quel
vegn a tractar il project en la sessiun da zercladur 2006.
Gremi: cumissiun predeliberanta da la lescha dal persunal
Funtauna: rg cumissiun predeliberanta da la lescha dal persunal