Il matg ha l'uffizi per la furmaziun professiunala fatg la retschertga "Co vai vinavant suenter la scola?" Scolaras e scolars da l'ultim onn da scola obligatoric e dal 10avel onn da scola èn vegnids questiunads davart las vias professiunalas ch'ellas e ch'els han en senn da prender. Tenor la retschertga reussescha a la gronda part dals giuvenils grischuns da far il pass dal temp da scola obligatoric en in emprendissadi u en ina scola da cuntinuaziun sco il gimnasi, la scola media professiunala u la scola media commerziala, e quai senza interrupziun. 157 (8.36%) dals giuvenils n'han il mument da la retschertga areguard lur scolaziun futura anc betg decidì, u ch'els n'han anc betg chattà ina soluziun correspundenta. Cumparegliond cun l'onn passà pon ins constatar che la situaziun è daventada in zic meglra. Tuttina è la situaziun da las plazzas d'emprendissadi anc adina precara, er sch'en diversas professiuns èn per la stad 2006 anc libras bunamai 200 plazzas. Cumpareglià cun auters chantuns è la situaziun da plazzas d'emprendissadi en il Grischun dentant en general main precara.

Er en il Grischun datti giuvenils che han grev da far il pass en la vita professiunala. II mais da matg n'avevan 157 giuvenils anc betg decidì u n'avevan anc betg chattà ina soluziun areguard lur scolaziun professiunala. Quai èn 8.36 % da tut ils giuvenils che vegnan or da scola. Las differenzas d'in stgalim da scola a l'auter èn fitg cleras. 20% dals giuvenils vegnan da la scola secundara, 42 % da la scola reala, 36% dal 10avel onn da scola e da l'onn da las schanzas e 2% da las classas pitschnas. 83 mattas e 74 mats n'han anc betg chattà ina soluziun.
Il medem mument chattan ins en il register da plazzas d'emprendissadi Lena en l'internet (www.lena.gr.ch) per l'avust anc adina ca. 200 plazzas libras. Insatge che para da sa gulivar matematicamain è en realitad savens problematic, pertge ch'ils interess e las abilitads dals giuvenils na correspundan betg adina a las pretensiuns da las professiuns correspundentas.

Sustegn individual tras l'uffizi per la furmaziun professiunala
La finamira da la retschertga annuala è in sustegn supplementar per ils giuvenils a la fin dal temp da scola obligatoric sco er per tals che fan in 10avel onn da scola e che n'han anc betg ina soluziun definitiva per lur professiun e per lur scolaziun futura.
Quests giuvenils vegnan sustegnids da l'uffizi per la furmaziun professiunala. Tgi che vul far diever da quest sustegn, survegn da la persuna d'instrucziun in formular d'annunzia e po trametter quel directamain a la cussegliaziun professiunala.
La purschida intenziunada da la cussegliaziun professiunala dat la pussaivladad da far ina determinaziun da la posiziun actuala che gida ils giuvenils a tschertgar soluziuns realisablas. Ultra da quai intermediescha ella ils giuvenils che tschertgan cussegl sin lur giavisch a l'acziun "speranza" da la PLD, cun la quala persunas privatas porschan sco "madritscha u sco padrin" sustegn ed assistenza tar la tschertga d'ina plazza d'emprendissadi. L'experientscha dals ultims onns mussa che per blers giuvenils motivads po fin la stad anc vegnir chattada ina plazza d'emprendissadi u ina soluziun intermediara.

La gronda part elegia in emprendissadi
La retschertga registrescha il mais da matg 1'897 scolaras e scolars. Las datas èn vegnidas registradas online (www.powerschool.org) directamain da las persunas d'instrucziun. Il pertschient da respostas importa perquai bunamain 100%.
Il mument da la retschertga eran sa decidis dus terzs dals giuvenils per in emprendissadi. Cumparegliond las vias da scolaziun tenor la schlattaina pon ins constatar er quest onn in depurtament different: cleramain daplis mats (73%) che mattas (56%) elegian in emprendissadi.
En vista ad in imprendissadi u ad ina scolaziun pli tard fan 12% in onn intermediar. Questa cifra è - cumpareglià cun l'onn passà - diminuida per bundant 4%.
Mintga tschintgavala matta elegia ina soluziun intermediara. Tar ils mats è quai mo mintga 14avel. Percunter prefereschan bler dapli mattas (137) che mats (78) ina scola da cuntinuaziun.

Gremi: uffizi per la furmaziun professiunala
Funtauna: rg uffizi per la furmaziun professiunala