La scienziada Erika Taube da Lipsia tegna - venderdi, ils 23 da zercladur 2006, a las 16.15 - in referat a la biblioteca chantunala davart il tema schamanissem. La noziun da "schamanissem" circulescha oz senza reflexiun tras la pressa e tras la televisiun. Ma tge è il schamanissem e nua chattain nus ses origin? Il schamanissem en sia furma originara datti mo en Sibiria. Il schamanissem dals pievels da la Sibiria e da l'Asia centrala vala sco la furma classica da quest fenomen religius.
Sin fundament d'atgnas retschertgas al lieu dad Erika Taube, ina scienziada da renum mundial per quest champ, vegn preschentà il schamanissem d'ina pitschna cuminanza etnica en las muntognas da l'Altai e dals parents da quella en la Sibiria dal sid sco er illustrà cun intgins diapositivs e cun intgins exempels da texts, e quai en quella furma co che la cuminanza era sa mantegnida fin la segunda mesadad dal 20avel tschientaner ed en quellas diversas modas co ch'il schamanissem era entretschà cun la vita dals umans, cun lur mintgadi e cun lur poesia.
Erika Taube ha lavurà sco scienziada dal temp da la republica democratica tudestga RDT a l'universitad da Lipsia ed ha fatg atgnas retschertgas al lieu en las muntognas da l'Altai ed en l'Asia centrala. Suenter la reunificaziun ha ella cuntinuà sia lavur a l'universitad da Lipsia ed ha instruì tranteren er a l'universitad da Magonza. L'occurrenza da la biblioteca chantunala dal Grischun è publica e dura circa 90 minutas.

Gremi: Biblioteca chantunala dal Grischun
Funtauna: rg biblioteca chantunala dal Grischun