En il Grischun elavuran actualmain 13 teams da project lur plans da fatschenta per furmar ina destinaziun fin la fin da settember 2007. Tenor il cusseglier guvernativ Hansjörg Trachsel promova il chantun il tempo da refurma cun sustegnair finanzialmain questa proxima fasa da project. Per crear ina plattafurma turistica electronica grischuna han set organisaziuns partenarias e l'uffizi per economia e turissem suttascrit in contract da cooperaziun.

Cun ina nova structura da las destinaziuns, cun ina clera repartiziun da las incumbensas en il marketing e cun ina nova orientaziun da Grischun vacanzas ha la refurma dal turissem grischun la finamira da franar la diminuziun da las pernottaziuns en il Grischun. Tras la repartiziun da las incumbensas ston las organisaziuns turisticas existentas fusiunar ad organisaziuns per la gestiun da destinaziuns (OGD) u ad organisaziuns turisticas futuras (OTF). Per la fin da mars 2007 èn vegnidas inoltradas a l'uffizi per economia e turissem 12 skizzas da project. La OGD Engiadina San Murezzan è gia vegnida lantschada.

13 projects da refurma en tut il chantun
Sco ch'il cusseglier guvernativ Hansjörg Trachsel punctuescha, chattan ils 13 projects da refurma in vast sustegn en tut il chantun: "La sfida è enorma, il martgà pretenda dinamica e perseveranza. La repartiziun da las incumbensas è il punct central da la refurma dal turissem grischun. Ussa èsi l'incumbensa da las organisaziuns turisticas da propi nizzegiar questa schanza." Per otg organisaziuns petentas conceda il chantun - sin basa da las skizzas da project - contribuziuns da totalmain 367'000 francs per elavurar ils plans da fatschenta. Quatter autras organisaziuns petentas ston anc meglierar lur skizzas da project, avant ch'i po vegnir concedida ina contribuziun. Las contribuziuns vegnan fixadas cun ina quota chantunala da maximalmain 50 pertschient. Il rest ston las organisaziuns petentas surpigliar sco atgnas prestaziuns u sco prestaziuns finanzialas. L'autezza da las dumondas da contribuziun variescha tut tenor la grondezza e tut tenor l'eterogenitad da las regiuns participadas resp. tut tenor il stadi da svilup ch'è gia vegnì cuntanschì per furmar ina destinaziun.
Suenter l'inoltraziun dals plans da fatschenta fin la fin da settember decida il chantun davart l'autezza da la confinanziaziun per fundar e per crear las OGD e las OTF correspundentas. Per la refurma dal turissem grischun stattan a disposiziun al chantun fin l'onn 2012 meds finanzials en l'autezza da totalmain 18 milliuns francs. Ils suandants otg projects da refurma survegnan contribuziuns per elavurar ils plans da fatschenta: la OGD Tavau-Claustra, la OGD/OTF Cuira-Arosa-Lai, la OGD Surselva (cun las quatter OTF Sedrun-Mustér, Breil-Vuorz-Andiast, Flem Laax Falera, Sursaissa-Lumnezia), la OGD regiun dal parc naziunal, la OTF Savognin-Surses/Val d'Alvra, la OTF Viamala, la OTF Partenz e la OTF Bregaglia. Meglierar lur projects inoltrads ston anc las organisaziuns ente turistico Valposchiavo, turissem Val Müstair, Scanvetg turissem sco er San Bernardino vacanze. A la OGD Engiadina San Murezzan è vegnida empermessa gia pli baud ina contribuziun per realisar il plan da fatschenta per la refurma dal turissem en Engiadin'ota.

Contract da cooperaziun per la plattafurma turistica grischuna
Il manader da l'uffizi Eugen Arpagaus infurmescha davart la partenza dal project "plattafurma turistica electronica grischuna" sco mesira accumpagnanta impurtanta per il process da refurma. Set organisaziuns partenarias e l'uffizi per economia e turissem han suttascrit in contract da cooperaziun correspundent. Las organisaziuns partenarias èn Tavau turissem, l'Arena alva SA, la destinaziun Engiadina San Murezzan, Grischun vacanzas, la viafier retica, la gruppa da medias Südostschweiz sco er l'institut per scienza d'infurmaziun (SII) da la scola auta da tecnica ed economia (SATE) a Cuira. Tut questas organisaziuns mettan a disposiziun lur experientschas al process per concepir e per realisar il project ed èn - cun lur destinaziuns u sco interpresas - las utilisadras principalas futuras da la plattafurma turistica electronica grischuna. Fin la fin da l'onn 2008 duai questa plattafurma manar il turissem grischun a la testa en l'internet e purtar ina valur augmentada er a las organisaziuns turisticas pli pitschnas.
Ils elements ils pli impurtants èn in sistem per il manaschament da las destinaziuns cun ina surfatscha d'utilisaziun unitara, la planisaziun individuala da viadis (travel planner), la concepziun dinamica dals pretschs (dynamic packaging), la tgira da la clientella (customer relationship management) e l'infurmaziun multimediala davart bains culturals grischuns e davart puncts d'attracziun. Fin ch'il project è realisà cumplettamain, vegn fatg quint cun investiziuns da plirs milliuns francs. Il chantun è pront da surpigliar ina quota da maximalmain 50 pertschient da questa summa. La finanziaziun dals meds finanzials restants sto vegnir garantida tras in model da gestiun che sto anc vegnir sviluppà. Il manaschi current duai vegnir finanzià tras in concept da fonds; la concepziun da tal tutga er tar il project.

Ulteriuras mesiras accumpagnantas
Ultra da la plattafurma turistica electronica grischuna persequitescha il chantun a medem temp quatter ulteriuras mesiras accumpagnantas che caracteriseschan il process da refurma en moda decisiva: las pussaivladads per commerzialisar il turissem rural en il Grischun, l'ulteriur svilup da la marca graubünden, il sistem da direcziun e da monitoring "balanced scorecard" per giuditgar il success da destinaziuns sin basa d'in sistem d'indicaturs equilibrà sco er l'examinaziun d'ina taxa chantunala per il turissem (TCT) areguard il dretg ed areguard il cuntegn. Cusseglier guvernativ Hansjörg Trachsel: "Nus na vulain betg communitgar process da tractativas, mabain resultats. Perquai vegnin nus ad infurmar davart ils detagls d'ina eventuala TCT pir, suenter ch'ils discurs cun las federaziuns economicas èn terminadas e suenter ch'ils plans da fatschenta da las destinaziuns èn vegnids inoltrads."

Gremi: departament d'economia publica e fatgs socials
Funtauna: rg departament d'economia publica e fatgs socials