Il Grischun inoltrescha ina resoluziun davart il tema "aua"
En il center da la conferenza da las scheffas e dals schefs da las
regenzas da la cuminanza da lavur da las regiuns alpinas (ARGE ALP) da
quest onn stat la deliberaziun da tschintg resoluziuns sco er da
totalmain set projects. Latiers tutga la resoluziun ch'è vegnida
inoltrada dal Grischun davart il tema "aua" sco er il project che vegn
medemamain tgirà dal Grischun per cuntinuar cun ils "gieus da la ARGE
ALP". La scuntrada da las scheffas e dals schefs da las regenzas sut il
presidi da la regiun dal Vorarlberg ha lieu venderdi, ils 22 da
zercladur 2006, a Bregenz.
La resoluziun davart il tema "aua" è vegnida inoltrada dal chantun
Grischun. En la resoluziun vegn accentuada l'impurtanza da las Alps sco
chombra d'aua per grondas parts da l'Europa. Il transport da l'aua tutga
uschia tar la responsabladad politica internaziunala da las regiuns
alpinas. Ritgas resursas d'aua èn in dals avantatgs geografics ils pli
impurtants ch'il territori alpin posseda. Cunzunt l'augment da la
temperatura sin terra ha consequenzas per las resursas d'aua da las
Alps. Correspundentamain ston ins avair quità da quest bain custaivel,
dentant senza impedir las pussaivladads da svilup. La ARGE ALP beneventa
perquai la decisiun da la convenziun da las Alps da far in rapport da
situaziun davart il tema "aua" per il territori alpin. La ARGE ALP
pretenda tranter auter che l'aua vegnia renconuschida sco in element
central per il svilup da las regiuns alpinas. Pervia dals avantatgs per
l'ecologia e per l'economia d'energia duai vegnir mess in cler accent a
favur da l'utilisaziun da la forza idraulica. L'utilisaziun da la forza
idraulica duai resultar en emprima lingia cun augmentar l'effizienza e
cun optimar ils implants existents. Plinavant pretenda la ARGE ALP che
la libertad d'agir da las regiuns alpinas en il sectur da las auas na
vegnia betg restrenschida pli fitg che quai ch'ella vegn oz cun las
reglamentaziuns vertentas.
L'utilisaziun da la forza idraulica è er in tema en la resoluziun
previsa tar il pachet d'energia da l'uniun europeica. En quella
resoluziun pretenda la ARGE ALP che - ultra da l'utilisaziun pli
intensiva da las energias regenerablas - er l'amplificaziun da la forza
idraulica, che po vegnir giustifitgada dal puntg da vista ecologic, sco
er la biomassa vegnian fixadas sco opziuns impurtantas. Ultra da quai
duai in martgà d'energia avert resguardar la necessitad d'ina
infrastructura da provediment suffizienta e d'in svilup persistent dal
territori rural.
A la conferenza vegn discutada plinavant ina resoluziun davart las
novas viasfier transalpinas. Questa resoluziun pretenda ch'il traffic
che traversa las Alps sin las vias e sin las viafiers vegnia coordinà
cun effizienza. I duain er vegnir introducids instruments adattads per
transferir il traffic da la via sin la viafier. Duas ulteriuras
resoluziuns che stattan sin la glista da tractandas da la conferenza
s'occupan da las prestaziuns da servetsch socialas en il territori alpin
e da la cooperaziun territoriala europeica.
Set projects èn vegnids inoltrads
Per mauns da la conferenza da las regenzas ha la cumissiun da
direcziun da la ARGE ALP inoltrà set projects novs. In project ch'è
vegnì lantschà dal chantun Grischun prevesa da cuntinuar cun ils gieus
da la ARGE ALP ch'èn stads curunads da success. Suenter las
experientschas da l'emprim onn da pilot duain las concurrenzas da sport
vegnir fixadas per ulteriurs tschintg onns en la ARGE ALP. A las
occurrenzas en las disciplinas "ir cun skis, hockey sin glatsch,
patinadi, ballape, tir da sport, atletica leva e cursa d'orientaziun" sa
participeschan circa 1'400 giuvenils. Per ina cuntinuaziun fin l'onn
2012 vegni quintà cun custs da bunamain 130'000 euros.
Er il project da barat d'emprendistas e d'emprendists "xchange" duai
vegnir prolungà fin l'onn 2011. Il project "in avegnir communabel" vul
preschentar models excellents per integrar persunas immigradas en las
citads ed en ils vitgs dal territori da la ARGE ALP. La finala duain
vegnir approvads ils projects "network mountain forest", "conferenza
davart las TEN (raits transeuropeicas)", "ils tschintg megliers
projects", sco er "dialects tudestgs en il territori alpin".
La republica da Baviera surpiglia il presidi ed il Grischun fa part
da l'organ directiv
Il preventiv 2008 da la ARGE ALP prevesa expensas totalas da 500'000
euros. La 38avla conferenza annuala da las scheffas e dals schefs da las
regenzas da las regiuns da la ARGE ALP che ha lieu venderdi, ils 22 da
zercladur 2007, a Bregenz, stat sut il presidi dal Vorarlberg. Spetgads
vegnan represchentantas e represchentants da las suandantas diesch
regiuns (stadis, provinzas e chantuns): Baviera, Bulsaun-Tirol dal sid,
Grischun, Lumbardia, Salzburg, Son Gagl, Tessin, Tirol, Trentino e
Vorarlberg. Il presidi da la ARGE ALP durant l'onn 2008 vegn surpiglià
da nov la republica da Baviera. Ultra dal Vorarlberg e da la Baviera fa
er il Grischun part da l'organ directiv da la ARGE ALP che sa cumpona da
trais persunas. L'onn 2009 vegn el a surpigliar il presidi.
Surdada dal premi da la ARGE ALP "giuven, cool ed engaschà"
Suenter la conferenza vegn surdà il premi da la ARGE ALP 2007 cun il
tema "giuven, cool ed engaschà". Ina cumissiun internaziunala vegn a
premiar ils megliers projects ch'èn vegnids inoltrads en ils differents
pajais da la ARGE ALP. Sco summa totala dals premis stattan a
disposiziun 15'000 euros. En il Grischun èn vegnids inoltrads set
projects. Da quels ha la regenza grischuna, sco giuria regiunala,
tramess trais a la cumissiun internaziunala per la decisiun finala.
Gremi: regenza
Funtauna: rg chanzlia chantunala dal Grischun