La regenza grischuna ha mess en vigur la lescha davart las contribuziuns da scolaziun (lescha da stipendis, LCS) per l'onn da scola 2007/2008. Il termin per far in referendum facultativ è scadì ils 14 da mars 2007, senza ch'i saja vegnì fatg in tal.
Il cussegl grond aveva relaschà la lescha da stipendis en la sessiun da december 2006. Da nov prevesa la lescha emprests da daners per segundas scolaziuns e per furmaziuns supplementaras. In'ulteriura novaziun è l'augment da la limita da vegliadetgna da 32 sin 40 onns per survegnir contribuziuns. Ultra da quai è il sistem da calculaziun vegnì adattà uschia, ch'el daventa pli effizient, pli gist e bler pli simpel.
Sin basa da la revisiun totala da la lescha da stipendis ha la regenza revedì er la legislaziun executiva. En la nova ordinaziun da la regenza tar la lescha davart las contribuziuns da scolaziun (ordinaziun da stipendis) vegnan tranter auter reglads detagliadamain ils puncts centrals da la nova legislaziun da stipendis. L'ordinaziun entra medemamain en vigur per l'onn da scola 2007/2008.

Las prescripziuns giuridicas da la confederaziun per proteger la persunalitad cunter violenza, cunter smanatschas e cunter persecuziuns vegnan realisadas
En connex cun la revisiun dal cudesch civil svizzer realisescha il chantun Grischun las prescripziuns giuridicas da la confederaziun per proteger la persunalitad cunter violenza, cunter smanatschas e cunter persecuziuns. La regenza ha relaschà in'ordinaziun correspundenta per realisar l'artitgel 28b dal cudesch civil svizzer. Questa ordinaziun entra en vigur il 1. da fanadur 2007.
Il zercladur 2006 aveva l'assamblea federala deliberà ina revisiun dal cudesch civil svizzer en il sectur da la violenza a chasa e da la persecuziun. Sin basa dal dretg chantunal vertent datti tut en tut in pitschen basegn d'agir per il chantun Grischun, cunquai che la lescha da polizia dal chantun Grischun cuntegna gia ina regulaziun areguard la violenza a chasa. Tar l'adattaziun actuala sa tracti concretamain anc da fixar la cumpetenza per plants e da designar il post cumpetent per intervegnir en cas da crisa. La nova ordinaziun designescha las dretgiras districtualas sco autoritads giudizialas cumpetentas e la polizia chantunala sco post cumpetent per l'intervenziun en cas da crisa sco er per l'expulsiun immediata. Ultra da quai vegn stgaffida la basa giuridica, per che l'uffizi per l'execuziun giudiziala possia manar in post da cussegliaziun per persunas violentas.

L'ordinaziun da polizia vegn adattada al dretg federal en il sectur da las mesiras cunter la violenza a chaschun d'occurrenzas da sport
Las novas cumpetenzas da polizia ch'il dretg federal prevesa en il sectur da las mesiras cunter la violenza a chaschun d'occurrenzas da sport vegnan surdadas en il Grischun a la cumandanta resp. al cumandant da la polizia chantunala dal Grischun. La regenza grischuna ha adattà l'ordinaziun da polizia al nov dretg federal. Questa revisiun parziala entra en vigur il 1. da fanadur 2007.
Il 1. da schaner 2007 è entrada en vigur la revisiun da la lescha federala davart mesiras per mantegnair la segirezza interna. Tranter auter han ins introducì areals scumandads, l'obligaziun d'annunzia e la fermanza da polizia sco mesiras cunter la violenza a chaschun d'occurrenzas da sport. Questas mesiras ston vegnir exequidas dals chantuns. Per pudair garantir ina pratica unitara ha la regenza surdà a la cumandanta resp. al cumandant da la polizia chantunala dal Grischun l'incumbensa d'ordinar questas mesiras. Tras la revisiun parziala da l'ordinaziun da polizia vegn surdada a medem temp a la polizia chantunala la cumpetenza per dumandar infurmaziuns davart la posiziun dal natel per tschertgar ina persuna sparida en cas d'urgenza.

La regenza prenda posiziun davart la tscherna dal sistem en cas d'ina exauriziun en il dretg da patentas
Tar la tscherna dal sistem en connex cun l'exauriziun en il dretg da patentas preferescha la regenza grischuna il sistem da l'exauriziun internaziunala. Sco che la regenza explitgescha en sia consultaziun a la confederaziun, beneventa ella tut las stentas e tut las finamiras dal cussegl federal per activar la concurrenza e per sbassar ils pretschs auts da la Svizra. Intgins pass impurtants èn gia vegnids fatgs u vegnan preparads, p.ex. il dretg da cartels pli sever u l'introducziun dal princip da Cassis-de-Dijon.

Da vischnancas e da regiuns
- Project collectiv "malauras 2006": Il project "malauras 2006", in project collectiv da differentas vischnancas, vegn approvà. Als custs cun dretg da subvenziun da 2'270'000 francs vegnan garantidas contribuziuns chantunalas en l'autezza da totalmain 422'700 francs. Quest project collectiv cuntegna lavurs da reparaziun vi d'ovras da protecziun e vi da stabiliments d'avertura tar totalmain passa 40 objects donnegiads.
- Val Calanca e Valragn: Als custs per reparar ils donns da las malauras vi dals implants da l'infrastructura agricula e vi dal terren cultivà da gronda valur en la Val Calanca ed en Valragn vegn - cun resalva che la confederaziun paja sia contribuziun - concedida ina contribuziun chantunala da 521'640 francs.
- Rossa: Il project singul "malauras 2006 Rossa" da la vischnanca da Rossa vegn approvà. Als custs cun dretg da subvenziun dad 1'320'000 francs vegn garantida ina contribuziun chantunala da maximalmain 330'000 francs.
- Segl: La lescha davart las taxas da giasts e da turissem da la vischnanca da Segl dals 19 d'avrigl 2007 vegn approvada.
- Seewis: La lescha davart las taxas da cura e davart la taxa per promover il turissem da la vischnanca da Seewis dals 25 da matg 2007 vegn approvada.
- Zernez: La revisiun parziala da la planisaziun locala da la vischnanca da Zernez dals 29 da november 2006 vegn approvada.
- Masagn - Tusaun: Il plan dal cunfin tranter las vischnancas da Masagn e da Tusaun vegn approvà.

Contribuziuns chantunalas a differentas instituziuns
- Societad da musica da Suraua: A la societad da musica da Suraua vegn concedida ina contribuziun maximala da 18'000 francs per ina nova instrumentaziun.
- Uniun "giardino dei ghiacciai Cavaglia": Il project per la pagina d'internet da l'uniun "giardino dei ghiacciai Cavaglia" (curtin dals glatschers) survegn ina contribuziun maximala da 15'000 francs.
- Uniun dal lavuratori da litografia e da gravura dal chastè da Haldenstein: L'uniun dal lavuratori da litografia e da gravura dal chastè da Haldenstein survegn ina contribuziun da 10'000 francs per l'onn 2007.

Projects da vias
La regenza ha approvà totalmain 780'000 francs per construir e per sanar ils suandants trajects da vias:
- via d'Engiadina: lavurs da cuvrida, sviament da Silvaplauna
- via naziunala A13: indrizs electromecanics, tunnel dal San Bernardin

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun