La regenza grischuna ha lantschà la consultaziun tar la revisiun parziala da la lescha davart las scolas medias en il chantun Grischun. Ella metta en discussiun tschintg differentas variantas per la futura durada da la scolaziun gimnasiala.
La sessiun d'avust 2006 ha il cussegl grond acceptà ina incumbensa concernent il rinforzament da la scolaziun gimnasiala (mantegniment dal gimnasi inferiur). L'incumbensa oblighescha la regenza da suttametter a la decisiun dal parlament variantas per la scolaziun gimnasiala. Questas variantas ston esser preparadas fin al stgalim da la lescha.
Il sboz da la revisiun parziala da la lescha davart las scolas medias preschenta tschintg differents models. La tscherna da las variantas ha gì lieu d'ina vart sin basa da la situaziun da partenza specifica en il chantun Grischun cun ina scola chantunala e cun set scolas medias privatas decentralas che porschan in gimnasi. Ultra da la varianta vertenta cun in gimnasi da sis onns ed in da quatter onns vegnan messas en discussiun er duas variantas cun in gimnasi da quatter onns u cun in gimnasi da tschintg onns. Questas duas variantas prevesan d'eliminar il gimnasi inferiur. Integrada da nov vegn ina varianta che vegn proponida dals recturs da las scolas medias grischunas. Questa varianta propona da mantegnair il gimnasi vertent da lunga durada e d'introducir - tar la midada suenter l'otgavel onn da scola - in onn da scola supplementar, in uschenumnà onn da tscherna da studi u er onn da sincronisaziun. La finala vegn messa en discussiun la varianta "regiuns - center". Questa varianta flexibilisescha ils models per ils gimnasis, uschia ch'i po vegnir realisà in auter model a la scola chantunala grischuna che a las scolas medias privatas. Tras quai pudess la scola chantunala manar in gimnasi da quatter onns senza gimnasi inferiur e las scolas medias privatas in tal cun gimnasi inferiur.
Dals documents da consultaziun pon ins prender invista sin la pagina d'internet dal departament d'educaziun, cultura e protecziun da l'ambient, www.ekud.gr.ch. La consultaziun dura fin ils 30 da settember 2007.

La simplificaziun da la lescha federala davart la taglia sin la plivalur vegn beneventada
La regenza grischuna sustegna la simplificaziun da la lescha federala davart la taglia sin la plivalur ch'è planisada da la confederaziun. La lescha vertenta davart la taglia sin la plivalur è memia cumplitgada, nunsurvesaivla e strusch chapaivla. Las differentas tariffas da taglia sco er las numerusas excepziuns fiscalas chaschunan intschertezzas e determinaziuns difficilas. La legislaziun actuala davart la taglia sin la plivalur cuntegna blers craps da stgarpitsch er per il maun public, e quai cun las ristgas correspundentas. Sco che la regenza explitgescha en sia consultaziun a la confederaziun pon las finamiras da la revisiun avisada vegnir approvadas perquai senza resalvas. Las finamiras èn ina simplificaziun radicala dal sistem, la garanzia d'ina segirezza giuridica uschè gronda sco pussaivel per las pajataglias e per ils pajataglias, l'augment da la transparenza sco er in'orientaziun pli intensiva a las clientas ed als clients.
Il modul cun ina tariffa unitara che vegn proponì en la consultaziun fiss da princip interessant e persvadess er or da vista da la regenza, sche la tariffa da taglia fiss fixada sin in stgalim bass avunda. Ina tariffa unitara da passa 6 pertschient avess percunter consequenzas negativas considerablas per la hotellaria. Il turissem sco industria d'export liada al lieu è pertutgà gia oz fitg ferm da la Svizra sco lieu da pretschs auts respectivamain da custs auts. Cun introducir ina tariffa unitara da passa 6 pertschient perdessan l'hotellaria ed il turissem clermain lur cumpatibilitad visavi las concurrentas ed ils concurrents europeics. Da quai patissan er ils secturs anteriurs e posteriurs. Tenor l'avis da la regenza sto perquai vegnir preferì il modul proponì cun duas tariffas. Cun quest model profitan l'hotellaria e la gastronomia da la tariffa reducida da 3.4 pertschient. Cun questa tariffa pli bassa per las prestaziuns dal sectur d'alloschament vegni tegnì quint dal caracter d'export da l'hotellaria.

La regenza piglia posiziun davart il concept "luf en Svizra" ch'è vegnì adattà
La regenza grischuna na va per gronda part betg d'accord cun las midadas dal concept "luf en Svizra". En Svizra ha il luf il status d'ina "spezia d'animals fitg protegida". Sco che la regenza scriva en sia consultaziun a l'uffizi federal d'ambient, na saja il luf dentant betg ina spezia periclitada sin tut il mund. Areguard il status da protecziun na datti perquai nagins motivs da tractar il luf en in'autra moda ch'il luf-tscherver. En Svizra duai il luf survegnir en il futur mo pli il status da protecziun "spezia d'animals protegida". La regenza spetga che la confederaziun fetschia proximamain puspè questa proposta sin plaun internaziunal. Quai vala tant pli che tschertas chatschas per regular l'effectiv da lufs en Svizra vegnan ad esser necessarias gia a media vista.
Er l'intenziun da la confederaziun - tenor la quala lufs che fan donn na dastgan betg vegnir sajettads en territoris da prioritad sco per exempel en las zonas centralas dals parcs naziunals, en ils territoris federals scumandads per la chatscha u en ils reservats d'utschels d'aua e d'utschels da passadi - refusescha la regenza cleramain. La fixaziun dal territori da prelevaziun duai vegnir fatga exclusivamain e senza restricziuns nunnecessarias tras las uschenumnadas cumissiuns da cumpartiment da las differentas regiuns. En questas cumissiuns èn represchentadas spezialistas e spezialists da la confederaziun e dal chantun. La finanziaziun per proteger muntaneras da muvel manidel n'è anc adina betg sclerida. Qua spetga la regenza che la confederaziun mettia a disposiziun dapli meds finanzials.

La revisiun parziala da l'ordinaziun chantunala davart la protecziun da l'ambient è vegnida deliberada
L'export da ruments chasans combustibels vegn reglà da nov - sco mesira preventiva - en in'ordinaziun. La regenza grischuna ha approvà la revisiun parziala correspundenta da l'ordinaziun chantunala davart la protecziun da l'ambient. La nova disposiziun da l'ordinaziun prevesa che contracts tranter vischnancas e corporaziuns per la gestiun da ruments stoppian vegnir approvads da la regenza pertutgant l'export da ruments chasans combustibels en arderas extrachantunalas. Ultra da quai vegni definì da nov, sut tge premissas che l'approvaziun vegn dada. L'approvaziun vegn dada mo per contracts limitads cun ina durada da maximalmain dus onns e mo, sch'il transport dals ruments vegn fatg cun la viafier, e quai en il senn da la lescha introductiva tar la lescha federala davart la protecziun da l'ambient.
Uschia concretisescha la regenza la mesira preventiva ch'è previsa en la planisaziun chantunala dals ruments per la proxima revisiun da la lescha chantunala davart la protecziun da l'ambient. La revisiun parziala da l'ordinaziun chantunala davart la protecziun da l'ambient entra en vigur il 1. da fanadur 2007.

La regenza beneventa las disposiziuns executivas tar la lescha davart las persunas estras sco er tar la revisiun parziala da la lescha d'asil
La regenza grischuna sustegna las numerusas disposiziuns executivas tar la nova lescha davart las persunas estras sco er tar la revisiun parziala da la lescha d'asil. En sia consultaziun a la confederaziun beneventa la regenza la revisiun planisada da l'ordinaziun davart l'integraziun da las persunas estras. Tenor l'avis da la regenza grischuna sto l'ordinaziun dentant anc vegnir repassada en tschertas dumondas fundamentalas. I stoppia tranter auter vegnir fixà explicitamain che l'integraziun saja da chapir sco in process vicendaivel che cunzunt las persunas estras sezzas stoppian gidar a realisar. Ultra da quai vegni giavischà che las prescripziuns concretas davart l'integraziun vegnian precisadas meglier.
Las indicaziuns pli detagliadas pertutgant il dretg processual en las ordinaziuns d'asil approvescha la regenza per gronda part. Quai vala particularmain per il nov concept ch'è vegnì sviluppà per indemnisar ils custs che resultan al chantun tras l'assistenza e tras il collocament da las requirentas e dals requirents d'asil. L'introducziun da pauschalas globalas vegn a facilitar ed a simplifitgar la procedura da rendaquint cun la confederaziun. Il sistem d'impuls per reducir ils custs en il sectur d'asil è - tenor la regenza - cunvegnent e maina a la finamira.
Malgrà quest consentiment a la midada da sistem proponida, pari a la regenza che las tariffas sajan evidentamain memia bassas, e quai tar tut las pauschalas. Uschia vegnan - sco consequenza da la midada da sistem - adossads ulteriurs custs als chantuns. Quai è in fatg deplorabel, perquai ch'ils chantuns na pon insumma betg influenzar la durada da la procedura d'asil e perquai ch'els ston ussa er anc purtar - pervia da las novaziuns proponidas - las consequenzas da questas incunvegnientschas.

Il Grischun sa participescha a la nova cunvegna davart las scolas professiunalas spezialisadas
Il chantun Grischun sa participescha a la cunvegna interchantunala per las contribuziuns als custs da las scolas professiunalas spezialisadas (cunvegna davart las scolas professiunalas spezialisadas). Quai ha concludì la regenza grischuna. Ils 22 da zercladur 2006 ha la radunanza plenara da la conferenza svizra da las directuras e dals directurs chantunals da l'educaziun publica (CDEP) deliberà la cunvegna davart las scolas professiunalas spezialisadas. Questa cunvegna regla las indemnisaziuns, sch'i vegnan frequentadas scolas professiunalas spezialisadas d'ordaifer il chantun. Cun la nova cunvegna è vegnì extendì il champ d'applicaziun sin ils secturs da la selvicultura, da l'agricultura, da la sanadad, dals fatgs socials e da l'art. En la cunvegna èn vegnidas integradas da nov er purschidas interdisciplinaras.
Per tut las professiuns na po il chantun Grischun betg porscher ina scolaziun professiunala spezialisada en il chantun, perquai ch'il dumber da scolaras e da scolars ch'è necessari per furmar ina classa d'ina grondezza raschunaivla na basta betg per intginas scolaziuns. Per il chantun èsi perquai impurtant da sa participar a la cunvegna davart las scolas professiunalas spezialisadas. La cunvegna po entrar en vigur per il cumenzament da l'onn da scola 2007/2008, sche 15 chantuns èn sa participads a tala.

La revisiun parziala da l'ordinaziun per incassar taxas e custs dals possessurs da vehichels a motor e da velos è vegnida approvada
La regenza grischuna ha approvà la revisiun parziala da l'ordinaziun per incassar taxas e custs dals possessurs da vehichels a motor e da velos. Ina midada essenziala è da desister en il futur da facturar anticipadamain taxas d'examen e da permiss. Empè da quai vegn incassada da nov ina taxa da 30 francs, sch'i vegn elavurada ina dumonda da conceder il permiss per emprender a manischar (cun stampa e cun spediziun da la carta d'admissiun per l'examen da teoria). L'ordinaziun da taxas midada entra en vigur il 1. d'october 2007.

Da vischnancas e da regiuns
- Tavau: Il contract tranter il chantun Grischun e la vischnanca da Tavau per suttametter operativamain la polizia da la vischnanca da Tavau a la polizia chantunala e per laschar supigliar la polizia chantunala incumbensas da la polizia da vischnanca vegn approvà. Il contract prevesa che la responsabladad operativa vegnia surdada a la polizia chantunala, ma che la responsabladad administrativa restia tar la vischnanca da Tavau.
- Castaneda: Il project integral "Castaneda IV" da la vischnanca da Castaneda vegn approvà. Als custs cun dretg da subvenziun per il project da protecziun dad 820'000 francs vegnan garantidas contribuziuns chantunalas da 146'000 francs.
- Silvaplauna: Il project "protecziun cunter crudada da crappa" da la vischnanca da Silvaplauna vegn approvà. Als custs cun dretg da subvenziun da 470'000 francs vegn garantida ina contribuziun chantunala da maximalmain 51'700 francs.
- Stussavgia: A la l'associaziun per il provediment d'aua da Stussavgia Plaz vegn garantida ina contribuziun da 228'900 francs als custs cun dretg da contribuziun per renovar e per engrondir il stabiliment dal provediment d'aua, 2. etappa.
- Cumbel: A la vischnanca da Cumbel vegn garantida ina contribuziun da 72'000 francs als custs cun dretg da contribuziun per sanar e per engrondir il stabiliment dal provediment d'aua, 2. etappa.
- Savognin: Sin la via dal Güglia entaifer il vitg da Savognin en il sectur da l'ospital e da la posta vegn la zona da sveltezza maximala existenta da 50 km/h "limita generala" extendida per circa 170 meters en direcziun da Beiva.
- Samignun: En differentas fracziuns da la vischnanca da Samignun vegn fixada la sveltezza maximala a 30 km/h ed introducida ina "zona da tempo 30", e quai integrond la via chantunala respectiva.
- Beiva: En il vitg da Beiva vegn fixada la sveltezza maximala a 30 km/h ed introducida ina "zona da tempo 30", e quai integrond la via chantunala. Tar l'entrada dal vitg nà dal sid vegn a medem temp spustada la limita generala da 50 km/h per ca. 50 meters en direcziun da Silvaplauna e l'avantzona da 60 km/h vegn abolida.
- Bravuogn: En la vischnanca da Bravuogn vegn fixada la sveltezza maximala a 30 km/h ed introducida ina "zona da tempo 30", e quai integrond las vias chantunalas.
- Roten: En la vischnanca da Roten vegn fixada la sveltezza maximala a 30 km/h ed introducida ina "zona da tempo 30", e quai integrond las vias chantunalas.
Contribuziuns chantunalas a differentas instituziuns
- "Selvicultura 2007": Il project collectiv chantunal "selvicultura 2007" che custa totalmain 24'802'000 francs vegn approvà. Ils custs che restan suenter la deducziun dal retgav da la vendita da laina importan 13'790'000 francs. A las proprietarias ed als proprietaris da guaud ch'èn participads al project vegnan garantidas contribuziuns chantunalas en la summa dad 1'996'000 francs. Il project ha l'intent da cuntinuar - tenor cleras prioritads - cun las lavurs da tgira dal guaud las pli necessarias e las pli urgentas.
- Citad da Cuira: Sin fundament dal concept grischun per implants da sport (CISIC GR) vegn -garantida a la citad da Cuira ina contribuziun da 210'000 francs per construir il tetg previs per il batschigl exteriur da l'implant da sport Obere Au.
- Club da ballape da Domat: Sche la finanziaziun totala reussescha, vegn - sin fundament dal concept grischun per implants da sport (CISIC GR) - garantida ina contribuziun da 220'000 francs al club da ballape da Domat per construir la plazza da pastget artifizial sin la plazza da sport Vial a Domat.
- Agid umanitar: Per totalmain nov projects d'agid umanitar a l'exteriur ha la regenza deliberà ina summa totala da 34'000 francs.

Projects da vias
La regenza ha approvà totalmain 759'000 francs per construir e per sanar il suandant traject da via:
- via naziunala A13: lavurs d'impressari e lavurs da cuvrida, rundella Tusaun nord

Fatgs dal persunal
- Renato Lanfranchi, domicilià ad Igis, è vegnì nominà sco vicemanader da l'uffizi da sanadad.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun