Cun la revisiun totala da la lescha chantunala davart ils fatgs
veterinars vegn d'ina vart adattà il dretg chantunal al dretg federal
modifitgà. Da l'autra vart vulan ins metter novs accents en intgins
secturs. Uschia ha la regenza integrà en la lescha mesiras effizientas
cunter chauns privlus. Er las professiuns da la tgira da la sanadad
d'animals vegnan regladas da nov. La finala duai vegnir garantì er
vinavant che la professiunalisaziun dal servetsch veterinar che vegn
pretendida en il dretg federal vegnia er realisada. La regenza ha
deliberà la missiva correspundenta al cussegl grond. Quel vegn a tractar
la fatschenta durant la sessiun d'avust.
En la nova lescha davart ils fatgs veterinars èsi previs che chauns
cun in cumportament extraordinari stoppian vegnir suttamess ad in test
da cumportament. Sch'in chaun vegn classifitgà sco privlus, pon las
autoritads ordinar las mesiras necessarias. En consideraziun vegn per
exempel l'obligaziun da tegnair chauns a la tschinta u d'als metter si
in buccarè. Tar chauns fitg privlus poi dentant perfin vegnir ordinà
d'als mazzar. Ultra da quai pon possessuras e possessurs da chauns
vegnir obligads da frequentar curs d'instrucziun u da far in'assicuranza
da responsabladad.
La regenza desista dentant da scumandar generalmain tschertas razzas
da chauns. Tut ils chauns d'ina tscherta razza na ston numnadamain betg
esser a priori chauns privlus. En il cas cuntrari na stoi er betg esser
ch'in chaun d'ina "razza innocenta" saja en mintga cas er in chaun
innozent.
Cun la nova lescha vegn ultra da quai reglà pli detagliadamain
davart il pratitgar professiuns da la tgira da la sanadad d'animals.
Persunas senza in certificat universitar veterinar, sco per exempel
guariturs d'animals, omeopats d'animals u psicologs d'animals ston
cumprovar tschertas enconuschientschas fundamentalas. Ellas ston
percorscher epidemias d'animals ed enconuscher la legislaziun respectiva
per exempel en il sectur da la protecziun dals animals e da las
epidemias d'animals. Lur activitad basegna ina permissiun, ed avant che
cumenzar lur activitad ston ellas cumprovar lur enconuschientschas
fundamentalas cun in certificat.
Il dretg federal transferescha adina puspè novas incumbensas al
servetsch veterinar e fa adina novas pretensiuns als organs uffizials.
Uschia èn las pretensiuns da scolaziun e d'experientscha pratica dals
organs uffizials creschidas ils ultims onns cuntinuantamain. La lescha
davart ils fatgs veterinars pussibilitescha da tegnair pass cun il
svilup e d'adattar l'organisaziun als basegns midads.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun