En il sectur da las ustarias vul la regenza grischuna simplifitgar
la procedura da taxaziun da las bavrondas destilladas e distgargiar
administrativamain ils manaschis. Ultra da quai vegnan formuladas da nov
las premissas per la permissiun per ustieras e per ustiers. La regenza
ha deliberà la missiva correspundenta tar la revisiun parziala da la
lescha d'ustaria per mauns dal cussegl grond. Questa fatschenta vegn
tractada dal parlament en la sessiun d'avust.
Il motiv principal per la revisiun parziala da la lescha d'ustaria
èn las stentas che vegnan fatgas per distgargiar administrativamain
interpresas pitschnas e mesaunas. En spezial duai vegnir simplifitgada
la procedura da taxaziun dal commerzi en detagl cun bavrondas
destilladas. La taxaziun respectivamain la fixaziun da la taglia vegn
fatga da nov en in interval da tschintg onns empè d'en in interval da
dus onns. Per quest intent vegnan attribuids fixamain - grazia ad ina
nova procedura - ils manaschis d'ustaria e da vendita per tschintg onns
ad ina gruppa da svieuta, entaifer la quala las taglias han la medema
summa. Uschia vegn la taglia incassada annualmain en furma d'ina
pauschala. Cun questa mesira duai er vegnir sminuida la lavur da las
autoritads cumpetentas.
La revisiun duai succeder senza chaschunar custs supplementars, e
las entradas or da la taxaziun da las bavrondas destilladas na duain
betg vegnir sminuidas u augmentadas. Las taxas minimalas da fin ussa da
60 francs en la vendita e da 75 francs en las ustarias vegnan
augmentadas en general sin 100 francs. Percunter vegn sminuida la
grevezza finanziala dals ulteriurs manaschis d'ustaria. Tras quai vegn
reducida la tariffa da taglia tar quantitads da passa 100 liters. La
clav da repartiziun per il diever dal retgav net or da la taxaziun na
duai betg vegnir midada. Per onn importa quest retgav circa 1,6 milliuns
francs.
En la revisiun parziala da la lescha d'ustaria vegnan plinavant
formuladas da nov e per part cumplettadas las premissas per la
permissiun da pratitgar activitads d'ustaria. Il motiv per quai è che
las premissas vertentas - sco per exempel la buna reputaziun che vegn
pretendida - èn sa mussadas mo per part sco adattadas en la pratica e
n'èn betg sa cumprovadas suffizientamain. Da nov duain perquai mo
quellas persunas survegnir ina permissiun che pon garantir che la
gestiun dal manaschi è irreproschabla e ch'i na dat naginas reclamaziuns
da la polizia sco er che las taxas prescrittas vegnan pajadas. Plinavant
vegni pretendì ussa che la petenta u ch'il petent inoltreschia in
extract actual dal register penal. Per proteger la sanadad dals giasts
ston las petentas ed ils petents furnir ultra da quai ina cumprova
ch'ellas e ch'els n'hajan betg cuntrafatg repetidamain u grevamain
cunter la legislaziun federala u chantunala da victualias. Questa
cumprova po vegnir furnida cun ina conferma dal departament d'economia
publica e fatgs socials.
Percunter desista la regenza d'introducir in examen u il mussament
d'enconuschientschas da la legislaziun da victualias sco premissas per
ina permissiun. Per la regenza fiss quai incumpatibel cun las stentas da
deregulaziun e da distgargia administrativa. Ina tala regulaziun
correspundess a la reintroducziun da la patenta d'ustiera e d'ustier
ch'era vegnida abolida a chaschun da l'ultima revisiun totala da la
lescha d'ustaria l'onn 1997. Tenor l'avis da la regenza cuntegna la
legislaziun da victualias disposiziuns ch'èn detagliadas avunda per
garantir la segirezza da victualias.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun