En connex cun la vista cumplessiva dal conclus federal davart la construcziun e
davart la finanziaziun da projects da l'infrastructura dal traffic public (FTP) pretenda il
chantun Grischun differentas adattaziuns. Il cussegl federal declera cun quest project,
co che la rait da viafier svizra e la purschida dal traffic public duain vegnir sviluppadas
vinavant. Ultra da quai duai l'infrastructura futura da la viafier (IFV) vegnir garantida cun
agid d'ina nova lescha federala e cun agid d'in conclus federal davart il credit global.
Da princip sustegna la regenza en sia consultaziun la posiziun cuminaivla da la
conferenza da las directuras e dals directurs chantunals dal traffic public. Dal puntg da
vista dal Grischun renviescha la regenza dentant al fatg che la midada da las
amplificaziuns sin l'axa Turitg Cuira en ina uschenumnada opziun d'engrondiment
impedeschia il chantun en ses svilup. Il martgà pretenda en spezial er tar il traffic
Basilea Turitg Grischun ina intensivaziun dal tact. Per la regenza èn las premissas
infrastructuralas per gronda part avant maun per introducir en moda speditiva il tact da
mes'ura per il traject Turitg Cuira.
Problematic per il Grischun è er il fatg che las interpresas da transport concessiunadas,
en spezial la viafier retica (VR), n'enconuschan cuntrari a las viafiers federalas (VFF)
nagin traffic da persunas a gronda distanza. La consequenza da quai è che la VR n'ha
nagin dretg da meds finanzials d'investiziun or dal fond da la FTP. Il medem mument
èsi dentant necessari che la VR accordia sia purschida cun quella da las VFF. Pervia da
quai sto il traffic regiunal vegnir integrà en il project da la FTP en moda adequata. La
finala pretenda la regenza ch'in tact d'ina ura senza midada da tren da Constanza
Rorschach Sargans Cuira vegnia integrà en il project sco opziun d'engrondiment. Il
motiv è che las colliaziuns dal traffic public tranter la Germania dal sid ed il Grischun
n'èn actualmain betg attractivas.
Avert la consultaziun tar la revisiun parziala da l'ordinaziun tar la lescha
per promover la tgira da persunas malsaunas
La regenza grischuna ha deliberà per la consultaziun l'ordinaziun tar la lescha per
promover la tgira da persunas malsaunas e l'assistenza da persunas attempadas e da
persunas che basegnan tgira (ordinaziun tar la lescha per promover la tgira da
persunas malsaunas).
Ils 13 da zercladur 2007 aveva il cussegl grond concludì ina revisiun parziala da la
lescha per promover la tgira da persunas malsaunas e l'assistenza da persunas
attempadas e da persunas che basegnan tgira (lescha per promover la tgira da
persunas malsaunas). La revisiun parziala prevesa d'introducir ina finanziaziun che sa
drizzan tenor la prestaziun dals servetschs da la tgira ed assistenza a chasa (spitex) e
dals servetschs da la cussegliaziun per mammas e per babs sco er da concepir da nov
las contribuziuns d'investiziun per las chasas da persunas attempadas e da tgira e per
las gruppas da tgira.
La revisiun parziala da la lescha per promover la tgira da persunas malsaunas
pretenda che l'ordinaziun tar la lescha per promover la tgira da persunas malsaunas
vegnia adattada en differents puncts. Da nov vegnan integradas en l'ordinaziun las
disposiziuns che garanteschan che tut ils umans pertutgads en il chantun Grischun
hajan las medemas schanzas per survegnir prestaziuns da la tgira ed assistenza a
chasa sco er da la cussegliaziun per mammas e per babs. En il sectur da la tgira ed
assistenza a chasa regla l'ordinaziun ultra da quai las prestaziuns renconuschidas en
las categorias da prestaziun che han in dretg da contribuziuns (prestaziuns da tgira,
prestaziuns da tegnairchasa e d'assistenza, servetsch da pasts) sco er la dimensiun
maximala da las prestaziuns che han in dretg da contribuziuns.
Tar la cussegliaziun per mammas e per babs vegnan plinavant prescrits ils standards
minimals davart il gener e davart la dimensiun dals servetschs che vegnan purschids.
La finala definescha l'ordinaziun la noziun decisiva concernent la rentabilitad che furma
la basa per fixar las contribuziuns chantunalas da prestaziun per ils servetschs da la
tgira ed assistenza a chasa sco er per fixar las tariffas maximalas en il sectur da las
chasas da persunas attempadas e da tgira.
Ils documents da consultaziun èn avant maun sin la pagina d'internet dal departament
da giustia, segirezza e sanadad (www.djsg.gr.ch). La consultaziun dura fin ils 30 da
settember 2007.
Persuna che dat infurmaziuns:
Rudolf Leuthold, manader da l'uffizi da sanadad, tel. 081 257 26 41
Dapli sustegn per ils giuvenils che entran en il mund professiunal
Il chantun Grischun rinforza il sustegn dals giuvenils che han difficultads da s'integrar
en il martgà professiunal ed en il martgà da lavur. La regenza grischuna ha deliberà il
concept respectiv davart il "manaschament da cas concernent la furmaziun
professiunala".
Las difficultads da giuvenils tar l'integraziun en il martgà professiunal ed en il martgà
da lavur èn daventadas pli frequentas er en il chantun Grischun. Ina problematica
speziala resulta da las midadas da la societad ed en connex cun quai da las
pretensiuns da l'economia ch'èn s'augmentadas per las emprendistas e per ils
emprendists. Per scolaras e per scolars cun prestaziuns deblas u cun dischavantatgs
socials èsi adina pli difficil da chattar ina plazza da scolaziun, saja quai en ina
professiun u en in scola.
Cun lantschar il project "manaschament da cas concernent la furmaziun professiunala"
reagescha il chantun sin questa situaziun. La finamira la pli gronda dal project è quella
da pussibilitar che uschè blers giuvenils sco pussaivel termineschian ina emprima
scolaziun obligatorica e da reducir respectivamain d'impedir uschia la dischoccupaziun
da giuvenils. Cun la realisaziun da quest project vegn cumenzà l'atun 2007. En quest
connex vegnan engaschads coaches professiunals che assistan giuvenils periclitads
durant la fasa da tschertgar ina professiun e da cumenzar cun la vita professiunala, e
quai cun il motto "agid per gidar sasez". La fasa da pilot è concepida per quatter onns
da scola. La responsabladad per quest project ha l'uffizi per la furmaziun
professiunala. Per la realisaziun è previs in credit da 958'600 francs per ils onns 2007
fin 2011.
L'integraziun da persunas estras vegn promovida
L'integraziun da persunas estras duai vegnir promovida pli fitg. La regenza grischuna
ha surdà la direcziun e la coordinaziun en il sectur da l'integraziun dal dretg da
persunas estras e dal dretg d'asil a l'uffizi da fatgs da polizia e da dretg civil. Per
realisar tut las incumbensas che resultan en il sectur da l'integraziun dal dretg da
persunas estras e dal dretg d'asil sco er en connex cun il cumbat cunter il rassissem
vegn ultra da quai stgaffida per il 1. da schaner 2008 ina plazza per ina incumbensada
u per in incumbensà d'integraziun.
En il rom da la nova lescha davart las persunas estras e da la revisiun da la lescha
d'asil sco er da las ordinaziuns respectivas vegnan regladas da nov las cumpetenzas
tranter la confederaziun ed ils chantuns en il sectur da l'integraziun. L'execuziun e la
realisaziun dal program prioritar da la confederaziun vegnan ad esser chaussa dals
chantuns. Da questa midada resultan novas pretensiuns per la politica chantunala
d'integraziun. Analogamain a la regulaziun federala è il sectur da la politica chantunala
d'integraziun en il sectur da las persunas estras domicilià ussa tar l'uffizi da fatgs da
polizia e da dretg civil. Quel porta la responsabladad per manar e per realisar la
promoziun da l'integraziun. El administrescha er las contribuziuns d'integraziun che
vegnan pajadas da la confederaziun en il rom d'in fond d'integraziun che sto vegnir
stgaffì da nov. L'incumbensada u l'incumbensà d'integraziun vegn a coordinar las
mesiras concernent ina integraziun sociala, professiunala e culturala da fugitivas e da
fugitivs, da persunas cun basegn da protecziun che han ina permissiun da dimora e da
persunas ch'èn admessas provisoricamain, sco er a realisar las ulteriuras
incumbensas d'integraziun dal chantun.
Persuna che dat infurmaziuns:
Heinz Brand, schef da l'uffizi da fatgs da polizia e da dretg civil, tel. 081 257 25 21
La regenza beneventa las midadas da l'ordinaziun davart las bancas da
gieu
La regenza grischuna beneventa tut las midadas che gidan a meglierar la situaziun
economica da las bancas da gieu en il Grischun. Sco che la regenza scriva en sia
consultaziun tar las midadas da l'ordinaziun federala davart las bancas da gieu fiss il
fatg da serrar las duas bancas da gieu grischunas ch'existan anc collià cun ina gronda
perdita da la reputaziun betg mo per il Grischun sco chantun turistic, mabain er per la
scena svizra da gieus da fortuna. El chaschunass er la perdita da tschinquanta plazzas
da lavur, ed er quai vali d'impedir.
Pervia da quai è la regenza perencletga ch'i vegnia permess a las bancas da gieu da
sistir il manaschi da gieus da maisa ils dis, ils quals i na po betg vegnir cuntanschida
ina rentabilitad adequata. La regenza sustegna er ulteriuras mesiras per garantir il
success economic dals casinos turistics, dal qual profitan er la confederaziun ed il
chantun. Per gulivar ils dischavantatgs dals casinos turistics e per mantegnair ils
effects positivs dals casinos per il maun public s'exprima la regenza ultra da quai per
ina revisiun dal sectur da las tariffas da las taxas dals casinos en la lescha davart las
bancas da gieu.
Las adattaziuns da las ordinaziuns executivas tar la NGF vegnan
beneventadas per gronda part
La regenza grischuna è per gronda part perencletga cun las adattaziuns dal dretg
d'ordinaziun da la confederaziun en consequenza da la nova concepziun da la
gulivaziun da finanzas e da las incumbensas tranter la confederaziun ed ils chantuns
(NGF). Ils sbozs da l'ordinaziun avant maun realiseschian las directivas or da la
legislaziun davart la NGF per gronda part en moda correcta, scriva la regenza en sia
consultaziun a la confederaziun. Differentas disposiziuns basegnian dentant da vegnir
decleradas u da vegnir curregidas en tscherts puncts. Quai pertutgia tranter auter ils
secturs dal guaud, da l'aua sco er da la protecziun da la natira e da la patria. Tenor
l'avis da la regenza duajan ils chantuns survegnir dapli autonomia tras la NGF per
ademplir lur incumbensas respectivamain per realisar ils projects. Els possian dentant
mo profitar da las libertads d'agir correspundentas, sche la confederaziun sa
restrenschia consequentamain a las directivas strategicas en il sectur da las
incumbensas communablas e na fetschia naginas prescripziuns als chantuns tar
mintga detagl. Da quest puntg da vista na persvadian las ordinaziuns executivas avant
maun betg en tut ils puncts e stoppian vegnir adattadas per part.
Persuna che dat infurmaziuns:
Urs Brasser, secretari da finanzas dal departament da finanzas e vischnancas,
tel. 081 257 32 12
Concludì la revisiun parziala da las disposiziuns executivas tar la lescha
davart la promoziun da la tgira d'uffants cumplementara a la famiglia en il chantun
Grischun
La regenza grischuna ha concludì da reveder parzialmain las disposiziuns executivas
tar la lescha davart la promoziun da la tgira d'uffants cumplementara a la famiglia en il
chantun Grischun. La directiva che valeva enfin ussa davart la durada minimala d'in
plazzament en canortas d'uffants da dus mezs dis per emna è vegnida adattada. Pervia
da l'interess vi da purschidas da tgira pli curtas è vegnida midada la clausula vertenta
a "durant almain in mez di per emna". Ultra da quai vegnan ils custs normads per
calcular las contribuziuns dal maun public formulads da nov ed extendids. Per concepir
la calculaziun dals custs normads en moda pli unitara vegn prescrit da nov in plan dals
contos unitar a las instituziuns che porschan questas prestaziuns, che serva sco basa
per calcular ils custs normads. Er en il rapport grischun da famiglia è vegnida visada
en emprima prioritad in'extensiun dals custs normads en il sectur da la tgira d'uffants
cumplementara a la famiglia. Las disposiziuns executivas adattadas entran en vigur il
1. da schaner 2008.
Revisiun totala da l'ordinaziun davart la tgira da dents en scola
La regenza ha approvà la revisiun totala da l'ordinaziun davart la tgira da dents en
scola. Cun la revisiun totala duai vegnir garantida ina realisaziun efficazia da las
mesiras per mantegnair la sanadad da la bucca per tut ils uffants da las scolinas e dal
stgalim da la scola primara inclusiv las classas pitschnas e las scolas spezialas
correspundentas dal chantun Grischun. Questa adattaziun è necessaria, perquai che la
societad grischuna da dentistas e da dentists ha elavurà in concept nov per garantir las
mesiras che concernan la sanadad da la bucca en las scolas. Empè d'ina unica
persuna gidantra da la tgira da dents prevesa quel da stgaffir ina rait da circa 20
instructuras regiunalas u instructurs regiunals che han ina scolaziun sco assistenta u
sco assistent da dentista u da dentist. Uschia duain vegnir garantidas in'acceptanza ed
in'effectivitad da las mesiras ch'èn uschè grondas sco pussaivel en tut las regiuns dal
chantun Grischun. Questa nova ordinaziun entra en vigur il 1. d'avust 2007 e vegn
applitgada per l'emprima giada l'onn da scola 2007/2008.
Approvà il manaschament da privels da la natira 2007
La regenza grischuna ha approvà il program da lavur "manaschament da privels da la
natira 2007" cun expensas totalas dad 1'350'000 francs. Il program da lavur cuntegna
puncts centrals en il sectur dal sistem d'infurmaziun davart privels sco er la
cuntinuaziun e la nova redacziun da chartas da privel en diversas vischnancas. Var 60
pertschient da las lavurs vegnan fatgas dal servetsch forestal chantunal. Secturs
parzials spezials dal volumen da lavur vegnan surdads a biros privats. Suenter la
deducziun da las contribuziuns federalas che pon vegnir spetgadas restan al chantun
expensas nettas da var 262'000 francs.
Da vischnancas e da regiuns
- Cuira: La revisiun totala da la planisaziun urbana da la citad da Cuira dals 26 da
november 2006 vegn approvada.
- Vignogn: La constituziun da la vischnanca da Vignogn dals 9 da matg 2006 vegn
approvada cun excepziun da l'art. 42 al. 2.
- Trun: Sin la via sursilvana en la fracziun da Campliun da la vischnanca da Trun,
tar l'entrada dal vitg al vest da Campliun, vegn extendida la zona da sveltezza
maximala da 60 km/h per ca. 220 meters en direcziun da Mustér.
- Segl: En la vischnanca da Segl vegn fixada la sveltezza maximala en tut il vitg a
30 km/h ed introducida ina "zona da tempo 30", e quai cun integrar la via chantunala.
- Tavau: En la vischnanca da Tavau vegn fixada la sveltezza maximala en il vitg a
30 km/h ed introducida ina "zona da tempo 30" sin la Scalettastrasse e sin la
Bobbahnstrasse.
- Pratval: En il vitg da Pratval vegn fixada la sveltezza maximala a 30 km/h ed
introducida ina "zona da tempo 30", e quai cun integrar la via chantunala. Tar l'entrada
dal vitg nà dal sid vegn a medem temp spustada la limita generala da 50 km/h
ensemen cun la tavla dal cumenzament dal vitg per ca. 100 meters en direcziun da
Tusaun e tar l'entrada dal vitg nà dal ost per ca. 100 meters en direcziun dad Almen.
- Laax: Il project "avertura da l'alp Uaul" da la vischnanca da Laax vegn approvà.
Als custs vegn garantida ina contribuziun da maximalmain 510'000 francs.
Contribuziuns chantunalas a differentas instituziuns
- Chasa da dimora St. Catharina, Cazas: Il project da construcziun per renovar il
1.ed il 2. plaun da la chasa da dimora St. Catharina, Cazas, vegn approvà. A
l'instituziun responsabla vegn garantida ina contribuziun chantunala da construcziun
da maximalmain 344'500 francs.
- Promoziun da la cultura: La regenza ha concedì contribuziuns da totalmain
138'500 francs per promover 12 occurrenzas ed ovras culturalas.
Projects da vias
La regenza ha approvà totalmain 1'380'000 francs per construir e per sanar il
suandant traject da via:
- via naziunala A13: adattaziun dals indrizs electromecanics sco er d'installaziuns da
current ferm e da current lev en il sectur da traffic dal tunnel dal San Bernardin
Fatgs dal persunal
- Willi Berger, domicilià a Cuira, secretari dal departament da finanzas e
vischnancas, è vegnì nominà sco directur da la cassa da pensiun chantunala dal
Grischun.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun