Il cumenzament da fanadur han ins lantschà las lavurs da sanaziun da la scola chantunala a la Halde a Cuira. Ina giada ch'ins ha fatg la midada en ils provisoris sin l'areal a la Plessur, vegn sanada l'entira chasa da scola en duas etappas, e quai cun mantegnair parzialmain il manaschi da scola. Las lavurs da construcziun duran trais onns. A partir da l'onn da scola 2010/2011 ha l'instrucziun puspè lieu cumplainamain a la Halde.

L'emprima emna da fanadur 2007 èsi vegnì cumenzà cun las lavurs da construcziun en il tract da las classas e da l'aula da la scola chantunala a la Halde. Fin mez dal mais vegnan endrizzads ils plazzals e fatgas lavurs preparatoricas. Latiers tutgi er da transportar en ils provisoris tut il mobigliar sco er ils indrizs da manaschi reutilisabels. Quest transport vegn fatg da l'agen persunal sco er - en furma da lavur durant las vacanzas - da scolaras e da scolars. Suenter cumenzan las lavurs da demontascha a l'intern. Fin la fin da l'onn vegn ad esser terminada la sanaziun da PCB e d'asbest, e grondas parts da la nova fatschada vegnan ad esser montadas. La sanaziun dal tract da las classas e da l'aula dura dus onns. Suenter che quest tract è retratg la stad 2009, vegni cumenzà cun las lavurs da construcziun vi dal tract da las scienzas natiralas.
Durant las lavurs da sanaziun vegni instruì en las 40 stanzas da scola dals pavigliuns da lain ch'èn vegnids construids da nov sin l'areal dal Constatineum ed en 5 stanzas da scola per la furmaziun creativa en la Münzmühle (anteriura scola da Rudolf Steiner). La direcziun e l'administraziun da la scola è alloschada en la chasa Cleric, l'anteriur seminari da magistras e da magisters. Sco pussaivladads da segiurn e d'alimentaziun servan in ulteriur pavigliun da lain sin l'areal a la Plessur sco er la sala da mangiar dal convict.
Fin oz è vegnida surdada la mesadad da las lavurs da construcziun e da las furniziuns per la sanaziun da la scola chantunala a la Halde. Tut las incumbensas han pudì vegnir concedidas ad interpresas grischunas sco er ad ina cuminanza da lavur cun participaziun indigena.
Per il project da sanaziun vegni calculà cun in volumen d'investiziun da totalmain 50 milliuns francs. Per realisar la sanaziun aveva il cussegl grond concedì in credit d'impegn correspundent durant la sessiun da zercladur 2006. Includids en il quint èn er ils custs per ils provisoris necessaris sco er per remplazzar l'equipament antiquà.
Il matg 2004 aveva il pievel grischun refusà il project da votaziun per la construcziun nova e per la sanaziun da la scola chantunala da Cuira che vuleva concentrar la scola chantunala a la Plessur. Restadas èn - suenter ch'il pievel aveva refusà quest project per construir da nov la scola - las insuffizienzas da la scola chantunala a la Halde areguard la construcziun ed areguard il manaschi. Questas insuffizienzas na permettan strusch pli in manaschi da scola regular e ston vegnir eliminadas urgentamain. Logicamain ha la regenza pia prendì per mauns la planisaziun per sanar la scola chantunala a la Halde ed ha elavurà in project per quest edifizi che sto vegnir reparà urgentamain.

Gremi: uffizi da construcziun auta dal Grischun
Funtauna: rg uffizi da construcziun auta dal Grischun