La populaziun dal chantun Grischun resta quasi stabila ils proxims dus decennis. Fin l'onn 2030 crescha ella mo levamain sin 191'000 abitantas ed abitants, quai che correspunda ad in augment da stgars 2 pertschient. Quai resorta d'in rapport che Wüest & partenaris han fatg per incumbensa dal chantun Grischun.

Il model da prognosa che Wüest & partenaris han duvrà è concepì spezialmain per las relaziuns specificas dal chantun Grischun. Uschia è vegnida resguardada explicitamain la dinamica da svilup ch'è differenta en las singulas vischnancas ed ils effects turistics e da segundas abitaziuns èn er vegnids integrads. Cuntrari a la prognosa da populaziun da la confederaziun che lavura cun la metoda "top-down", sa basa la prognosa da quest studi sin la metoda "bottom-up". Quai vul dir che la populaziun dal chantun Grischun resulta da la resumaziun da la populaziun, cun la quala i vegn fatg quint en las vischnancas.

Prognosas per il futur cuntegnan adina tschertas malsegirezzas. Nagin na po prevair il futur e bleras influenzas futuras na pon betg vegnir anticipadas e pervia da quai er betg vegnir resguardadas en il model da prognosa. Malsegirezzas pli grondas datti en spezial en connex cun prognosas che sa basan sin pitschnas valurs da partenza (dumber minim d'abitantas e d'abitants) respectivamain sin pitschnas unitads territorialas. Pervia da quai èsi raschunaivel da formular plirs scenaris per mussar - en ina tscherta dimensiun - il svilup da la populaziun che po vegnir spetgà. Per las perspectivas da la populaziun dal Grischun per l'onn 2030 èn vegnids calculads trais scenaris: in scenari bass, in scenari mesaun ed in scenari aut. Il scenari mesaun correspunda il pli fitg al svilup cun il qual i po vegnir fatg quint e che vegn resguardà - or dal puntg da vista actual - sco il pli plausibel. Tar la calculaziun dals scenaris valevi da resguardar ils facturs d'influenza ils pli differents sco il dumber da naschientschas, sco la mortalitad, sco l'immigraziun e l'emigraziun, sco la quota da natiralisaziun, sco il basegn da surfatscha per persuna, sco la libra circulaziun da persunas cun la UE e sco l'attractivitad dal Grischun sco lieu d'abitar e sco spazi da viver.

Il scenari mesaun - e pli probabel - da la prognosa da populaziun fa quint che la populaziun actuala dal chantun Grischun s'augmenta da 187'803 abitantas ed abitants (2005) a circa 191'100 abitantas ed abitants fin l'onn 2027. Alura vegn ella a sa reducir minimalmain ed a cuntanscher l'onn 2030 ina grondezza da circa 191'000 abitantas ed abitants, quai che correspunda ad in augment da 1,7 pertschient. Sch'il scenari aut daventass realitad, s'augmentass la populaziun dal Grischun a 200'900 abitantas ed abitants (+7,0%), perencunter en cas dal scenari bass sa reduciss ella a circa 179'800 abitantas ed abitants (-4,3%). En spezial en las valladas lontanas è il trend fitg negativ, e quai er tar il scenari mesaun.

Las perspectivas da la populaziun dal Grischun per l'onn 2030 ch'èn vegnidas elavuradas en collavuraziun cun differents uffizis (uffizi per il svilup dal territori, uffizi da vischnancas, uffizi per economia e turissem ed uffizi da sanadad) duai servir sco basa per las activitads da planisaziun futuras dal chantun. Ellas pon vegnir chargiadas giu da la pagina d'internet da l'uffizi per il svilup dal territori sut www.are.gr.ch.

Gremi: uffizi per il svilup dal territori
Funtauna: rg uffizi per il svilup dal territori