En il rom dal project "rumantsch grischun en scola" han 23 vischnancas en la Val Müstair, en il Grischun central ed en la Surselva decis d'introducir en lur scolas davent da l'onn da scola 2007/08 sco piunieras la lingua da standard rumantsch grischun. La partenza vegn fatga ils 20 d'avust 2007 en las emprimas classas primaras. Per quest intent è vegnì elavurà il nov med d'instrucziun "Passins" per emprender a leger ed a scriver.

Cun Giancarlo Conrad, cun Giusep Caduff, cun Telgia Juon e cun Giuliana Mall ha il departament d'educaziun dal chantun Grischun pudì engaschar auturas ed auturs da meds d'instrucziun fitg cumpetents per l'elavuraziun da la fibla "Passins". Tras lur origin èn vegnidas garantidas er la relaziun tar las fiblas rumantschas dals idioms d'enfin ussa e la relaziun tar las differentas regiuns linguisticas. Sco ch'igl è usità per meds d'instrucziun moderns na sa restrenscha "Passins" betg mo ad in element, mabain porscha a las persunas d'instrucziun sco er a las scolaras ed als scolars numerusas materialias d'emprender e da lavurar e quai cun il cudesch, cun trais carnets da lavur, cun in cudeschet da pleds, cun in carnet da scriver, cun la tabella da suns inizials sco er cun ina CD-ROM cun models per copiar. L'element central è il cudesch ch'è senza excepziun en quatter colurs. El cumpiglia in curs introductiv per emprender a leger che gida ad analisar suns e bustabs (82 paginas) ed alura ina part da text davart divers temas reals (42 paginas). En quest med d'instrucziun per emprender a leger vegnan ils uffants confruntads a partir dal cumenzament cun pleds entirs e cun parts da la frasa (nums, titels e.u.v.), dals quals els pon imprimer il maletg dal pled e dals quals els pon chapir la significaziun cun agid da las illustraziuns e cun l'enconuschientscha da singuls bustabs. Ultra da quai vegnan il singuls suns introducids sistematicamain tenor la metoda da suns inizials. Il punct da partenza è il sun inizial d'in pled da memoria (a sco ananas, g sco gumma e.u.v.). Per regla vegn mintga sun tractà sin ina pagina dubla en la fibla e sin trais paginas en ils carnets da lavur. Las illustraziuns (d'Annalis Vieli, Razén, sco er d'autras artistas e d'auters artists), ils dissegns d'uffants e las fotografias han ina funcziun impurtanta en la fibla. Ils cuntegns dal curs introductiv per emprender a leger e da la part da texts tractan temas reals or dal mund d'experientschas dals uffants. Ultra dals cuntegns ch'ins chatta en mintga curs introductiv per emprender a leger, porscha la fibla dentant er text che duain svegliar e promover la schientscha dals uffants per lur identitad rumantscha.

Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient