La regenza grischuna sustegna las midadas da l'ordinaziun federala davart la meteorologia e la climatologia che vegnan previsas da la confederaziun. Beneventadas vegnan cunzunt las simplificaziuns ch'èn planisadas tar la calculaziun da las taxas sco er la reducziun generala da las taxas per servetschs da MeteoSvizra. En sia resposta da consultaziun renda la regenza attent che la collavuraziun cun MeteoSvizra funcziunia fitg bain e che l'uffizi forestal sco post spezialisà per privels da la natira saja fitg cuntent cun las infurmaziuns e cun ils products purschids, e quai cunzunt en cas da malauras.

Da vischnancas e da regiuns
- Soazza: A la vischnanca da Soazza vegn concedida ina contribuziun da maximalmain 30'000 francs per revitalisar la zona umida Pomareda.
- St. Peter e Pagig: La cunvegna ch'è vegnida concludida ils 25 d'avrigl 2007 da las vischnancas da St. Peter e da Pagig per fusiunar las duas vischnancas a la nova vischnanca da St. Peter-Pagig vegn approvada.
- Farera e Calantgil: La cunvegna ch'è vegnida concludida il 1. da zercladur 2007 da las vischnancas da Farera e da Calantgil per fusiunar las duas vischnancas a la nova vischnanca da Farera vegn approvada.
- Says e Trimmis: La cunvegna da fusiun ch'è vegnida concludida ils 8 da matg ed ils 17 da zercladur 2007 da las vischnancas da Says e da Trimmis per fusiunar las duas vischnancas a la nova vischnanca da Trimmis vegn approvada.
- Ladir: Ils statuts da la vischnanca burgaisa da Ladir dals 8 da zercladur 2007 vegnan approvads.
- Igis: Ils statuts da la vischnanca burgaisa d'Igis dals 18 d'avrigl 2007 vegnan approvads.
- Glion: A la citad da Glion vegn dada la permissiun da manar (dal tuttafatg u per part en moda parallela u cumbinada) a partir da l'onn da scola 2008/09 en la scola primara tudestga almain ina classa bilingua (tudestg e rumantsch).
- Lumbrein: Sin la via da la Lumnezia vegn marcada la fracziun da Nussaus cun las tavlas "Nussaus (Lumbrein)" sco traject entaifer il vitg. Sin quest traject vegn introducida ina sveltezza maximala en il vitg da 50 km/h (limita generala).
- Vicosoprano: Sin la via dal Malögia entaifer il vitg da Vicosoprano vegn reducida la sveltezza maximala existenta da 60 km/h a 50 km/h (limita generala) en il sectur da la Val Torta tranter il spartavias da la punt Albigna e la villa Weber.
- Malans: Il plan da zonas 1:2'000 Karlihof (cumplettaziun da las parcellas nr. 874, Neugut-Tratt) da la vischnanca da Malans dals 22 da matg 2007 vegn approvà.
- Tinizong-Rona: Il plan da zonas 1:1'000 da la vischnanca da Tinizong-Rona dals 20 d'avrigl 2007 vegn approvà.
- Breil: Il plan da zonas 1:500 cumplettaziun da la lingia da distanza da las auas da la vischnanca da Breil dals 31 da matg 2007 vegn approvà.
- Susch: La revisiun parziala da la lescha da construcziun da la vischnanca da Susch ch'è vegnida concludida ils 24 da matg 2007 vegn approvada.
- Tujetsch: La revisiun parziala da la planisaziun locala da la vischnanca da Tujetsch ch'è vegnida concludida ils 13 da matg 2007 vegn approvada.
- Salouf: Il plan da zonas e plan general da furmaziun 1:1'000 Del da la vischnanca da Salouf dals 26 da mars 2007 vegn approvà.
- Cursa da velo "GP Tell": A l'organisatur da la cursa da velo "GP Tell" vegn concedida la permissiun d'utilisar la ruta da l'etappa Cuira - Arosa sco quai ch'igl è previs tenor il plan da traject.

Contribuziuns chantunalas a differentas instituziuns
- Center da sanadad d'Engiadina bassa: Al center da sanadad d'Engiadina bassa a Scuol vegn garantida ina contribuziun chantunala pauschala da totalmain 900'000 francs a favur da la gruppa da tgira "Prasas-chèr" cun nov persunas attempadas, e quai per ils emprims custs da l'equipament e dal mobigliar, per las adattaziuns architectonicas da las abitaziuns existentas sco er per ils custs da locaziun ch'èn imputabels mintga onn.
- ARGO, fundaziun "center grischun per lavuratoris e dimoras da persunas impedidas": A la ARGO, la fundaziun "center grischun per lavuratoris e dimoras da persunas impedidas", vegn garantida ina contribuziun da maximalmain 154'458 francs als custs per metter ensemen las abitaziuns da la gruppa d'abitar externa da la chasa da dimora da la ARGO a Tavau.
- Abitadi evangelic per persunas attempadas Masans: A l'abitadi evangelic per persunas attempadas Masans a Cuira vegn garantida ina contribuziun chantunala da maximalmain 170'000 francs per midar l'abitaziun da la pedella u dal pedel en quatter chombras da tgira singulas en la chasa Nussbaum.
- Uniun da las ludotecas dal Grischun: Per l'onn da gestiun 2007 survegn l'uniun da las ludotecas dal Grischun in sustegn da 20'000 francs.
- "Vialva. Teater per in public giuven 2007/2008": Al project "Vialva. Teater per in public giuven 2007/2008" vegn concedida ina contribuziun da deficit da maximalmain 8'460 francs.
- Trigon-film: A la trigon-film vegn concedida fin l'onn 2009 mintga onn ina contribuziun da maximalmain 8'074 francs.
- Pro Grigioni italiano: La retscha da publicaziun "Quaderni grigionitaliani" da la pro Grigioni italiano survegn ina contribuziun da maximalmain 8'000 francs per in artitgel davart il "oratorio di Sant'Anna" a Puschlav sco er per in numer monotematic davart il scriptur Grytzko Mascioni.
- Organisaziun "Jerusalem foundation": A l'organisaziun "Jerusalem foundation" a Turitg vegn concedida ina contribuziun unica da 7'600 francs per il project d'in "edifizi svizzer".
- Musica instrumentala da la Muntogna da Schons: A la musica instrumentala da la Muntogna da Schons vegn concedida ina contribuziun da maximalmain 7'000 francs per ina instrumentaziun parziala.
- Museum regiunal da la Surselva: Per il project "lavuratoris da museum" dal museum regiunal da la Surselva vegn concedida ina contribuziun unica da maximalmain 6'850 francs.
- Club da hockey Partenz-Signuradi: Per cumprar equipaments da goli survegn il club da hockey Partenz-Signuradi ina contribuziun da maximalmain 7'600 francs or dal fond da sport.

Projects da vias
La regenza ha approvà totalmain 18'830'000 francs per construir e per sanar ils suandants trajects da vias:
- colliaziun cun la via da l'Engiadina, Scuol - Tarasp: lavurs d'impressari, punt d'En, Vulpera
- via naziunala A13, sviament da Roveredo: lavurs d'impressari, punt provisorica, Sass Gross
- via naziunala A13: planisaziun e projectaziun da la punt dal Rain posteriur, Spleia vest

Gremi: regenza
Funtauna: rg chanzlia chantunala dal Grischun