La regenza grischuna è da l'avis ch'i na saja betg giustifitgà
d'installar ina finanziaziun speziala per il traffic aviatic. La taglia
da consum sin carburants d'aviuns en Svizra na vegn actualmain betg
utilisada a favur dal traffic aviatic, mabain va en il quint da las vias
ed en la cassa federala generala. Tenor l'avis da la confederaziun
cuntrafa la situaziun actuala al princip da l'autenticitad dals custs,
perquai ch'i vegnan adossads custs al traffic aviatic, dentant cun
duvrar ils retgavs correspundents per cuvrir ils custs dal traffic sin
via. Cun ina midada da la constituziun propona la confederaziun perquai
d'impunder en l'avegnir ils retgavs da la taglia sin cherosin a favur da
mesiras per la protecziun da l'ambient e da mesiras da segirezza en il
traffic aviatic. Tenor las indicaziuns da la confederaziun èn ids l'onn
2005 var 44 milliuns francs or dal traffic aviatic en la finanziaziun
speziala per il traffic sin via.
Sco quai che la regenza explitgescha en sia consultaziun, è ella
tuttavia conscienta da la gronda impurtanza che l'aviatica svizra ha per
l'economia publica. Cuntrari al traffic sin via vegnia il traffic
aviatic dentant engrevgià mo cun paucas taglias. Tenor la regenza vegn
privilegià il traffic aviatic gia oz, cumbain ch'el chaschuna custs
externs considerabels. Perquai è la regenza grischuna da l'avis ch'i na
saja objectivamain betg giustifitgà d'installar ina finanziaziun
speziala per il traffic aviatic. Plinavant renda la regenza attent
ch'ils chantuns èn participads als retgavs da la finanziaziun speziala
per il traffic sin via. Tras la perdita da 44 milliuns francs mancassan
meds finanzials er tar ils chantuns. Perquai supplitgescha la regenza il
cussegl federal da retrair quest project.
Declerà uffizialmain Jürg Michel sco cusseglier naziunal elegì
La regenza grischuna ha declerà Jürg Michel sco cusseglier naziunal
elegì per ils 5 da mars 2007, e quai a la plazza dal cusseglier naziunal
Duri Bezzola ch'è sa retratg anticipadamain. Tenor la lescha federala
davart ils dretgs politics sto la regenza chantunala declerar l'emprima
substituta u l'emprim substitut da la medema glista sco elegida resp.
sco elegì, sch'ina commembra u sch'in commember dal cussegl naziunal sa
retira avant la fin da sia perioda d'uffizi. A chaschun da las ultimas
elecziuns dal cussegl naziunal dals 19 d'october 2003 aveva il
cusseglier naziunal Duri Bezzola candidà sin la glista "PLD dal Grischun
- ils liberals". L'emprim substitut sin questa glista è Jürg Michel,
Grüsch, che ha cuntanschì la segunda plazza da glista suenter l'elegì.
Votaziun dals 11 da mars 2007 senza projects chantunals
La regenza grischuna ha prendì enconuschientscha dal fatg che
l'iniziativa dal pievel "Per ina cassa da malsauns unitara e sociala"
vegn suttamessa dumengia, ils 11 da mars 2007, a la votaziun dal pievel
sco project federal. A questas votaziuns na vegnan suttamess nagins
projects chantunals.
Da vischnancas e da regiuns
- Verdabbio: Il project "rempars cunter crudada da crappa Verdabbio"
da la vischnanca da Verdabbio vegn approvà. Per il project vegn
garantida ina contribuziun chantunala da 280'000 francs.
- RegioViamala: A la corporaziun regiunala regioViamala vegn
garantida ina contribuziun chantunala da 13'500 francs per actualisar
ils plans directivs da la Mantogna-Tumleastga e da Valragn sco er per
reunir quests plans al plan directiv Viamala.
- Alvaschagn: La revisiun parziala da la planisaziun locala da la
vischnanca d'Alvaschagn dals 25 d'avust 2006 vegn approvada.
- Panaduz: La revisiun parziala da la planisaziun locala da la
vischnanca da Panaduz dals 27 da november 2006 vegn approvada.
- Bever: La lescha davart las taxas da giasts e da turissem da la
vischnanca da Bever dals 12 da december 2006 vegn approvada da princip.
- St. Antönien: Il reglament per las zonas da protecziun ed il plan
da las zonas da protecziun a la scala 1:5'000 da la vischnanca da St.
Antönien dals 8 da matg 2006 vegnan approvads.
Contribuziuns chantunalas a differentas instituziuns
- Circus d'uffants Lollypop: Per ses program da l'onn 2007 survegn
il circus d'uffants Lollypop ina contribuziun chantunala en l'autezza da
30'000 francs.
- Teater da figuras Arcas: Per ses program da l'onn 2007 survegn il
teater da figuras Arcas, Cuira, ina contribuziun chantunala en l'autezza
da 25'000 francs.
- Museum da giugarets Angela Prader: Per far l'emprima
inventarisaziun dals objects survegn il museum da giugarets Angela
Prader, Tavau, in sustegn finanzial unic en l'autezza da maximalmain
11'250 francs.
Projects da vias
La regenza ha approvà totalmain 8'503'000 francs per construir e per
sanar ils suandants trajects da via:
- A28 via naziunala, colliaziun Landquart - Claustra/Selfranga:
acquist da terren per il sviament da Küblis
- A13 via naziunala, Grono - cunfin cun il chantun Tessin: acquist
da terren per il sviament da Roveredo
- H13 via taliana, Soazza - Pian San Giacomo: lavurs d'impressari,
Ponte Rivana 3
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun