Grazia a l'immigraziun da persunas da l'exteriur è il dumber da la
populaziun grischuna restà per la fin da l'onn 2006 sin il stadi da
l'onn precedent. Las naschientschas sa chattan anc adina sin il livel da
record bass da l'onn 2005. Cumpareglià cun l'onn 2000 è il dumber da
naschientschas sa reducì per in quart en il chantun Grischun.
La populaziun residenta dal chantun Grischun sa chattava ils 31 da
december 2006 cun 187'920 persunas minimalmain sur il stadi da l'onn
precedent (187'803). La populaziun dal Grischun è creschida minimalmain
per 0.1%, entant ch'ella è s'augmentada en tut la Svizra per 0.7%.
Entaifer il chantun è il dumber da la populaziun sa sviluppà en moda
differenta. Cun +2.4% è la regiun Calanca bain creschida il pli fitg;
cun stgars 800 abitantas ed abitants è ella dentant la regiun la pli
pitschna dal chantun Grischun. La reducziun la pli gronda da la
populaziun han stuì notar las regiuns Tavau (-0.7%), Val Müstair
(-0.7%), Surselva (-0.5%) e Puschlav (-0.5%).
Surpli d'immigraziun da l'exteriur e dumber pitschen da
naschientschas
Il dumber dals mortoris en il chantun (1'588) ha surpassà l'onn 2006
il dumber da las naschientschas (1'533). Perquai ch'igl èn vegnids a
star en il chantun Grischun dapli umans che umans che han bandunà il
Grischun, è la populaziun restada per saldo stabila. Quest surpli
d'immigraziun vegn chaschunà d'umans da pajais esters (+1'041). En la
cumparegliaziun interchantunala ha il Grischun pers 764 abitantas ed
abitants als auters chantuns. Cun 1'533 naschientschas durant l'onn 2006
è il dumber da naschientschas restà vinavant sin ses livel da record
bass (onn precedent: 1'528).
La quota da la populaziun estra
La quota da la populaziun estra en il chantun Grischun importa 14.4%
per la fin da l'onn 2006, entant che la media da la Svizra sa chatta tar
20.7%. En set chantuns da la Svizra sa chatta la quota da la populaziun
estra sut il livel dal Grischun.
Cun 20.9% èn las persunas ch'èn burgaisas da l'Italia anc adina la
gruppa la pli gronda da la populaziun estra residenta. Ina quota ch'è
quasi medem gronda han las persunas ch'èn burgaisas dal Portugal
(20.4%), respectivamain da la Germania (20.2%).
Circa trais quarts da la populaziun grischuna viva en vischnancas
che han dapli che 1'000 abitantas ed abitants
Cun 21 abitantas ed abitants è Purtagn la vischnanca la pli pitschna
dal chantun Grischun. En ulteriuras 29 vischnancas sa chatta il dumber
d'abitantas e d'abitants er sut 100 persunas. Questas 30 vischnancas u
14.5% da tut las vischnancas dal Grischun cumpiglian 1.0% da la
populaziun grischuna.
103 vischnancas - la mesadad da las vischnancas dal Grischun - han
in dumber d'abitantas e d'abitants tranter 100 e 499 persunas. En
questas 103 vischnancas vivan 14.0% da la populaziun grischuna.
29 vischnancas appartegnan a la classa da vischnancas cun ina
populaziun tranter 500 - 999 persunas. Uschia vivan 21'109 persunas u
11.2% da tut las Grischunas e da tut ils Grischuns en 14.0% da las
vischnancas dal Grischun.
La finala datti en il chantun Grischun 45 vischnancas (21.8% da tut
las vischnancas) che han ina populaziun cun dapli che 1'000 persunas.
Bundant trais quarts da la populaziun dal chantun Grischun è domiciliada
en questas vischnancas.
Gremi: uffizi per economia e turissem
Funtauna: rg uffizi per economia e turissem