La regenza ha classifitgà da nov las vischnancas grischunas tenor
lur forza finanziala per ils onns 2008 e 2009. Dapi l'ultima
classificaziun da la forza finanziala per ils onns 2006 fin 2007 dals 16
d'avust 2005 èn resultadas duas fusiuns da vischnancas, trais èn
previsas per il cumenzament da l'onn 2008. Il dumber da vischnancas sa
reducescha tras quai da 208 a 203. Correspundentamain sa mida er il
dumber da las vischnancas en las gruppas da forza finanziala ch'èn
pertutgadas da fusiuns da vischnancas. Cun excepziun da las midadas da
classa menziunadas ch'èn resultadas pervia da fusiuns da vischnancas,
vegnan spustadas ulteriuras 27 vischnancas en in'autra classa en
cumparegliaziun cun la classificaziun da la forza finanziala 2006 fin
2007. Questa valur è restada quasi identica visavi l'ultima calculaziun,
nua che 25 vischnancas avevan gì da midar classa. Tar set vischnancas sa
tracti d'ina nova classificaziun al cunfin da la gruppa da forza
finanziala vischina, nov vischnancas fan ina midada pervia d'ina
modificaziun da lur forza fiscala ed en tschintg cas datti ina midada
pervia da l'adattaziun dal pe da taglia. Ina vischnanca mida la
classificaziun pervia da ses basegn da finanzas supplementar. Tschintg
vischnancas vegnan messas en in'autra classa tras la procedura
excepziunala.
15 vischnancas cun 39'758 abitantas ed abitants s'avanzan en ina
gruppa da forza finanziala pli ferma, entant che 12 vischnancas cun
6'775 abitantas ed abitants appartegnan da nov ad ina gruppa pli debla.
La gronda differenza dal dumber d'abitantas e d'abitants sto vegnir
attribuida a la classificaziun da la citad da Cuira en la gruppa da
forza finanziala 1. Questa midada vegn a distgargiar las finanzas
chantunalas en il sectur da la gulivaziun da finanzas indirecta. Las
consequenzas da las ulteriuras midadas da classa vegnan a sa tegnair la
ballantscha, perquai che tar las vischnancas pli grondas vegnan Grüsch e
Poschiavo ad arrivar en ina gruppa pli ferma e Scuol vegn repartì en ina
gruppa pli debla.
Gremi: regenza
Funtauna: rg chanzlia chantunala dal Grischun