L'access a las geodatas dal chantun Grischun duai vegnir
simplifitgà, ed ellas duain pudair vegnir retratgas ad in pretsch anc
pli favuraivel. Pervia da quai ha la regenza grischuna avert la
consultaziun tar la revisiun parziala da l'ordinaziun davart las taxas
per retrair extracts e valitaziuns da la mesiraziun uffiziala.
Per che la publicitad possia trair a niz las geodatas, duai in post
central porscher las datas da basa da la mesiraziun uffiziala en moda
simpla ed oravant tut uschè favuraivla sco pussaivel. Per meglierar
marcantamain la valurisaziun da la resursa "geodatas" che na vegn per
gronda part betg utilisada è vegnida fundada la GeoGR SA per la fin da
schaner 2007. Vi da quella sa participeschan il chantun, l'uniun
d'inschigneras geometras e d'inschigners geometers dal Grischun ed il
circul grischun da planisadras e da planisaders. Sco center da geodatas
duai la GeoGR SA daventar il post da contact e da consegna central per
retrair sche pussaivel tut las geodatas dal chantun Grischun, en spezial
er las datas da la mesiraziun uffiziala. Correspundentamain sa
concentrescha la revisiun totala da l'ordinaziun davart las taxas per
retrair extracts e valitaziuns da la mesiraziun uffiziala a l'intent da
porscher da princip las datas da la mesiraziun uffiziala tras il center
da geodatas GeoGR SA. Ultra da quai èsi necessari d'adattar las taxas a
las relaziuns dal martgà e da las reducir vinavant cleramain. Uschia
duain vegnir gudagnads dapli clientella gronda sco er dapli utilisadras
ed utilisaders permanents.
Dals documents da consultaziun po vegnir prendì invista sin la
pagina d'internet dal departament da l'intern e da l'economia publica
(www.dvs.gr.ch). La consultaziun dura fin ils 2 da november 2007.
L'ordinaziun davart la protecziun da las vias da communicaziun
istoricas da la Svizra duai vegnir repassada
La regenza grischuna pretenda ch'il sboz da l'ordinaziun davart la
protecziun da las vias da communicaziun istoricas da la Svizra vegnia
repassà. Per il chantun Grischun cun ses numerus effectivs d'objects è
in inventari da las vias da communicaziun istoricas bain fitg impurtant,
scriva la regenza en sia consultaziun a la confederaziun. Ils interess
da la via sco infrastructura da traffic la pli impurtanta concernent la
prestaziun, tant da la Svizra sco er - en spezial - dal Grischun sco
chantun da muntogna cun sia gronda surfatscha vegnan dentant
restrenschids da questa protecziun planisada. Quai pudess per part
retardar u render nunpussaivel da mantegnair e d'engrondir en moda
ordinada il sistem da vias actual. Il dumber enorm d'objects en
l'inventari federal cuntegna il privel che l'ordinaziun vegnia
applitgada en moda abusiva.
Sch'il sboz da l'ordinaziun avess tuttina da vegnir acceptà,
pretenda la regenza ch'i vegnia applitgada in'optica restrictiva, sch'i
sa tracta d'integrar vias da traffic istoricas en l'inventari
correspundent. En spezial dastgan vegnir integradas en la glista mo
quellas parts da vias, tar las qualas la substanza istorica è anc bain
visibla.
La regenza s'exprima davart las disposiziuns executivas tar
la politica agrara 2011
La regenza grischuna è mo per part perencletga cun las disposiziuns
executivas tar la politica agrara 2011. Pervia da conclus parlamentars
èn las midadas proponidas sajan ils sbozs da las ordinaziuns dentant
main impurtantas che quellas ch'il cussegl federal aveva previs en sia
missiva tar la politica agrara 2011, ha la regenza punctuà en sia
consultaziun. En las numerusas singulas ordinaziuns sajan dentant bleras
regulaziuns da detagls degnas da vegnir midadas e cumplettadas.
Tranter auter chaschunan differentas disposiziuns dal pachet
d'ordinaziuns ina meglieraziun giavischada tar l'equiliber ecologic.
Tuttina ha il project tschertas mancanzas. Per l'ina vegnan prestaziuns
impurtantas per l'ecologia per part anc adina indemnisadas memia pauc.
Per l'autra èn ils pajaments directs liads mo marginalmain vi da
prestaziuns supplementaras. Tenor la regenza s'augmentan ultra da quai
ad in augmentar las pretensiuns a las puras ed als purs sco er lur
lavurs administrativas.
Quitads sa fa la regenza er pervia da la politica dals pajaments
directs da la confederaziun en il sectur da la cultivaziun dals ers
alpins. Ils ultims sis onns è la cultivaziun da graun en il Grischun sa
diminuì da 299 a 105 hectaras. Ina culpa essenziala per quai portan las
cundiziuns per retrair las contribuziuns per la consumaziun da pavel
setg. Pervia da las novas cundiziuns da la confederaziun per retrair las
contribuziuns che sa basan sin il dumber d'animals vegn la cultivaziun
dals ers alpins a svanir - fin sin il tirc - dal tuttafatg en il
Grischun. La regenza è persvasa che cun buna veglia possia vegnir
chattada ina buna soluziun sin plaun federal. La regenza è perencletga
cun la proposta che las controllas dals manaschis agriculs stoppian
vegnir coordinadas. Percunter refusa ella in'accreditaziun dals posts
chantunals che fan las controllas.
Ils custs per introducir il nov numer d'assicuranza da la AVS duain
vegnir surpigliads da la confederaziun
La regenza grischuna pretenda ch'ils custs per introducir il nov
numer d'assicuranza da la AVS duain vegnir surpigliads da la
confederaziun. L'introducziun è previsa per il 1. da fanadur 2008. En il
rom da l'armonisaziun dals registers e da la dumbraziun dal pievel che
sa basa sin il register gioga il nov numer d'assicuranza da la AVS ina
rolla essenziala, scriva la regenza en sia consultaziun davart la midada
da l'ordinaziun e davart il relasch da disposiziuns executivas en connex
cun il nov numer d'assicuranza da la AVS da la confederaziun.
En quest connex sa mussa ina stretga collavuraziun tranter l'uffizi
central da cumpensaziun e las autoritads svizras da stadi civil. Per
l'ina sa tracti d'annunziar naschientschas e mortoris a l'uffizi central
da cumpensaziun, per l'autra per manar ils novs numers d'assicuranza da
la AVS sco identificatur da persunas en il register federal da stadi
civil. Per tegnair en frain la lavur ed uschia er ils custs cunvegni
tenor la regenza da chattar ina soluziun automatica uschè extendida sco
pussaivel. Tut ils custs en connex cun l'introducziun da la nova moda
d'annunzia stoppian dentant vegnir surpigliads da la confederaziun,
pretenda la regenza. Il chantun n'è betg pront da pajar las adattaziuns
dals programs che custan bler sco er - supplementarmain - las resursas
da persunal en ils uffizis da stadi civil. Ultra da quai pretenda la
regenza che la lescha e che l'ordinaziun vegnian messas en vigur
cuminaivlamain per il 1. da fanadur 2008. I na saja betg imaginabel
d'introducir ils novs numers d'assicuranza da la AVS, avant ch'i hajan
gì lieu tests tar la procedura d'annunzia tranter l'uffizi central da
cumpensaziun e las autras instituziuns ed avant che la qualitad da la
procedura d'annunzia saja garantida.
Da vischnancas e da regiuns
Tujetsch: Il project "magasin da stalizzas" da la vischnanca da
Tujetsch vegn approvà. Als custs vegn garantida ina contribuziun da
maximalmain 133'280 francs.
Favugn: La revisiun parziala da la constituziun communala da la
vischnanca da Favugn, ch'è vegnida concludida a la votaziun a l'urna
dals 17 da zercladur 2007, vegn approvada.
Sent: La revisiun parziala da la planisaziun locala "Parkin Not dal
Mot" da la vischnanca da Sent dals 23 da matg 2007 vegn approvada.
Giuvaulta: La revisiun parziala da la planisaziun locala "Löser" da
la vischnanca da Giuvaulta dals 12 da december 2006 vegn approvada.
Contribuziuns chantunalas a differentas instituziuns
Tgira da monuments: Per fixar e per conservar en tut tschintg ruinas
da chastels e da baselgias ha la regenza deliberà contribuziuns en
l'autezza dad 1'044'000 francs. Questas contribuziuns èn previsas per la
ruina da baselgia San Gaudenzio a Vicosoprano-Casaccia, per la ruina dal
chastè Juvalt dadora a Giuvaulta, per la ruina Crap S. Parcazi a Trin,
per la ruina dal chastè Strassberg a Malix, per la ruina da l'anteriura
ovra da zavrar e da lavar da la chaltgera Schmelzra sco er da la ruina
Madlain sut.
Promoziun da la cultura: La regenza ha concedì contribuziuns da
totalmain 96'500 francs per promover set occurrenzas ed ovras
culturalas.
CI plazza da sport Glaris: Per construir da nov ina plazza da sport
a Tavau Glaris cun ina plazza da ballape, cun in implant da sigl en lung
e da bittar la culla sco er cun ina plazza da giugar per uffants survegn
la cuminanza d'interess "CI plazza da sport Glaris" ina contribuziun da
17'000 francs dal fond da sport.
Projects da vias
La regenza ha approvà totalmain 195'000 francs per construir e per
sanar il suandant traject da via:
- via naziunala A13: lavurs d'inschigneria d'electricitad dal guaud
da Cassana
Gremi: regenza
Funtauna: rg chanzlia chantunala dal Grischun