Il plan per il svilup dal guaud Lumnezia - Val S. Pieder è vegnì
concepì en ina lavur da dus onns sut la direcziun da l'uffizi forestal
dal Grischun tras l'inschigner forestal regiunal responsabel Bernard
Riedi. Il plan per il svilup dal guaud ha l'intent da mantegnair ils
interess publics per il guaud e procura ch'il guaud po vegnir utilisà en
moda persistenta er a lunga vista. El sa cumpona d'in model directiv e
dad otg fegls d'object cun plans correspundents.
Il model directiv cuntegna ils princips da la cultivaziun dal guaud
entaifer il territori da planisaziun. En ils otg fegls d'object ed en
ils plans appartegnents vegnan enumerads ils interess spezials ord vista
da la publicitad sco er las mesiras da cultivaziun che tutgan tiers. I
vegnan tractads pli detagliadamain ils suandants temas: protecziun
cunter privels da la natira, producziun da laina, protecziun da la
natira e da la cuntrada, recreaziun e turissem, agricultura, selvaschina
e chatscha, projects e basegn da coordinaziun.
A chaschun da l'occurrenza publica d'infurmaziun dals 25 da schaner
2007 a las 20.15 en l'aula da la chasa da scola a Vella vegn la gruppa
da planisaziun a preschentar il sboz da planisaziun ed en spezial a
renviar a las pussaivladads da cooperaziun da la publicitad.
Suenter l'occurrenza d'infurmaziun vegn il sboz da planisaziun
exponì publicamain en las vischnancas pertutgadas per prender posiziun.
Er tar l'uffizi forestal da la Surselva a Glion u tar l'uffizi forestal
dal Grischun a Cuira pon ins prender invista dal plan.
Sin fundament da las posiziuns ch'èn entradas vegn concepì - cun
cooperaziun dals circuls pertutgads - fin l'atun 2007 il plan definitiv
per il svilup dal guaud Lumnezia - Val S. Pieder. Quest sboz vegn alura
suttamess a las vischnancas ed a la regenza per l'approvaziun.
L'occurrenza d'infurmaziun è publica. La gruppa da planisaziun
s'allegra d'ina viva participaziun.
Persunas che dattan infurmaziuns:
- Bernard Riedi, inschigner forestal regiunal, tel. 081 920 06 86
- Riet Gordon, uffizi forestal, tel. 081 257 38 55
Gremi: uffizi forestal dal Grischun
Funtauna: rg uffizi forestal dal Grischun