Dal settember 2007 fin il mars 2008 ha lieu a Cuira, a Vaduz, a Herisau, a Son Gagl ed a Bregenz ina retscha d'occurrenzas davart la medischina tenor las schlattainas che sa cloma "sanadad feminina - masculina".
En il rom d'in project interregiunal e transcunfinal organiseschan ils biros d'egualitad dal Liechtenstein, da Son Gagl, da l'Appenzell dador, dal Grischun e dal Vorarlberg ina retscha d'occurrenzas sut il titel "medischina tenor las schlattainas". Questa retscha s'integrescha bain en l'onn europeic per l'egualitad da las schanzas 2007. La perscrutaziun medicinala vegn fatga dapi in pèr onns er sut la perspectiva da las schlattainas. Quai ha gì resultats interessants che vegnan preschentads e discutads en questa retscha d'occurrenzas.
Las dunnas ed ils umens sa differenzieschan numnadamain areguard lur corp, areguard il cumportament ch'è relevant per la sanadad ed areguard lur diever da la purschida medicinala. Las schanzas da viver saun e da survegnir il tractament medicinal adequat n'èn betg las medemas tranter las dunnas ed ils umens. Uschia è per exempel la raschun da mort la pli frequenta malsognas dal cor e da la circulaziun tar las dunnas. Las enconuschientschas davart ils medicaments e davart las terapias sa basan mo sin probands masculins ch'èn a la mesadad da lur vita. Dunnas ed umens pateschan egualmain da disturbis psichics, ma ils sindroms èn differents.
Ina vista specifica tenor las schlattainas ch'è er sensibla per las schlattainas gida a cuntentar ils basegns da sanadad da las dunnas e dals umens.
Mintga occurrenza da la retscha cumpiglia la preschentaziun d'in rapport da sanadad or da la perspectiva tenor las schlattainas sco er referats specifics davart disciplinas spezialas da la medischina. Per las tschintg occurrenzas han ins pudì engaschar sco referentas e sco referents expertas ed experts da l'Austria e da la Svizra che han in renum sin il champ da la medischina tenor las schlattainas u da la sanadad tenor las schlattainas. A chaschun d'in apero dattan las occurrenzas er la pussaivladad d'avair discurs interessants e scuntradas plain tensiun.
Il publicum da la retscha d'occurrenzas èn d'ina vart spezialistas e spezialists da la medischina, da l'autra vart umens e dunnas che s'occuppan en in senn pli vast da la politica da sanadad (prevenziun, administraziun, assicuranza e.u.v.). Er la publicitad interessada è envidada da visitar questa occurrenza.

Gremi: post da stab per l'egualitad da las schanzas
Funtauna: rg post da stab per l'egualitad da las schanzas