I vegn cuntinuà definitivamain cun il model da splitting da la scola professiunala Surselva a Glion e da la scola professiunala Cuira  

13.09.2007
La regenza grischuna ha approvà definitivamain il model da splitting da la scola professiunala Surselva a Glion e da la scola professiunala Cuira per l'instrucziun da furmaziun generala a partir da l'onn da scola 2008/09.
Il model da splitting è sa cumprovà en la fasa da project da sis onns ed il facit che vegn tratg è dal tuttafatg positiv. Circa dus terzs da tut las scolaras e da tut ils scolars da la scola professiunala Surselva èn scolaras e scolars che emprendan tenor il model da splitting. L'onn da scola 2006/07 eran quai 241 scolaras e scolars. Fin l'onn 2010 pon ins far quint che quest dumber da scolaras e da scolars restia sin quest nivel. Il model da splitting è ina da las mesiras ch'il chantun prevesa per rinforzar Glion sco lieu da scolaziun sin il stgalim secundar II.
Tenor il model da splitting vegnan las scolaras ed ils scolars, che han lur lieu d'emprendissadi en Surselva, tramess sche pussaivel a la scola professiunala Surselva a Glion per l'instrucziun da furmaziun generala, sch'ellas e sch'els abiteschan a Glion u en ina vischnanca da la Surselva che ha ina scola obligatorica rumantscha, e quai da Laax ensi. Sin ina dumonda en scrit po l'uffizi ultra da quai trametter emprendistas ed emprendists d'autras regiuns che discurran rumantsch en l'instrucziun bilingua a Glion.

La regenza s'exprima cunter mesiras pli rigurusas en il sectur da la responsabladad per chauns privlus
La revisiun parziala dal dretg d'obligaziuns che vegn proponida da la confederaziun en il sectur da la responsabladad per chauns privlus vegn refusada da la regenza grischuna. La confederaziun prevesa che persunas che tegnan chauns privlus duajan da nov vegnir suttamessas ad ina responsabladad da periclitaziun.
Questa proposta premetta che la confederaziun classifitgeschia ils chauns tenor categorias da privel. Ina tala categorisaziun possia dentant mo vegnir fatga sin basa da la razza u da la grondezza dal chaun. Tenor la regenza mussan las experientschas che la razza n'è betg en emprima lingia il criteri per giuditgar, sch'in chaun è privlus u betg. Anzi, las enconuschientschas ch'ins ha gudagnà en il Grischun sin basa d'incidents cun chauns dapi il matg 2006 mussan che la gronda part da las morsas è vegnida chaschunada en emprima lingia da bastards sco er - per ina part considerabla - d'animals ch'èn vegnids resguardads sco chauns da famiglia. Per la regenza è quest project da far pli severa la responsabladad generala da las possessuras e dals possessurs da chauns mo per ina tscherta razza ed - entaifer questa razza - mo per singuls tips plitgunsch naschì or d'in acziunissem politic che or d'ina necessitad reala. En Svizra valeva la responsabladad da periclitaziun numnadamain mo per privels spezials che n'èn betg bain dumagnabels, sco implants nuclears u vehichels a motor.
Er la varianta proponida d'extender la responsabladad da periclitaziun sin tut las possessuras e sin tut ils possessurs da chauns sco er da pretender in'assicuranza da responsabladad obligatorica refusa la regenza en sia consultaziun. Sche la responsabladad da periclitaziun vegniss extendida sin tut las possessuras e sin tut ils possessurs, stuess vegnir elavurada ina categoria d'excepziuns per chauns da polizia, per chauns da salvament e per chauns da protecziun. Plinavant pertutgass in'extensiun da la responsabladad en emprima lingia cas da bagatella, sco che las experientschas ch'ins ha fatg en il Grischun cun morsas da chauns mussan. Empè da quai èsi per la regenza pli raschunaivel da mantegnair la regulaziun vertenta ch'è pratitgabla e cunvegnenta.

Da vischnancas e da regiuns
- Schlarigna: La revisiun parziala dals statuts da la vischnanca burgaisa da Schlarigna, ch'è vegnida concludida ils 27 da zercladur 2007, vegn approvada.
- Vuorz: La revisiun parziala da la planisaziun locala da la vischnanca da Vuorz dal 1. da zercladur 2007 vegn approvada.
- Sta. Maria V.M.: La revisiun parziala da la planisaziun locala da la zona da mastergn "Bos-chetta" dals 3 da fanadur 2007 da la vischnanca da Sta. Maria V.M. vegn approvada.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun