La sanaziun dals stabiliments da sport al liber dal Sand a Cuira è finida. En il rom dals campiunadis d'atletica leva da las scolas medias grischunas vegn il stabiliment surdà uffizialmain ils 20 da settember a la scola chantunala grischuna.
La sanaziun dals stabiliments da sport al liber dal Sand è ina part da la sanaziun totala da la scola chantunala grischuna a Cuira. Per questa part ha il cussegl grond permess il december 2005 in credit d'impegn da 5,5 milliuns francs.
La part la pli veglia dal stabiliment da sport è vegnida construida gia l'onn 1947, in engrondiment hai dà l'onn 1978. Dapi il cumenzament hai adina puspè dà sanaziuns parzialas ed adattaziuns pli pitschnas. Pervia da la durada d'utilisaziun e perquai ch'igl è vegnì constatà che las plazzas diras e che las pistas da currer cuntegnan las substanzas nuschaivlas argient viv e zinc, èsi stà inditgà da far ina renovaziun cumplessiva. Il medem mument sco las lavurs da construcziun è vegnì sanà il chanal dal Mühlbach che cula sut ils stabiliments da sport or. Questas lavurs èn vegnidas fatgas en collavuraziun cun la citad da Cuira.
La societad renumada d'architectas e d'architects da cuntrada, la Rotzler Krebs e partenaris da Winterthur, è stada abla da meglierar l'utilitad dal stabiliment e da l'adattar a las pretensiuns che vegnan fatgas ozendi al manaschi da sport. Uschia èn vegnids creads dus secturs da sport al liber cun plazzas da rimnada. Sin ils champs da sport èn vegnidas ordinadas da nov las differentas disciplinas da sport, e las utilisaziuns èn vegnidas concentradas. Plantas dattan sumbriva e schluccan il stabiliment. L'aua da plievgia sfundra tras in sistem da drenascha e vegn manà - en cas da blera aua - en il Mühlbach. Suenter in temp da construcziun d'in onn ha la scola chantunala grischuna puspè a disposiziun in stabiliment da sport al liber cun funcziuns perfetgas.
Las scolaras ed ils scolars sco er las persunas d'instrucziun da gimnastica e da sport s'allegran fitg da dastgar surpigliar ils novs stabiliments da sport al liber dal Sand. Ils campiunadis da las scolas medias grischunas che han lieu gievgia, ils 20 da settember 2007, èn adattads perfetgamain sco occurrenza da sport per surpigliar uffizialmain il stabiliment. Da las 11.30 fin ca. las 12.15 pledan il cusseglier guvernativ Claudio Lardi sco er ulteriuras represchentantas ed ulteriurs represchentants da la politica, dal sport e da la furmaziun.

Gremi: uffizi da construcziun auta dal Grischun
Funtauna: rg uffizi da construcziun auta dal Grischun