Navigation

Inhaltsbereich

  • Erste Mitteilung
  • Neuen Beitrag einfügen
Quests dis trametta l'administraziun da taglia dal chantun Grischun ils quints da taglia provisorics 2006 da la confederaziun, dal chantun e per part er da las vischnancas e da las baselgias. Ils quints da taglia per il chantun pon vegnir pajads en duas ratas per la fin da favrer e per la fin d'avrigl. Ils quints per la taglia federala directa ston vegnir pajads fin la fin da mars.
Ils quints da taglia vegnan fatgs sin basa dals ultims facturs ch'èn disponibels. Tar la maioritad dals cas è quai la taxaziun definitiva per l'onn fiscal 2005. Quests facturs na pon quest onn dentant betg vegnir surpigliads senza midadas.
Per il 1. da schaner 2006 èn ils imports en francs indexads en la lescha da taglia, quai vul dir ch'els èn vegnids adattads a la chareschia. La consequenza da quai è che las deducziuns èn vegnidas augmentadas e che la tariffa da taglia s'augmenta main ferm. Cun questa indexaziun po vegnir cuntanschì ch'ils augments da las entradas che guliveschan mo la chareschia na chaschunan nagin augment da taglia. Per evitar ch'i vegnian tramess quints provisorics memia gronds e ch'il dumber da las restituziuns, che chaschunan blera lavur, s'augmentia èn vegnidas integradas duas correcturas.
Per tut las pajataglias e per tut ils pajataglias sco er per tut las suveranitads fiscalas (confederaziun, chantun e vischnancas) vegn applitgada la tariffa nova indexada. Ultra da quai vegnan reducids ils facturs da las entradas da la perioda precedenta per 1'000 francs tar la taglia chantunala e tar ina part da las vischnancas a favur da conjugals e da persunas che vivan sulettas cun uffants. Ina correctura tar las persunas che vivan sulettas chaschunass percunter ch'il quint provisoric fiss memia bass e ch'i dess - sco consequenza da quai - pretensiuns posteriuras pli grondas.
Nua ch'ils facturs da l'onn precedent na correspundan betg pli a las relaziuns da l'onn fiscal 2006 - quai che po per exempel esser il cas tar in pensiunament - pon las ed ils pajataglias sa drizzar a l'uffizi communal da taglia e pretender in quint provisoric ch'è vegnì adattà.
Ils quints da taglia provisorics vegnan fatgs da l'administraziun da taglia. Stampads e tramess vegnan els da l'uffizi d'informatica. Ils quints da la confederaziun e dal chantun sco er da las vischnancas (sche quellas e sche quels giavischan quai) pon vegnir mess en la medema cuverta e tramess cuminaivlamain. En quest connex impedeschan ils codes da stritgs prestampads ch'i dettia spediziuns faussas.
Per la spediziun actuala dals quints da taglia vegnan producids e mess en cuvertas 55'585 quints per la taglia federala, 116'465 quints per la taglia chantunala e 96'406 quints per las taglias communalas. Per quai vegnan duvradas circa 2,4 tonnas palpiri e 140'000 cuvertas.

Gremi: administraziun da taglia
Funtauna: rg administraziun da taglia
Neuer Artikel