Temas actuals sco er expertas ed experts excellents èn ils puncts
caracteristics dal 3. program da furmaziun supplementara dad update! da
grischun sport e da la SATE Cuira. Ils quatter curs han mintgamai lieu
la sonda en october e tractan tematicas da las tecnicas dal trenament
mental fin al consum da drogas. Ils moduls pon vegnir frequentads
independentamain in da l'auter e custan mintgamai 40 francs. Il public
en mira èn tut las persunas ch'èn interessadas vi dal sport.
Sonda, ils 6 d'october 2007 vegnan tractadas las "tecnicas dal
trenament mental". Il referent è Jörg Wetzel, psicolog da sport dal
swiss olympic team 2006. Las participantas ed ils participants emprendan
ad enconuscher facturs psicologics per il success e s'occupan pli
detagliadamain cun tecnicas mentalas e psicologicas. Il tema "prevenziun
- consum da drogas en il sport" stat en il center sonda, ils 13
d'october 2007. Gaudenz Bavier, cussegliader da project sco er scolast
da sport e manager da sport diplomà mussa tge che sto vegnir chapì sut
il consum da tissis enivrants e gida a tschertgar strategias da soluziun
cunter il consum da drogas en il sport.
Il curs "Trenament innovativ da la forza a l'exempel da l'ir cun
skis" da sonda, ils 20 d'october 2007 na sa drizza betg mo a skiunzas ed
a skiunzs. Il referent Tom Jäger, scolast da sport da Magglingen e
trenader diplomà da swiss olympic, maina las participantas ed ils
participants a Parpan en in clavà ch'è vegnì drizzà en sco local da
trenament da forza e pussibilitescha uschia in sguard davos las culissas
directamain sin la lavur cun las atletas e cun ils atlets. "La sien e
sia impurtanza per prestaziuns extraordinarias" è il tema central da
sonda, ils 27 d'october 2007. Prof. dr. Anna Wirz-Justice, chronobiologa
e perscrutadra da la sien a las clinicas psichiatricas universitaras da
Basilea declera tge ch'i capita en noss corp dal mument che nus ans
durmentain fin al mument che nus ans svegliain e tge impurtanza che quai
ha per l'abilitad da far prestaziuns sportivas. Suenter rapporta Andrea
Clavadetscher, champiun svizzer dubel da l'elita sin via e victur da la
"race across America" da las experientschas ch'el ha fatg sco sportist
extrem e suttastritga l'impurtanza da la regeneraziun per l'abilitad da
far prestaziuns sportivas.
Gremi: uffizi per la scola populara ed il sport
Funtauna: rg uffizi per la scola populara ed il sport