Navigation

Inhaltsbereich

  • Erste Mitteilung
  • Neuen Beitrag einfügen
Ils 14 da settember ha Herbert Bolliger, schef dal concern Migros, survegnì il premi principal da quest onn ch'è dotà cun 30 000 francs. Quel premi è vegnì surdà ad el da la Fundaziun Hans-Huber per ses engaschament persunal ed exemplaric areguard la promoziun da la furmaziun persunala. Il premi ha Herbert Bolliger regalà al project da furmaziun SCHANZA.
SCHANZA è in project dal Post da stab per l'egualitad da las schanzas. Il post s'engascha per la sensibilisaziun da magistras e magisters e da giuvenils per las medemas schanzas en la vita professiunala e da famiglia. La tscherna da la professiun e la planisaziun da la vita professiunala e persunala da las dunnas e dals umens giuvens sa differenziescha anc adina fitg ferm en il chantun Grischun e va per gronda part vias tradiziunalas. Las dunnas han dapli problems che umens da sa far valair en la vita professiunala, malgrà ch'ellas han per part meglras qualificaziuns. Ellas tschernan scolaziuns pli curtas, frequentan pli paucs curs da perfecziunament, han strusch posiziuns da cader e lavuran per gronda part a temp parzial pervia da la lavur da chasa e da famiglia. Ils umens giuvens da lur vart na tiran strusch en consideraziun la realitad da lur famiglia futura tar lur tscherna da la professiun e tar lur giavischs da carriera e s'orienteschan fitg ferm al model masculin existent. Uschia sa restrenschan domaduas schlattainas areguard lur avegnir sco dunnas da professiun e mammas u sco umens da famiglia e da professiun a moda nunnecessaria.
SCHANZA s'engascha per ina confruntaziun conscienta cun la dimensiun da las schlattainas areguard la tscherna da la professiun e la planisaziun da vita. Il project pussibilitescha dunnas ed umens giuvens da sa confruntar cun lur maletg da las rollas, da schlargiar lur spectrum da la tscherna da professiun, da formular lur giavischs da professiun e da famiglia e da discutar quests temas. SCHANZA vegn ad impunder ils daners regalads da signur Herbert Bolliger tranter auter per realisar meds d'instrucziun en tut las quatter linguas naziunalas e per il perfecziunament da la magistraglia.

Gremi: post da stab per l'egualitad da las schanzas
Funtauna: rg post da stab per l'egualitad da las schanzas
Neuer Artikel