Ussa pon umens e dunnas che han la tendenza da daventar violents envers auters umans sa laschar cussegliar tar il post da cussegliaziun per persunas violentas a Cuira. Cun las persunas che tschertgan agid vegnan sviluppadas metodas per dumagnar conflicts senza daventar violentas.

La regenza ha dà l'incumbensa a l'uffizi per l'execuziun giudiziala da stgaffir in post da cussegliaziun per persunas violentas. Mez settember 2007 ha quest post da cussegliaziun cumenzà cun sia activitad. Ad umens ed a dunnas dal chantun Grischun che han la tendenza da daventar violents u ch'èn gia daventads violents vegnan purschids agid ed in sustegn professiunal. Igl è facultativ da profitar da questa purschida. La finamira è quella da mussar vias or da la spirala da violenza a las persunas che tschertgan agid, e quai cun ina cussegliaziun speziala. Cun las persunas pertutgadas sviluppan las persunas cussegliadras metodas per dumagnar conflicts senza daventar violentas. Ellas lavuran faschond scuvridas e confruntaziuns. Las persunas cussegliadras sa basan sin l'ipotesa ch'in cumportament violent n'è betg ertà. La violenza è vegnida emprendida durant la socialisaziun individuala e/u po vegnir favurisada da facturs socials, economics e culturals. Pervia da quai po ella vegnir midada. Las cussegliaziuns èn gratuitas e natiralmain confidenzialas.

Il post da cussegliaziun po vegnir consultà durant las uras da biro e suenter ch'in termin è vegnì fixà. Ultra da quai stat a disposiziun ina cussegliaziun per telefon sut il numer 079 544 38 63, e quai er ordaifer las uras da biro. Ulteriuras infurmaziuns survegnan ins tar il post da cussegliaziun per persunas violentas, Gäuggelistrasse 16 / Brunnenhof, 7000 Cuira, tel. 079 544 38 63, gewaltberatungsstelle@gr.ch, www.ajv.gr.ch.

Il nov post da cussegliaziun per persunas violentas è ina part d'ina purschida da cussegliaziun pli vasta ch'exista gia. Dapi l'onn 2001 datti en il chantun Grischun in post da cussegliaziun per l'agid a victimas. Quai è in servetsch spezialisà da l'uffizi dal servetsch social chantunal dal Grischun che gida persunas sco er lur confamigliaras e lur confamigliars ch'èn pertutgads d'in act chastiabel. Intermediads vegnan agids medicinals, psicologics, socials, finanzials e giuridics. Sco ulteriura purschida maina il post da stab per l'egualitad da las schanzas dapi l'onn 2003 il project grischun d'intervenziun cunter violenza a chasa.

Gremi: uffizi per l'execuziun giudiziala
Funtauna: rg uffizi per l'execuziun giudiziala