Navigation

Inhaltsbereich

  • Erste Mitteilung
  • Neuen Beitrag einfügen
Ils purtaders dal premi grischun da cultura 2007 sa cloman Remo Maurizio ed Arnold Spescha. La regenza grischuna undrescha l'engaschament nunstanclentaivel e fitg qualifitgà da Maurizio en la perscrutaziun ed en la valurisaziun da l'ierta natirala, culturala ed artistica da la Bregaglia. Spescha survegn il premi da cultura en renconuschientscha da sia promoziun passiunada da la lingua e da la cultura rumantscha sco er da ses grond engaschament per la musica instrumentala en Svizra. Il premi è dotà mintgamai cun 20'000 francs.
In premi da renconuschientscha en l'import da 10'000 francs conceda la regenza ad Ernesto Conrad, a Jürg Conzett, a Giusep Giuanin Decurtins, a Gielia Degonda, a Peter Galliard, ad Ursula Luginbühl, a Dieter Matti ed a Leta Semadeni. Ernesto Conrad survegn il premi per ses engaschament cultural en la Val Puschlav, en spezial per la realisaziun dal "Museo d'arte Casa Console" ch'è deditgà a la pictura romantica ed en il qual han lieu er concerts da musica da chombra.
Jürg Conzett vegn distinguì per sia lavur d'inschigner creativa ed estetica, cun la quala el metta accents impurtants en la nova architectura grischuna e cun la quala el chatta gronda attenziun suror ils cunfins dal chantun.
Giusep Giuanin Decurtins survegn il premi da renconuschientscha per sias activitads sco promotur da nossa musica populara, particularmain da la musica da chor e da la musica instrumentala sco er da la musica classica. Gielia Degonda vegn undrada cun in premi en renconuschientscha da sia ovra da pictura e da gravura ch'è sensibla e ch'è vegnida creada cun ina perseveranza examinanta sco er en renconuschientscha da sias lavurs en il spazi public. Peter Galliard vegn distinguì per sias prestaziuns excellentas sco tenorist d'opera ed er per appreziar sia funcziun sco ambassadur dal Grischun en Germania. Ursula Luginbühl survegn il premi per il success da sia activitad sco pedagoga da ballet creativa ed universala. Dieter Matti survegn il premi en renconuschientscha da ses engaschament sin las spassegiadas d'art che gidan a far accessibels ils bains culturals dal Grischun e da las regiuns vischinas. Leta Semadeni vegn undrada la finala per sia ovra lirica impurtanta e per ses engaschament a favur da la lingua e da la cultura rumantscha.
In premi da promoziun da mintgamai 7000 francs survegnan: Gian-Andrea Attenhofer, cineast, Remo Caminada, artist visual, Silvana Castelberg, actura/cabarettista, Roman Flepp, raper, Carmen Gasser e Remo Derungs, designers/furmaders d'exposiziuns, Chasper-Curò Mani, chantadur, Christian Ratti, artist figurativ, Rico Stecher, paleontolog, Carla Trachsler, artista figurativa, sco er Jakob Zumbühl, designer da products. Ils premis vegnan surdads en il rom d'ina festa che ha lieu venderdi, ils 16 da november, a las 17.15 en la sala dal cussegl grond a Cuira.

La regenza sustegna l'iniziativa parlamentara cunter pseudo maridaglias
La regenza grischuna beneventescha ina iniziativa parlamentara che ha l'intent da scumandar pli consequentamain pseudo maridaglias. Il project prevesa da midar il cudesch civil svizzer e la lescha federala davart il partenadi registrà da pèrs da la medema schlattaina en quel senn, che spusas e spus da l'exteriur ston cumprovar lur dimora legala en la procedura da preparaziun per la maridaglia e ch'ils uffizis da stadi civil ston infurmar las autoritads estras, sche persunas che han l'intenziun da sa maridar dimoran illegalmain en Svizra. La regenza beneventescha medemamain ina iniziativa parlamentara che concerna la lescha davart il dretg da burgais e che propona da prolungar il termin per la decleranza d'annullaziun da natiralisaziuns da tschintg sin otg onns.
Sco quai che la regenza scriva en sia consultaziun, tangheschan domaduas iniziativas problems, cun ils quals èn confruntadas differentas autoritads regularmain en lur fatschentas quotidianas. Ils projects duain gidar en spezial a cumbatter ils abus en moda efficazia e consequenta.

La finanziaziun restanta previsa per las instituziuns da prevenziun da dretg public vegn beneventada
La regenza grischuna beneventescha la finanziaziun restanta da tut las instituziuns da prevenziun da dretg public che vegn proponida da la confederaziun. Sco las instituziuns da prevenziun da dretg privat duain obtegnair da princip er las instituziuns da prevenziun da dretg public ina finanziaziun restanta cumplaina. Perquai che differentas instituziuns da prevenziun da dretg public han anc adina mancanzas da garanzia, prevesa la confederaziun in termin da princip da 30 onns per la finanziaziun restanta. Durant quest termin duai esser permess il sistem da la chapitalisaziun parziala. Ultra da quai ston las instituziuns da prevenziun adattar durant quest temp lur strategia d'investiziuns a la finamira da la finanziaziun restanta.
Las differenzas tranter las instituziuns da dretg public e quellas da dretg privat na pon la finala betg vegnir acceptadas a lunga vista per motivs da la concurrenza. Tuttina giuditgescha la regenza il termin da 30 onns sco memia lung. E quai sin fundament da las experientschas ch'èn vegnidas fatgas en il Grischun, nua che la finanziaziun restanta da la cassa da pensiun chantunala - ch'era vegnida fixada oriundamain sin set onns - è vegnida terminada cumplainamain gia durant l'emprim onn (2005). Tenor la regenza èsi pli raschunaivel da formular finamiras intermediaras che ston vegnir resguardadas che da fixar in termin da 30 onns.

Da vischnancas e da regiuns
- Regiun Mesolcina: Ils statuts da la regiun Mesolcina vegnan approvads. Uschia entran en vigur ils statuts e la corporaziun regiunala Mesolcina survegn la persunalitad giuridica.
- Arosa: A la vischnanca d'Arosa vegn garantida ina contribuziun da maximalmain 641'287 francs per cumplettar e per engrondir la serenera d'Arosa.
- St. Peter: Als custs per construir il passape da la vischnanca da St. Peter vegn pajada ina contribuziun chantunala da maximalmain 541'108 francs.
- Laax e Falera: Il plan general d'avertura 1:5'000 indrizs d'ennavar da las vischnancas da Laax e da Falera dals 30 da mars 2007 respectivamain dals 20 d'avrigl 2007 vegn approvà cun cundiziuns.
- Tschappina ed Urmagn: Las revisiuns parzialas da las planisaziuns localas da las vischnancas da Tschappina e d'Urmagn concernent l'abitadi Aclas Beverin dals 10 da fanadur 2007 vegnan approvadas cun cundiziuns.
- Preaz: Il plan da zonas parzial 1:2'000 Crest digl Gion da la vischnanca da Preaz dals 26 da zercladur 2007 vegn approvà.

Contribuziuns chantunalas a differentas instituziuns
Tgira da monuments: Als custs per la segirada e per la conservaziun da la ruina dal chastè da Mesauc vegn pajada ina contribuziun da maximalmain 420'000 francs.
Chasa da persunas attempadas e da tgira "am Talbach" a Claustra: Per la sanaziun architectonica sco er per ina meglieraziun dals locals da cuschina da la chasa da persunas attempadas e da tgira "am Talbach" a Claustra vegn garantida a la fundaziun Flury da Schiers ina contribuziun chantunala da maximalmain 310'000 francs.
Chasa da persunas attempadas e da tgira Tumleastga a Farschno: Per la montascha da duschas en ils locals sanitars existents da las chombras da tgira al 2. plaun da la chasa da persunas attempadas e da tgira Tumleastga a Farschno vegn garantida a la fundaziun "chasa da persunas attempadas e da tgira Tumleastga" ina contribuziun chantunala da maximalmain 140'000 francs.

Projects da vias
La regenza ha approvà totalmain 207'000 francs per construir e per sanar il suandant traject da via:
- via naziunala A13: lavurs d'impressari e lavurs da cuvrida dal guaud da Cassana fin tar l'access da Nufenen

Gremi: regenza
Funtauna: rg chanzlia chantunala dal Grischun
Neuer Artikel