La regenza grischuna ha garantì ina contribuziun d'annualmain 1
milliun francs a l'uniun Grischun vacanzas per il project "Enavant
Grischun" che dura da l'onn 2007 fin l'onn 2010. Il project ha la
finamira da far anc pli enconuschenta la marca graubünden e d'augmentar
la dumonda per purschidas, per servetschs e per products turistics e
nunturistics. Planisada è ina campagna da communicaziun sin il martgà
svizzer che duai eventualmain - suenter il segund onn - vegnir extendida
sin il martgà da la Germania dal sid. Per la campagna da communicaziun
vegnan applitgads tranter auter inserats, reclamas en la televisiun e
mesiras en l'internet. La nova offensiva da reclama duai vegnir
lantschada la fin d'october.
Tenor l'ordinaziun per il svilup economic po il chantun conceder
contribuziuns a projects u ad instituziuns cun l'intent da promover e da
tgirar la marca regiunala graubünden, sche quests projects e sche
questas instituziuns correspundan a la strategia ed a las finamiras da
la marca. Ina contribuziun da 4 milliuns francs per ils onns 2007 fin
2010 para raschunaivla a la regenza. I vegn premess che las partenarias
e ch'ils partenaris confinanzieschian il project cun contribuziuns da
passa 2.5 milliuns francs. Per las contribuziuns dals onns 2008 fin 2010
èsi mintgamai resalvà al cussegl grond da conceder il credit. Per
realisar il project vegn il chantun a suttascriver ina cunvegna da
prestaziun cun Grischun vacanzas. La campagna da communicaziun è
integrada en il project da refurma "structuras cumpetitivas e
repartiziun da las incumbensas en il turissem grischun". En quest connex
duai er vegnir garantì che la marca graubünden vegnia duvrada
optimalmain da las organisaziuns per la gestiun da destinaziuns (OGD) e
da las organisaziuns turisticas futuras (OTF).
La procedura d'admissiun pli simpla al servetsch civil vegn
sustegnida
La regenza beneventa ils plans da la confederaziun da simplifitgar
la chara procedura d'admissiun vertenta al servetsch civil e da la
concepir en ina moda pli favuraivla. Da las trais variantas proponidas
preferescha la regenza la varianta "cumprova dal fatg 1.5", sco ch'ella
scriva en sia consultaziun tar la revisiun da la lescha federala davart
il servetsch civil e da la lescha federala davart la taxa d'exemziun dal
servetsch militar. En la varianta "cumprova dal fatg" prevesa il sboz da
revisiun che las persunas petentas inoltreschian en il futur mo pli ina
decleraziun. Lur prontezza da far in servetsch pli lung (1.5 u 1.8
giadas pli lung) ch'il servetsch militar tanscha per cumprovar lur
motivs da conscienza. Tenor la regenza gida questa varianta a reducir
ils custs da procedura. Ultra da quai porta ella resultats chapaivels e
gists.
La regenza na va percunter betg d'accord cun il fatg d'eliminar la
renconuschientscha dals dis da servetsch per calcular la taxa d'exemziun
dal servetsch militar sco ch'igl è previs en la lescha federala davart
la protecziun civila. En quest cas scrudass la reducziun vertenta da 4
pertschient per di da servetsch che vegn prestà. La regenza parta dal
fatg, che las appartegnentas e ch'ils appartegnents da la protecziun
civila vegnian strusch pli ad esser pronts d'absolver furmaziuns
supplementaras sco spezialistas e sco spezialists respectivamain da
surpigliar incumbensas directivas, sch'ils dis da servetsch
correspundents na vegnan betg pli mess a quint ad ellas ed ad els per
calcular la taxa d'exemziun dal servetsch militar. Questa eliminiaziun
avess pia - or da vista da la regenza - consequenzas gravantas per il
dumber da persunal da la protecziun civila.
La lescha davart la cassa da pensiun chantunala dal Grischun entra
en vigur il 1. da schaner 2008
La revisiun parziala da la lescha davart la cassa da pensiun
chantunala dal Grischun vegn messa en vigur per il 1. da schaner 2008.
Quai ha concludì la regenza grischuna.
Il cussegl grond aveva concludì la revisiun parziala da la lescha
davart la cassa da pensiun chantunala dal Grischun en la sessiun da
zercladur 2007. Il termin da referendum è scadì ils 19 da settember 2007
senza ch'i saja vegnì fatg in tal. Cun la revisiun parziala daventa la
cassa da pensiun chantunala dal Grischun independenta e survegn dapli
autonomia.
Da vischnancas e da regiuns
- Tusaun: La revisiun parziala da la planisaziun locala da la
vischnanca da Tusaun dals 11 da mars 2007 vegn approvada.
Projects da vias
La regenza ha approvà totalmain 1'195'000 francs per construir e per
sanar ils suandants trajects da vias:
- via naziunala A13: remplazzar ils ventilaturs en il tunnel d'Isla
Bella
- via naziunala A13: lavurs d'impressari, Pian San Giacomo -
Malabarba
Gremi: regenza
Funtauna: rg chanzlia chantunala dal Grischun