Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna ha approvà las trais cunvegnas davart las fusiuns da las vischnancas da St. Peter e Pagig a la nova vischnanca cun num St. Peter-Pagig, da las vischnancas da Trimmis e da Says a la nova vischnanca cun num Trimmis sco er da las vischnancas da Calantgil e da Farera a la nova vischnanca cun num Farera. La regenza ha deliberà las missivas correspundentas e dumonda il cussegl grond da metter en vigur las fusiuns per il 1.  da schaner 2008. Il cussegl grond vegn a tractar la fatschenta en la sessiun da december. Sch'il cussegl grond approvescha questas trais fusiuns, sa reducescha il dumber da las vischnancas grischunas per il 1. da schaner 2008 da 206 a 203.
Tenor l'artitgel 64 da la constituziun dal chantun Grischun promova il chantun la fusiun da vischnancas per garantir che lur incumbensas vegnian ademplidas en moda cunvegnenta ed economica. Ultra da quai po il chantun pajar contribuziuns per promover las fusiuns. La nova vischnanca da Trimmis survegn dal chantun ina contribuziun da promoziun en l'autezza da totalmain 2'800'000 francs. Per la nova vischnanca da St. Peter-Pagig importa la contribuziun da promoziun 2'575'000 francs e per la nova vischnanca da Farera è previsa ina contribuziun da 365'000 francs.

Gremi: regenza
Funtauna: rg chanzlia chantunala dal Grischun
Neuer Artikel