Il president da la regenza dr. Martin Schmid ha elegì Patricia Ganter Sonderegger sco incumbensada d'integraziun dal chantun Grischun. Patricia Ganter Sonderegger ha 49 onns. Ella cumenza sia plazza il 1. d'avrigl 2008.
Patricia Ganter Sonderegger ha studegià psicologia a l'universitad da Turitg e lavura gia blers onns tar l'uffizi federal da migraziun, actualmain en la partiziun "dretg da burgais, integraziun e contribuziuns federalas". Tar ses champ d'incumbensas tutgi tranter auter da collavurar tar la concepziun e tar la realisaziun da projects per l'integraziun professiunala da fugitivas e da fugitivs sco er da projects per mesiras d'integraziun e da projects per la concepziun da cunvegnas d'integraziun. Ultra da quai maina ella l'evaluaziun dals "emprendissadis per fugitivas e per fugitivs" che l'uffizi federal ha inizià. Sco responsabla per il project è ella cumpetenta per il sectur "sanadad" dal dretg d'asil e da persunas estras, e quai en reguard a l'elavuraziun da la strategia naziunala "migraziun e sanadad". Latiers tutga er la collavuraziun en gremis naziunals davart il tema "sanadad ed integraziun". Ils onns 1985 fin 1988 ha ella manà l'internat da mattas da la scola media alpina svizra da Tavau.
La plazza da l'incumbensada d'integraziun ch'è suttamessa a l'uffizi da fatgs da polizia e da dretg civil dal Grischun ha la regenza stgaffì da nov per realisar tut las incumbensas che resultan en il sectur da l'integraziun dal dretg da persunas estras e dal dretg d'asil. Las incaricas da l'incumbensada d'integraziun èn en spezial la coordinaziun da las mesiras d'integraziun e da la collavuraziun interdepartamentala, la cussegliaziun professiunala sco er il sustegn da posts administrativs involvids e da terzas persunas, la colliaziun ed il barat d'infurmaziuns e d'experientschas cun ils posts pertutgads sco er la lavur da publicitad en il sectur da l'integraziun.

Gremi: uffizi da fatgs da polizia e da dretg civil
Funtauna: rg uffizi da fatgs da polizia e da dretg civil