Il project grischun d'intervenziun cunter violenza a chasa s'engascha actualmain en il sectur da la scola. Per pudair dar dapli audienza a la consternaziun dals uffants sco perditgas e/u sco victimas da la violenza a chasa e per pudair infurmar las persunas d'instrucziun davart il tema da la violenza a chasa, è vegnida elavurada ina broschura d'infurmaziun per las persunas d'instrucziun ensemen cun la magistra primara Annalisa Schaniel. La broschura trilingua infurmescha davart las pussaivladads d'agir per las persunas d'instrucziun, davart las caracteristicas da la violenza a chasa, davart las consequenzas per ils uffants pertutgads, davart la situaziun giuridica actuala sco er davart ils posts spezialisads cumpetents en il chantun.

La broschura duai encuraschar las persunas d'instrucziun da prender serius ils indizis u ils suspects da violenza a chasa e da porscher in agid adequat als uffants ch'èn confidads ad ellas u a lur geniturs.

Per las persunas d'instrucziun interessadas ha lieu ils 27 d'october 2007 ina furmaziun supplementara che permetta da sa confruntar pli detagliadamain cun il tema da la violenza a chasa. Ulteriuras infurmaziuns sa chattan en la purschida da furmaziun supplementara da la scola auta da pedagogia a Cuira, www.phgr.ch. Annunzias piglia encunter la scola auta da pedagogia.

La broschura vegn tramessa a las autoritads da scola ed a las persunas d'instrucziun dal chantun Grischun. La broschura, sco er in fegl d'infurmaziun per ils geniturs ch'è vegnì redigì en nov linguas, pon vegnir retratgs gratuitamain tar il post da stab per l'egualitad da las schanzas, tel. 081 257 35 70. Da la pagina d'internet www.stagl.gr.ch pudais Vus chargiar giu la versiun electronica sin Voss agen computer.

Gremi: post da stab per l'egualitad da las schanzas
Funtauna: rg post da stab per l'egualitad da las schanzas