Il chantun Grischun amplifitgescha sias paginas d'internet en il rom da la strategia dad e-government. Sco emprim pass è vegnì mess en funcziun il 1. da november in nov portal per interpresas. En quel chattan interpresas - sin in sguard - infurmaziuns e purschidas ch'èn ordinadas tenor temas e ch'èn impurtantas per ellas.
Ad interpresas stat a disposiziun a partir d'immediat in nov servetsch en l'internet. Il portal per interpresas, ch'è vegnì mess en funcziun da nov dal chantun Grischun sut l'adressa www.unternehmen.gr.ch, porscha in catalog da temas ch'è organisà uschia ch'el pussibilitescha ad utilisadras ed ad utilisaders d'interpresas in access svelt ad infurmaziuns ed a purschidas impurtantas da l'administraziun. Uschia vegn simplifitgada la lavur per survegnir infurmaziuns sco er meglierada la survista sur da talas. Il catalog cumpiglia ils otg secturs tematics "plazza ed ambient", "traffic", "savida e furmaziun", "daners e promoziun", "lavur e fatgs socials", "fatgs internaziunals", "permissiuns" ed "infurmaziun e statistica". Ultra da quai èn avant maun infurmaziuns davart circa 70 chavazins ch'èn ordinads tenor l'alfabet. Plinavant cumpiglia la purschida links che mainan ad infurmaziuns impurtantas ed a posts da contact impurtants. Quest catalog da temas e da servetschs sa basa sin las directivas da la confederaziun e da ses gremis professiunals eCH ed eVanti.

Il portal per interpresas sco project da pilot
Il portal è vegnì sviluppà ensemen cun uffizis chantunals che han in contact viv cun interpresas. Latiers tutga en spezial l'uffizi per economia e turissem sco er l'uffizi chantunal per industria, mastergn e lavur. Ultra da quai è vegnì consultà in represchentant da l'economia grischuna. Il portal per interpresas vegn sviluppà vinavant pass per pass areguard la tecnica ed areguard il cuntegn. Cun il portal per interpresas sco project da pilot pon vegnir rimnadas emprimas experientschas praticas che pon esser utilas per l'installaziun d'auters portals.

Pagina d'internet senza barrieras
Avant ch'il nov portal per interpresas è vegnì mess en funcziun, è el vegnì examinà da l'organisaziun "access per tuts", sch'el n'haja propi naginas barrieras. Grazia a quest contact èn vegnidas prendidas mesiras che han meglierà cleramain il sistem. Avisà vegn il certificat per paginas d'internet senza barrieras sco resultat dal test uffizial che sa lascha realisar pir en il rom da l'ulteriur svilup dal portal da pilot. En la versiun finala duai la purschida online pudair vegnir duvrada - en accordanza cun la lescha davart l'egualitad dals impedids - cumplainamain er d'umans cun impediments.

Tut las paginas d'internet da l'administraziun chantunala vegnan unifitgadas en l'avegnir
La strategia dad e-government dal chantun Grischun prevesa da metter en il futur tut las paginas d'internet dals departaments, dals uffizis e dals posts da servetsch da l'administraziun chantunala sin ina plattafurma cuminaivla. Uschia vegn stgaffida la basa per ina cumparsa unitara e per ina integraziun directa dals servetschs. Da la meglra purschida d'internet duain pudair profitar en l'avegnir tut las burgaisas e tut ils burgais. L'onn che vegn èsi planisà da repassar pervia da quai il portal per burgaisas e per burgais.

Gremi: chanzlia chantunala dal Grischun
Funtauna: rg chanzlia chantunala dal Grischun