En il rom dal di svizzer da l'archiv avran sonda, ils 17 da november 2007, numerus archivs publics e privats lur portas. En il Grischun mussan l'archiv dal stadi dal Grischun, l'archiv da la citad da Cuira, l'archiv grischun per la cultura da las dunnas e la biblioteca chantunala ina tscherna da lur stgazis. Sut il tema "Archivà e betg emblidà" rendan els attents a lur impurtanza sco memoria da la societad e sco tradiders da nossa identitad.
Uschia preschenta l'archiv dal stadi documents d'architectas e d'architects or da ses magasins. L'archiv da la citad da Cuira mussa maletgs dal cumenzament da la fotografia a Cuira. L'archiv grischun per la cultura da las dunnas avra l'archiv privat d'ina magistra da lavur a maun da Churwalden che ha fatg servetsch militar en il servetsch auxiliar feminin durant la segunda guerra mundiala e ch'è viagiada a partir da l'onn 1951 tras il chantun Grischun sco inspectura da lavur a maun. Ed en la biblioteca chantunala vegnan la finala mussads films vegls.
Suenter l'onn 1997 e l'onn 2002 ha il di svizzer da l'archiv lieu per la terza giada e stat sut il patrunadi da l'uniun da las archivarias e dals archivaris svizzers (UAS). Al di svizzer da l'archiv vegnan mussads a las aspectaturas ed als aspectaturs localitads d'archiv e la moda da lavurar en ils archivs. Ils archivs intermedieschan tranter il passà e l'avegnir. Els reflecteschan la diversitad da l'existenza umana en il passà ed en il preschent ed han l'incumbensa da rimnar e da metter en salv oz quai ch'è dumandà e tschertgà puschmaun.

Uras d'avertura: da las 10.00 fin a las 16.00

• archiv dal stadi: stgazis da l'archiv e portas avertas, visitas guidadas a las 11.30 ed a las 14.30
• archiv da la citad da Cuira: exposiziun davart ils cumenzaments da la fotografia a Cuira e portas avertas
• archiv grischun per la cultura da las dunnas: visitas guidadas a las 10.00 ed a las 13.00 e pitschna exposiziun
• bibloteca chantunala: preschentaziuns da films a las 10.00, a las 12.00 ed a las 14.00

Gremi: archiv dal stadi
Funtauna: rg archiv dal stadi