Sut il presidi dal president da la cumissiun Ueli Bleiker ed en preschientscha dal president da la regenza Martin Schmid ha la cumissiun per politica da stadi e strategia dal cussegl grond (CPSS) predeliberà per mauns dal cussegl grond la missiva da la regenza tar l'iniziativa chantunala dal pievel "Cussegl grond: 80 bastan". Il cussegl grond vegn a tractar quest project durant la sessiun da december 2007.
Ils 25 da settember 2006 avevan las represchentantas ed ils represchentants dal comité d'iniziativa inoltrà ina iniziativa dal pievel cun 4'163 suttascripziuns valaivlas. Questa iniziativa era vegnida lantschada da la partida socialdemocratica. Tras l'iniziativa vulan las votantas sutsegnadras ed ils votants sutsegnaders reducir il dumber dals mandats dal cussegl grond dad actualmain 120 ad 80.
Sco che la regenza explitgescha en sia missiva, chaschunass ina sminuziun dal parlament ch'i na pudess betg pli vegnir tegnì quint sco oz da la diversitad dal chantun e da sias structuras regiunalas tar la cumposiziun dal parlament. La funcziun represchentativa dal parlament sco represchentanza dal pievel vegniss restrenschida. En ils egls da la regenza na s'imponi ultra da quai ni per motivs d'effizienza u da funcziunalitad ni per motivs da custs da reducir il dumber da las commembras e dals commembers dal parlament.
La cumissiun per politica da stadi e strategia suonda - suenter avair discutà l'iniziativa en moda intensiva - la proposta e l'argumentaziun che la regenza ha articulà en sia missiva, e s'exprima la finala cun otg cunter ina vusch cunter l'iniziativa dal pievel.

Gremi: cumissiun per politica da stadi e strategia
Funtauna: rg cumissiun per politica da stadi e strategia