La cumissiun predeliberanta dal cussegl grond ch'è vegnida nominada aposta per quest intent ha predeliberà per mauns dal cussegl grond la missiva da la regenza davart la sanaziun architectonica da la scola chantunala grischuna a Cuira, colliaziun tranter l'areal "Plessur" e l'areal "Halde". La cumissiun vegn presidiada dal deputà Jann Hartmann. A la sesida è sa participà er il cusseglier guvernativ Stefan Engler, schef dal departament da construcziun, traffic e selvicultura.
A chaschun da la sessiun da zercladur 2006 aveva il cussegl grond concludì da sanar la scola chantunala Halde. A medem temp ha il cussegl grond incumbensà la regenza d'elavurar in project separà per ina colliaziun che correspunda als basegns da las persunas cun impediments tranter las duas scolas "Plessur" e "Halde".
La colliaziun tranter la scola chantunala Halde e l'areal "Plessur" exista oz mo sin la St. Luzistrasse ch'è fitg stretga. Questa via cuntegna privels per las scolaras e per ils scolars, ella dovra bler temp, e persunas cun impediments d'ir a pe n'èn praticamain betg ablas da superar independentamain quest traject. Pir ina colliaziun directa tranter las duas scolas empermetta da meglierar la segirezza per tut las scolaras e per tut ils scolars e pussibilitescha a persunas cun impediments d'ir a pe da tut temp ed or d'atgna forza l'access a l'entir areal da scola.
La cumissiun è sa fatschentada detagliadamain dal project e da la necessitad da construir ina colliaziun tranter la duas scolas che correspunda als basegns da las persunas cun impediments. Ella è arrivada unanimamain a la conclusiun che la varianta d'ina colliaziun, sco ch'ella vegn recumandada en la missiva, augmentia d'ina vart considerablamain la segirezza dal traffic per las scolaras e per ils scolars e ch'ella saja da l'autra vart l'unica pussaivladad realisabla, sch'ins vul tegnair quint da l'egualitad da las persunas cun impediments che vegn pretendida en la lescha. La cumissiun ha giuditgà che la mesira che vegn proponida, d'eliminar ils impediments architectonics, saja proporziunada e giustifitgada er areguard ils custs totals ch'èn previs per sanar la scola chantunala grischuna. Ils custs previsibels per construir la colliaziun vegnan stimads cun 5.8 milliuns francs.
Il cussegl grond vegn a tractar quest project durant la sessiun da december 2007.

Gremi: cumissiun predeliberanta da la scola chantunala grischuna
Funtauna: rg cumissiun predeliberanta da la scola chantunala grischuna a Cuira