Il chantun Grischun sustegna il project dal parc naziunal "Parc Adula". La regenza grischuna ha garantì a la cumissiun da direcziun "Parc Adula" ina finanziaziun da partenza en l'import da 150'000 francs per la perioda fin l'onn 2010. La creaziun d'in segund parc naziunal dat la schanza - dal puntg da vista da la regenza - da promover l'attenziun per ina regiun ch'è fitg adattada per quest intent, sch'ins considerescha ses potenzial da territoris natirals. Il project vegn sustegnì er da la confederaziun cun in import da 400'000 francs.
Ils meds chantunals vegnan dads libers cur ch'ina confinanziaziun correspundenta tras il chantun Tessin è vegnida decidida. Ultra da quai vegni supplitgà a las iniziantas ed als iniziants dal project da garantir ina coordinaziun cun ils parcs existents sco er cun ils parcs novs e cun ils parcs planisads. In studi da realisabladad ha mussà che las premissas per crear in parc naziunal sajan da princip dadas. Las executivas da las 28 autoritads communalas ch'èn pertutgadas dal perimeter territorial han concludì unanimamain da sa participar al project.

Da vischnancas e da regiuns
- Mastrils: Cun resalva d'ina contribuziun federala da 48 pertschient vegn garantida ina contribuziun chantunala da 1'948'800 francs als custs imputabels da la meglieraziun generala da Mastrils da 5'800'000 francs.
- Arosa: Resalvà la finanziaziun definitiva, vegn garantì a la vischnanca dad Arosa in credit d'agid d'investiziun da la confederaziun senza tschains da maximalmain 3.5 milliuns francs per la renovaziun e per l'engrondiment da la halla da glatsch dad Arosa. Il chantun paja ina contribuziun da maximalmain 589'188 francs.
- Küblis: La revisiun parziala da la constituziun communala da la vischnanca da Küblis, ch'è vegnida concludida da la radunanza communala dals 26 d'october 2007, vegn approvada.
- Panaduz: La revisiun parziala da la planisaziun locala "Vicrusch" da la vischnanca da Panaduz dals 10 da settember 2007 vegn approvada.

Projects da vias
La regenza ha approvà totalmain 1'330'000 francs per construir e per sanar ils suandants trajects da vias:
- via naziunala A13: lavurs da mesiraziun per il sviament da Roveredo
- via naziunala A13: direcziun generala dal project tunnel dal San Bernardin
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun