Il chantun Grischun sustegna la domiciliaziun definitiva e la
constituziun d'in center da perscrutaziun per nanomedischina a
Landquart. Quai è il center svizzer d'electronica e da microtecnologia
SA (CSEM). Sin fundament da la lescha per promover il svilup economic en
il chantun Grischun ha la regenza garantì contribuziuns da promoziun al
CSEM.
Il CSEM cun sedia a Neuchâtel è vegnì fundà l'onn 1984. D'in
institut da perscrutaziun da l'industria d'uras è el sa transfurmà en
ina cumbinaziun da perscrutaziun e da svilup ed ha obtegnì renum
internaziunal, cunzunt per la transmissiun da savida or da la
perscrutaziun da basa en la realisaziun industriala.
Il center da perscrutaziun ch'è vegnì planisà dal CSEM e che vegn a
s'occupar en spezial da la nanomedischina, duai vegnir domicilià
definitivamain a Landquart, suenter che la fasa da test è terminada cun
success. Igl è previs ch'il center da perscrutaziun survegnia ulteriuras
prestaziuns da sustegn dal maun public a partir da l'onn 2012 er suenter
la fasa da constituziun. La regenza parta dal fatg che la domiciliaziun
definitiva dal center da perscrutaziun vegnia ad avair in grond niz per
l'entira Val dal Rain alpin e per l'entira regiun. Ultra da porscher 35
fin 45 plazzas da lavur fitg qualifitgadas per la perscrutaziun en il
center, vegnan qua er instruidas spezialistas e spezialists per
l'industria regiunala, ed i vegn sviluppada ina nova auta tecnologia
directamain al lieu. Plinavant augmenta il renum internaziunal dal CSEM
la schanza ch'i vegnian a sa domiciliar ulteriuras firmas d'auta
tecnologia en la regiun. Il center vegn sustegnì er da la regenza dal
principadi da Liechtenstein.
La realisaziun da la NGF en il Grischun entra en vigur sco
planisà il cumenzament da l'onn 2008
Perquai ch'il cussegl federal metta en vigur per il 1. da schaner
2008 tut ils relaschs che stattan en connex cun la nova concepziun da la
gulivaziun da finanzas e da la repartiziun da las incumbensas (NGF), po
la NGF vegnir introducida e realisada er en il chantun Grischun tenor
plan e confurm a las reglas. La regenza grischuna ha perquai concludì da
metter en vigur per il 1. da schaner 2008 la lescha generala per
realisar la NGF en il Grischun ch'il cussegl grond ha approvà ils 18
d'avrigl 2007. Il termin da referendum è scadì il 1. d'avust 2007 senza
ch'i saja vegnì fatg in tal.
En connex cun la realisaziun da la NGF en il chantun Grischun ha la
regenza ultra da quai revedì u redigì da nov sis ordinaziuns. Da nov èn
vegnidas relaschadas l'ordinaziun per promover l'integraziun da persunas
creschidas cun impediments sco er l'ordinaziun davart la scolaziun
speziala. Revedidas èn vegnidas las disposiziuns executivas tar la
lescha chantunala davart las prestaziuns supplementaras, las
disposiziuns executivas tar la lescha davart la construcziun
d'abitaziuns socialas e la meglieraziun da las relaziuns d'abitar en il
territori da muntogna, l'ordinaziun davart las vias dal chantun Grischun
sco er l'ordinaziun davart il traffic public.
La NGF è la refurma federalistica la pli gronda dapi ch'il stadi
federal exista. La gulivaziun da finanzas vegn rinforzada e differentas
incumbensas tranter la confederaziun ed ils chantuns vegnan
detretschadas. Il chantun grischun survegn cleramain dapli meds
finanzials che n'èn betg liads vi d'intents specifics ed uschia er dapli
libertad d'agir.
Tschernì il cussegl da la fundaziun grischuna per innovaziun,
svilup e perscrutaziun
Sco commembras e sco commembers dal cussegl da fundaziun da la
fundaziun grischuna per innovaziun, svilup e perscrutaziun ha la regenza
elegì prof. dr. Roman Boutellier, Oberegg, Bettina Plattner-Gerber,
Zuoz, prof. dr. Peter Rieder, Greifensee, dr. Johannes Randegger,
Bettingen, sco er dr. Ruedi Minsch, Tumein. Sco president dal cussegl da
fundaziun è vegnì nominà prof. Boutellier. El è professer per tecnologia
ed innovaziun al departement of management, technology and economics da
la scola politecnica federala (SPF) da Turitg. La fundaziun ch'è dotada
cun 30 milliuns francs dals retgavs extraordinaris da la banca
chantunala grischuna vegn a cumenzar cun sia activitad il schaner 2008.
La finamira da la fundaziun è quella da rinforzar e da sviluppar
vinavant il Grischun sco lieu economic, sco lieu da scolaziun e sco lieu
da perscrutaziun, e quai ensemen cun interpresas da l'economia e cun
autras instituziuns.
La regenza gratulescha a las participantas ed als participants dals
campiunadis mundials da mastergns en il Giapun
La regenza grischuna ha gratulà als trais participants dal Grischun
per lur success als 39avels campiunadis mundials da mastergns 2007 en il
Giapun. Sco tschentaplattas ha Mirko Tschenett da Müstair gudagnà ina
medaglia d'aur. Il predicat "excellent" han survegnì Marco Petschen,
Trun, sco vernischader d'autos, sco er Diego Poltera, Tinizong, sco
fresader CNC. En las gratulaziuns renviescha la regenza a questas
prestaziuns excellentas che fan resortir il sistem dual da la furmaziun
professiunala e ch'èn da gronda impurtanza per l'economia. Che er ina
scola pitschna ademplescha las pretensiuns ad ina scolaziun moderna,
cumprova il resultat grondius da Mirko Tschenett che ha frequentà la
scola industriala Val Müstair da l'utilitad publica da la Val Müstair.
Quai è numnadamain la scola professiunala la pli pitschna da la Svizra.
La lescha davart la furmaziun professiunala e davart purschidas da
furmaziun cuntinuanta vegn messa en vigur per il cumenzament da l'onn
nov
La lescha chantunala davart la furmaziun professiunala e davart
purschidas da furmaziun cuntinuanta vegn messa en vigur per il 1. da
schaner 2008. Quai ha concludì la regenza grischuna. Il cussegl grond
aveva approvà la lescha ils 17 d'avrigl 2007. Il termin per il
referendum facultativ è scadì il 1. d'avust 2007 senza ch'i saja vegnì
fatg in tal. Cun questa lescha vegn realisada sin plaun chantunal la
nova legislaziun federala davart la furmaziun professiunala. Quest
relasch serva dentant er a realisar la nova concepziun da la gulivaziun
da finanzas e da la repartiziun da las incumbensas (NGF).
Relaschà in'ordinaziun tar la lescha federala davart ils
profils dal DNA
La regenza grischuna ha relaschà in'ordinaziun tar la lescha
federala davart ils profils dal DNA. Quella entra en vigur il 1. da
schaner 2008. Quai è necessari pervia da la lescha federala davart
l'utilisaziun dals profils dal DNA en la procedura penala e per
identifitgar persunas nunenconuschentas u sparidas ch'è entrada en vigur
il 1. da schaner 2005. En l'ordinaziun vegn determinà d'ina vart il post
chantunal che annunzia, cur che profils ston vegnir stizzads. Questa
incumbensa surpiglian ils servetschs per la tecnica criminala da la
polizia chantunala dal Grischun. Da l'autra vart vegnan determinads ils
posts responsabels e las autoritads che mainan las proceduras e che ston
annunziar al post central, cur ch'ils profils correspundents ston vegnir
stizzads.
Relaschà l'ordinaziun tar la lescha introductiva tar
l'intermediaziun da lavur e tar l'assicuranza cunter la dischoccupaziun
La regenza grischuna ha relaschà in'ordinaziun tar la lescha
introductiva tar l'intermediaziun da lavur e tar l'assicuranza cunter la
dischoccupaziun. Quella regla las cumpetenzas en il sectur da
l'intermediaziun publica e privata da lavur. L'uffizi cumpetent è
l'uffizi chantunal per industria, mastergn e lavur. Il medem mument ha
la regenza relaschà in nov reglament per la cassa da dischoccupaziun. Il
reglament e l'ordinaziun entran en vigur suenter l'approvaziun tras la
confederaziun.
La regenza refusa l'iniziativa parlamentara per campagnas da
votaziun gistas
La regenza grischuna refusa l'iniziativa parlamentara per campagnas
da votaziun gistas. Cun il project per ina "lescha federala davart la
cooperaziun da las partidas a la furmaziun da l'opiniun e da la voluntad
dal pievel" duai vegnir stgaffida la basa legala per introducir - avant
votaziuns federalas - temps d'emissiun gratuits per reclamas politicas
da partidas politicas sco er per comités d'iniziativa e per comités da
referendum. Sco che la regenza explitga en sia consultaziun, è ella da
l'opiniun che "fairness" en campagnas da votaziun na possia betg vegnir
prescritta cun ina lescha.
Approvà la renunzia d'introducir l'iniziativa populara
generala
La regenza approvescha la proposta d'ina iniziativa parlamentara da
renunziar a l'introducziun da l'iniziativa populara generala.
Instruments da la democrazia directa stoppian esser concepids en moda
simpla e transparenta, menziunescha la regenza en sia consultaziun. Igl
è sa mussà che la legislaziun executiva davart la regulaziun da la
procedura tar l'iniziativa populara generala è cumplitgada,
nunsurvesaivla ed uschia betg chapaivla per las burgaisas e per ils
burgais. Perquai che la procedura na sa lascha betg simplifitgar en moda
raschunaivla, n'è l'incumbensa constituziunala pia betg realisabla. La
consequenza da quai è ch'ella duai ussa vegnir retratga.
Da vischnancas e da regiuns
- Aglomeraziun da Cuira: Las adattaziuns dal plan directiv chantunal
2000 (PDChant) che ston vegnir fatgas en ils secturs "abitadi" e
"traffic" pervia dal program da l'aglomeraziun da Cuira vegnan
concludidas e decleradas sco liantas per las autoritads dal chantun
Grischun.
- San Vittore: Premettend che la finanziaziun totala reusseschia, vegn
garantì a la vischnanca da San Vittore in credit d'agid d'investiziun
senza tschains da la confederaziun dad 1'000'000 francs per la segunda
etappa da l'avertura da la zona industriala da San Vittore. Il chantun
paja ina contribuziun da maximalmain 168'339 francs.
- Mesauc: Premettend che la finanziaziun totala reusseschia, vegn
garantì a la vischnanca da Mesauc in credit d'agid d'investiziun senza
tschains da la confederaziun da 460'000 francs per construir la nova
patinera artifiziala dal center sportiv San Bernardino. Il chantun paja
ina contribuziun da maximalmain 77'436 francs.
- Vaz: A la vischnanca da Vaz vegn garantì in credit d'agid
d'investiziun senza tschains da la confederaziun da 440'000 francs per
engrondir il stgaudament da la corporaziun da chalur "Dieschen". Il
chantun paja ina contribuziun da maximalmain 74'069 francs.
Contribuziuns chantunalas a differentas instituziuns
- Südostschweiz radio/TV SA: A la Südostschweiz radio/TV SA vegn
garantida ina contribuziun da 326'000 francs per l'infrastructura da
derasaziun da radio grischa. La premissa è che la finanziaziun totala
reusseschia e che la concessiun dal departament federal per ambient,
traffic, energia e communicaziun vegnia resguardada sco er ch'ils
projects pertutgads vegnian approvads da l'uffizi federal da
communicaziun.
- Südostschweiz newmedia SA: A la Südostschweiz NewMedia SA vegn
garantida ina contribuziun chantunala unica da maximalmain 69'750 francs
per realisar l'emprima fasa dal project da cooperaziun
"graubuendenTV.com". Il project ch'è ina cooperaziun intermanaschiala da
la tele Südostschweiz, da la Südostschweiz NewMedia SA, da Grischun
vacanzas, da la scola auta da tecnica ed economia da Cuira e da la
viafier retica ha l'intent da producir contribuziuns da video turisticas
multimedialas per la plattafurma turistica dal Grischun sin l'internet.
- Teater da figuras Arcas, Cuira: Per ses program da l'onn 2008
survegn il teater da figuras Arcas, Cuira, ina contribuziun chantunala
en l'autezza da 20'000 francs.
- Tom da funtaunas da dretg da la "lia da las diesch dretgiras": A la
fundaziun da funtaunas da dretg da la societad svizra da giuristas e da
giurists vegn admessa ina contribuziun da 10'000 francs per la stampa
dal tom da funtaunas da dretg da la "lia da las diesch dretgiras".
Projects da vias
La regenza ha approvà totalmain 665'000 francs per construir e per
sanar ils suandants trajects da vias:
- via naziunala A13: augment da la segirezza en il tunnel
d'Isla Bella.
- via sursilvana da la vart dretga dal Rain: lavurs d'impressari
Underhof - bifurcaziun Stussavgia
Gremi: regenza
Funtauna: rg chanzlia chantunala dal Grischun