Il fanadur 2007 èsi vegnì cumenzà cun las lavurs cumplessivas per sanar la scola chantunala Halde a Cuira. Durant ils mais d'enviern 2007/2008 vegn la fatschada da l'edifizi principal ad esser cuvrida pervia da las lavurs da sanaziun. Quest plazzal grond è situà en in lieu prominent, la fatschada cuvrida è bain vesaivla da differents quartiers da la citad anora. Pertge betg far transitoricamain or da la cuverta excepziunala da quest edifizi ina culissa u ina taila da projecziun? L'uffizi da construcziun auta dal Grischun, la scola chantunala grischuna e l'interpresa generala Implenia SA porschan - en collavuraziun cun il local d'art Sandra Romer - a la populaziun da Cuira in accumpagnament optic d'in gener dal tuttafatg spezial durant il temp d'advent: In project temporar d'art a l'edifizi envida las aspectaturas ed ils aspectaturs ad in viadi misterius tras in mund fictiv ed inspirà da Nadal.

L'artista Ursula Palla che deriva da Cuira mussa dal 1. da december fin a Bavania ina projecziun da video plain sentiments sin la gronda surfatscha da la fatschada principala da la scola chantunala Halde. L'istorgia che Ursula Palla quinta ed interpretescha en moda actuala cun ses maletgs sa basa sin la paraula da Nadal "La mattetta cun ils zulprins" da Hans Christian Andersen. Sco en la paraula tracta er questa istorgia moderna che vegn mussada qua d'in viadi imaginar d'ina mattetta che - inspirada da la glisch e da la chalur che deriva da questa glisch - scuntra in mund fantastic e mistic-fictiv. Durant var 20 minutas po l'aspectatura u l'aspectatur far quest viadi sensual e scuvrir per sasez - sumegliantamain a la mattetta en la paraula - grazia a la forza da l'imaginaziun in nov mund individual da maletgs.

Cuntrari a la versiun originala n'ha l'istorgia dad Ursula Palla betg ina fin trista. Anzi, sia protagonista turna dal mund virtual en il mund real, numnadamain en l'edifizi da scola. Cun quests maletgs creescha l'artista ina bella metafra: La scola n'è betg mo il lieu da l'emprender e da la disciplina, mabain er il lieu da la fantasia e dals siemis. Sin in ulteriur nivel simbolic tracta Ursula Palla alura er il tema "plazzal" en in senn real sco er en in senn figurativ: Per l'ina accumpagnain nus la mattetta opticamain sin ses viadi tras l'edifizi. Per l'autra è er la scola in plazzal permanent, schebain sin in nivel pedagogic.

Gremi: uffizi da construcziun auta dal Grischun
Funtauna: rg uffizi da construcziun auta dal Grischun