En l'avegnir duain vegnir dismess tut ils ruments chasans combustibels dal Grischun sche pussaivel en il stabiliment per arder ruments a Trimmis. Excepziuns per cas che pon vegnir motivads cun criteris ecologics ed economics èn pussaivlas. Quai prevesa il sboz da la revisiun parziala da la lescha introductiva tar la lescha federala davart la protecziun da l'ambient (lescha chantunala davart la protecziun da l'ambient) che la regenza grischuna ha dà en consultaziun.
La finamira principala da questa revisiun parziala da la lescha chantunala davart la protecziun da l'ambient è quella da determinar l'entir chantun sco intschess per ruments chasans combustibels che vegnan surpigliads dal stabiliment per arder ruments a Trimmis. Cun quai duai vegnir cuntanschì ch'i dettia en l'avegnir uschè paucs transports da rument sco pussaivel e che las capacitads da combustiun existentas en il stabiliment per arder ruments a Trimmis vegnian tratgas a niz en moda raschunaivla. Cun la capacitad da combustiun actuala en il stabiliment per arder ruments a Trimmis pon vegnir dismess - tenor la planisaziun chantunala dals ruments - tut ils ruments chasans combustibels che resultan en il Grischun fin l'onn 2020. La regenza po però permetter excepziuns ed admetter la dismessa en stabiliments extrachantunals. La premissa è dentant che la dismessa dals ruments daventia uschia bler pli favuraivla e ch'il transport, dentant er che la dismessa hajan avantatgs ecologics. Ultra da quai prevesa la revisiun parziala ch'i valian - sa basond sin prescripziuns adattadas - ils medems pretschs da combustiun per tut las otg corporaziuns per la gestiun da ruments dal Grischun. La finala duai vegnir introducida in'obligaziun da dumandar ina permissiun per surpigliar ruments d'ordaifer il chantun. Ils contracts existents da corporaziuns per la gestiun da ruments che concernan la dismessa en stabiliments extrachantunals e ch'èn vegnids fatgs avant il 1. da schaner 2007 restan intacts. Els na dastgan dentant betg vegnir prolungads sur la durada fixada.
Dals documents da consultaziun pon ins prender invista sin la pagina d'internet dal departament d'educaziun, cultura e protecziun da l'ambient, www.ekud.gr.ch. La consultaziun dura fin ils 28 da favrer 2008.

Las tariffas da las taxas per stimaziuns uffizialas vegnan adattadas
Las tariffas da las taxas per stimaziuns uffizialas da bains immobigliars e d'edifizis vegnan augmentadas da 1.0 sin 1.2 promils da la valur commerziala respectivamain da l'import impundì. Quai ha concludì la regenza grischuna cun approvar ina revisiun parziala correspundenta da l'ordinaziun davart las stimaziuns uffizialas. Quella entra en vigur il 1. da schaner 2008.
Il motiv da questa adattaziun è la taxa minimala per stimaziuns ch'è vegnida reducida l'onn passà da 400 a 100 francs per mintga bain immobigliar ha chaschunà entradas pli pitschnas da circa 300'000 francs. Per pudair cuntanscher in grad da la cuvrida dals custs da 100 pertschient ston las tariffas per l'emprima stimaziun da bains immobigliars, d'edifizis novs e da stimaziuns da revisiun sco er da novas stimaziuns vegnir augmentadas pervia da quai.
La regenza engrazia a tut las participantas ed a tut ils participants da la festa dal president dal cussegl dals chantuns
Ils 5 da december ha gì lieu ad Igis la festa da l'elecziun da Christoffel Brändli sco nov president dal cussegl dals chantuns per la perioda d'uffizi 2007/2008. Ord vista da la regenza grischuna è quest act festiv, ch'è vegnì frequentà bain, stà fitg legraivel. La regenza engrazia fitg a tut las persunas ch'èn sa participadas a la festa. Tranter auter han la vischnanca dad Igis, la viafier retica, ulteriuras organisaziuns ed uniuns sco er autras persunas gidà che la festa è daventada in success. La regenza sa legra dal cordial bainvegni e da la festa degna en onur dal president dal cussegl dals chantuns novelegì che deriva dal Grischun.

Da vischnancas e da regiuns
- Brusio: Il project "reparaziun dal rempar cunter crudada da crappa da la viafier retica a Brusio" vegn approvà. Als custs cun dretg da subvenziun da 420'000 francs vegn garantida ina contribuziun da maximalmain 315'000 francs.
- Rossa, Cauco, Arvigo: Il project per la dustanza da la Calancasca sin il territori da las vischnancas da Rossa, da Cauco e dad Arvigo sco er da Selma e da Buseno (project consecutiv da las auas grondas 2006) vegn approvà. Cun resalva da la garanzia da subvenziun tras la confederaziun vegn approvada ina contribuziun chantunala da totalmain 167'000 francs.
- Maladers: Il project concernent la reparaziun da la protecziun cunter la crudada da crappa "Haldenwald" da la vischnanca da Maladers vegn approvà. Als custs cun dretg da subvenziun da 155'000 francs vegn garantida ina contribuziun da maximalmain 119'350 francs.
- Trimmis, Vaz sut, Zizers: Ils contracts tranter il chantun Grischun e las vischnancas da Trimmis, da Vaz sut e da Zizers per laschar surpigliar la polizia chantunala incumbensas da la polizia communala vegn approvà, quai cun la resalva che tut las trais vischnancas approveschian il contract cun il chantun.
- Samignun: La revisiun parziala da la constituziun communala da la vischnanca da Samignun, concludida cun la votaziun a l'urna dals 23 da settember 2007, vegn approvada.

Contribuziuns chantunalas a differentas instituziuns
- Halla d'events da curling a Flem: A la "Park Hotels Waldhaus SA", Flem-Casa d'Uaul, vegn garantì - cun resalva da la finanziaziun totala - in credit d'agid d'investiziun senza tschains da la confederaziun da 2'100'000 francs per construir la halla d'events da curling a Flem. Il chantun paja ina contribuziun da maximalmain 487'562 francs.
- Indriz d'ennavar "Stretg": A la Finanz Infra SA, Laax, vegn garantì in credit d'agid d'investiziun senza tschains da la confederaziun dad 1'400'000 francs per construir l'indriz d'ennavar mecanic "Stretg". Il chantun paja ina contribuziun da maximalmain 235'675 francs.
- Institut svizzer per la climatologia alpina e per la medischina a Tavau: A l'institut svizzer per la climatologia alpina e per la medischina a Tavau vegn garantida ina contribuziun periodica da 351'559 francs per la perioda dals onns 2008 fin 2011. Resalvadas restan las garanzias da contribuziun correspundentas da la confederaziun e da la vischnanca da Tavau.
- Uniun "Adebar": L'incarica da prestaziun dal chantun Grischun a l'uniun "Adebar" per ils onns 2008 fin 2010 vegn approvada. Las contribuziuns per ils onns 2008 fin 2010 per manar il post da cussegliaziun per dumondas da lètg e da famiglia, il post da cussegliaziun per dumondas da gravidanza sco er il post da cussegliaziun per dumondas da controllas prenatalas importan 305'000 francs.
- Teater da Cuira: Per l'emprima part da la stagiun 2007/2008 (atun/enviern 2007) survegn il teater da Cuira ina contribuziun chantunala en l'autezza da 100'000 francs.
- SEXTEN CULTURA: A l'uniun SEXTEN CULTURA, Sexten (Italia), vegn concedida ina contribuziun unica da 10'000 francs per edir la publicaziun "Novas construcziuns en las Alps - premi d'architectura 2006".
- Almanacco Mesolcina-Calanca: L'ediziun dal "almanacco Mesolcina-Calanca 2008" vegn sustegnida cun ina contribuziun da 6'000 francs.

Projects da vias
La regenza ha approvà totalmain 2'029'000 francs per construir e per sanar il suandant traject da via:
- via naziunala A13: lavurs d'impressari vi dal sviament da Roveredo, tunnel San Fedele

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun