Il chantun Grischun duai sa participar a la cunvegna interchantunala
davart l'armonisaziun da la scola obligatorica (concordat da HarmoS).
Quai propona la regenza grischuna en sia missiva al cussegl grond. Quel
vegn a tractar la fatschenta en la sessiun da favrer 2008.
Chantuns che sa participeschan al concordat da "HarmoS"
s'obligheschan d'unifitgar las finamiras, ils cuntegns e las structuras
da la scola obligatorica. Cun il concordat vegnan fixads per l'emprima
giada cuntegns, finamiras e structuras sin champ naziunal. En l'avegnir
vegn prendì en mira in plan d'instrucziun unifitgà sin plaun
linguistic-regiunal. Ultra da quai duain ils uffants entrar en scola en
tut ils chantuns suenter ch'els han cumplenì quatter onns. La
differenziaziun tranter scolina e scola primara vegn abolida. La scola
primara inclusiv la scolina dura da nov otg onns ed il stgalim secundar
I dura trais onns.
Ultra da quai s'obligheschan ils chantuns che sa participeschan al
concordat d'organisar l'instrucziun sin il stgalim da la scola primara
en furma dad uras da bloc. Plinavant porschan els structuras dal di che
correspundan als basegns da las scolaras e dals scolars. L'utilisaziun
da quellas structuras è però facultativa e sto per regla vegnir pajada
dals geniturs. In ulteriur punct impurtant dal concordat HarmoS è la
coordinaziun da l'instrucziun da las linguas. L'emprima lingua estra
vegn instruida il pli tard a partir dal 3. onn da scola dal sistem
actual, ina segunda lingua estra il pli tard a partir dal 5avel onn da
scola dal sistem actual (tenor il sistem dal concordat a partir dal
5avel ed a partir dal 7avel onn da scola). Ina da las duas linguas è ina
segunda lingua naziunala, l'autra è l'englais. Per finir introducescha
il nov concordat instruments per garantir la qualitad en il rom da
standards da furmaziun impegnativs sin champ naziunal.
Per la regenza signifitgescha il concordat ina basa solida per il
svilup dal sistem da scola svizzer sin il fundament da las structuras
creschidas. Ils giavischs ils pli impurtants da la regenza èn vegnids
resguardads. En connex cun l'armonisaziun dals plans e dals meds
d'instrucziun pussibilitescha il concordat al chantun Grischun da
resguardar adequatamain las spezialitads da la trilinguitad.
La conferenza svizra da las directuras e dals directurs chantunals
da l'educaziun publica ha discutà ed ha deliberà unanimamain il
concordat ils 14 da zercladur 2007. La cunvegna entra en vigur, cur che
10 chantuns èn sa participads a quella.
Gremi: regenza
Funtauna: rg chanzlia chantunala dal Grischun