LL'instrucziun da las linguas estras en las scolas grischunas duai
vegnir reglada da nov. En las scolas primaras dal chantun Grischun duai
vegnir introducida l'instrucziun obligatorica da l'englais sco segunda
lingua estra a partir da la 5. classa. Ultra da quai duai vegnir spustà
il cumenzament da l'emprima lingua estra (rumantsch, talian u tudestg)
sin la 3. classa (fin ussa 4. classa). Quai propona la regenza grischuna
en sia missiva tar la revisiun parziala da la lescha davart las scolas
popularas (lescha da scola) e da l'ordinaziun executiva tar la lescha da
scola. Il cussegl grond vegn a tractar questa fatschenta en la sessiun
d'avrigl 2008.
Questa soluziun areguard las linguas estras resguarda d'ina vart las
recumandaziuns e las prescripziuns naziunalas. Da l'autra vart tegn ella
cunzunt quint da la trilinguitad dal Grischun. L'onn 2004 ha il cussegl
grond incumbensà la regenza da preparar las adattaziuns legalas per
introducir l'englais sco rom obligatoric sin il stgalim da la scola
primara.
La regenza è persvadida ch'i possia vegnir tschernida ina soluziun
unitara areguard las linguas estras en il chantun Grischun mo, sch'i
vegnan introducids ina lingua chantunala sco emprima lingua estra e
l'englais sco segunda lingua estra en tut las regiuns linguisticas.
Uschia s'avischinan las differentas regiuns linguisticas ina a l'autra e
promovan la chapientscha per lur identitad, quai che vegn pretendì en la
constituziun chantunala ed en la constituziun federala. Ultra da quai
vegn simplifitgada la mobilitad interchantunala e vegn garantida
l'egualitad da las schanzas . Midond al stgalim superiur han alura
numnadamain tut las scolaras e tut ils scolars il medem nivel en
englais.
L'emprima lingua estra duai vegnir spustada sin la 3. classa l'onn
da scola 2010/2011. L'onn da scola 2012/2013 vegn alura instruì
l'englais en la 5. classa. La furmaziun supplementara da las persunas
d'instrucziun da la scola primara per introducir l'englais custa ca. 12
milliuns francs. Questa contribuziun chantunala vegn repartida sin ils
onns 2008 fin 2014.
Ultra da quai prevesa la revisiun parziala da la lescha da scola
d'introducir contribuziuns chantunalas als custs per las persunas che
mainan scolas primaras, scolas realas, scolas secundaras e classas
pitschnas . Per che questas contribuziuns possian vegnir concedidas,
ston vegnir ademplidas premissas minimalas areguard l'engaschament,
areguard la scolaziun ed areguard las obligaziuns da las persunas che
mainan las scolas. Questas premissas èn fixadas en las directivas
chantunalas. Ina direcziun da la scola che funcziuna bain gida a
meglierar la qualitad da la scola. Pervia da las structuras spezialas en
il Grischun, numnadamain cun bleras instituziuns pitschnas ch'èn
responsablas per la scola, renunzia il chantun ad in'obligaziun
d'introducir dapertut ina direcziun da la scola. El preferescha plitost
in model d'impuls.
Gremi: regenza
Funtauna: rg chanzlia chantunala dal Grischun