Il Grischun è giast tar la festa dal 1. d'avust 2008 da l'ambassada svizra a Berlin  

14.12.2007
Il Grischun è il chantun ospitant da l'ambassada svizra a Berlin tar la festa dal 1. d'avust da l'onn che vegn. La regenza grischuna ha dà ina resposta positiva a la dumonda correspundenta da l'ambassada. Il Grischun vegn a sa preschentar a Berlin sco lieu da cultura e d'economia sco er sco chantun da vacanzas multifar. Sut il motto "Berlin cloma il Grischun. Heidi vegn." organisescha il chantun ospitant per la populaziun da Berlin tranter auter ina parada da chauras tras la chapitala tudestga.
Dapi l'onn 2000 celebrescha l'ambassada svizra a Berlin il di naziunal cun ina festa tut speziala. Suenter ils chantuns Tessin, Turgovia, Vallais, Basilea-Citad, Berna, Lucerna - Svizra centrala, Turitg ed Argovia ha il Grischun l'onur da gidar a concepir l'onn che vegn la festa a Berlin sco chantun ospitant. Il "di da la Svizra" duai vegnir duvrà per tgirar e per rinforzar las relaziuns cun la Germania ch'è la partenaria da commerzi la pli impurtanta da la Svizra e dal Grischun, numnadamain las relaziuns politicas, economicas e culturalas ch'èn relevantas per il Grischun. Ultra da quai survegn il Grischun la schanza da sa preschentar en in martgà turistic da basa sco la regiun da vacanzas principala da la Svizra.

Festa populara en la citad interna da Berlin
Il "di da la Svizra" è dividì en in'occurrenza dal di ed en in'occurrenza da la saira. L'occurrenza dal di sin il Dorothea-Schlegel-Platz betg lunsch davent dal Deutscher Reichstag è deditgada a la populaziun da Berlin. Qua vegn il chantun Grischun a sa preschentar a 15'000 fin 20'000 visitadras e visitaders en sia diversitad turistica, culturala ed economica. Cun ina preschentaziun interactiva dal Grischun, cun occurrenzas culturalas sco er cun spezialitads culinaricas dal chantun duai il Grischun vegnir rendì pli enconuschent sco destinaziun da viadi. Sco ambassadura serva la Grischuna la pli enconuschenta, Heidi, l'eroxa romanesca. Sut il motto "Berlin cloma il Grischun. Heidi vegn." vul il Grischun sa drizzar durant questa occurrenza dal di er ed oravant tut a famiglias. L'incumbensa da realisar quest punct central è vegnida surdada a Grischun vacanzas (GRV). Questa organisaziun da marketing per il turissem dal Grischun po sa basar en quest connex sin sias diversas experientschas cun occurrenzas sumegliantas (di chantunal a l'Expo02, Olma, Sechseläuten da Turitg, sessiun).

Parada da las chauras sco attracziun mediala
En correspundenza cun il motto vul il Grischun delectar Berlin cun in regal dal tuttafatg spezial: Heidi na vegn betg a viagiar suletta en terras estras, mabain vegn a manar var 600 chauras a Berlin. En il rom da l'occurrenza dal di vegnan quellas a far in til tras la chapitala tudestga fin a la plazza da la festa, accumpagnadas da gruppas da costums, d'umens che portan plumpas e da furmaziuns da musica. Cun questa acziun spera il chantun ospitant da survegnir ina gronda attenziun da las medias sur ils cunfins da la citad ora.

Occurrenza da la saira per giasts envidads en l'ambassada
Per il bainvegni uffizial da la saira dal 1. d'avust envida l'ambassada svizra circa 1'000 fin 1'200 giasts da la politica, da l'economia, da la scienza e da la cultura. Questa occurrenza ha lieu en las localitads ed en ils stabiliments al liber da l'ambassada en in rom galant. Il chantun ospitant ha qua la pussaivladad da dar ina nota speziala e questa occurrenza. Il Grischun vegn a trair a niz questa schanza en spezial cun producziuns culturalas, cun porscher spezialitads grischunas e svizras als giasts envidads, cun preschentar il Grischun integrond en moda activa ils giasts envidads e cun manar ina "lounge" grischuna exclusiva. Pleds da l'ambassadur svizzer, dal president da la regenza grischuna sco er d'ina cussegliera federala u d'in cusseglier federal ed in grond fieu artifizial cumpletteschan questa occurrenza da la saira.

L'organisaziun dal project è pronta
La direcziun dal project dal Grischun sut il cusseglier guvernativ Hansjörg Trachsel è en mauns dal secretari dal departament d'economia publica e fatgs socials. Dal team da basa fan part ultra da quai represchentantas e represchentants dal departament d'economia publica e fatgs socials, da l'uffizi da cultura, dal center da furmaziun e cussegliaziun agricula Plantahof, da la swiss school of tourism & hospitality Passugg sco er da Grischun vacanzas.

Communicaziun sut l'ensaina da la marca "graubünden"
La preschentaziun dal Grischun sco er las activitads communicativas da l'ambassada svizra tar il "di da la Svizra" vegnan realisadas tuttas sut il logo da la marca "graubünden". Uschia poi vegnir tegnì quint da la finamira d'augmentar vinavant e da consolidar il renum da questa marca er en ils pajais vischins da l'exteriur. Per las occurrenzas dal 1. d'avust 2008 a Berlin fa d'ina vart ina cooperaziun da medias da l'ambassada svizra reclama e las renda enconuschentas, da l'autra vart fa quai er Grischun vacanzas cun mesiras accumpagnantas. En spezial per il "di da la Svizra" vegn er messa en funcziun ina pagina d'internet (www.schweiztag.de). Avant questas occurrenzas vegnan ultra da quai envidads schurnalistas e schurnalists d'economia e da turissem da Berlin e conturns ad in viadi da medias tras il Grischun.

Gremi: departament d'economia publica e fatgs socials
Funtauna: rg departament d'economia publica e fatgs socials