Navigation

Inhaltsbereich

  • Erste Mitteilung
  • Neuen Beitrag einfügen
Il chantun Grischun fa gievgia, ils 20 da december 2007, in bainvegni uffizial a la cussegliera federala nov elegida Eveline Widmer-Schlumpf. Ultra da las occurrenzas per ils giasts envidads datti a Favugn in apero per la populaziun.
Mesemna, ils 12 da december 2007, è cussegliera guvernativa Eveline Widmer-Schlumpf vegnida elegida da l'assamblea federala plenara sco cussegliera federala. In di pli tard ha ella declerà ch'ella acceptia questa elecziun. Per appreziar ed undrar questa elecziun fa la regenza in bainvegni a la nova cussegliera federala en il Grischun. Las festivitads uffizialas han lieu gievgia, ils 20 da december 2007 a Maiavilla, a Cuira ed a Favugn. Il tren spezial da Berna arriva a las 13.40 a Maiavilla, nua ch'èn planisads ina emprima pitschna fermada ed in bainvegni tras il president da la citad Christian Möhr. Alura cuntinuescha il tren per arrivar a las 14.20 a la staziun da Cuira. En la chasa dal cumin-baselgia Titthof cumenza alura l'act festiv uffizial per ils var 500 fin 600 giasts envidads da Berna e dal Grischun. Suenter il bainvegni tras il president da la citad Christian Boner pledan il president da la regenza Martin Schmid sco er la nova cussegliera federala. Per l'accumpagnament musical da l'act festiv procura la filarmonia da chombra dal Grischun.
Suenter l'act festiv uffizial en il Titthof sa renda la delegaziun a Favugn, nua ch'i dat - a partir da las 16.45 - in apero sin la plazza avant la sala da gimnastica. A quest apero è la populaziun envidada cordialmain. Ils giasts envidads vegnan a sa render a las 17.30 en la sala da gimnastica per l'occurrenza uffiziala da la saira. La saira èn previs pleds dal president communal Markus Feltscher, da la presidenta da la confederaziun Micheline Calmy-Rey sco er da Barbara Janom Steiner, presidenta da la PPS dal Grischun. Per il rom musical da l'occurrenza da la sairada procuran differentas furmaziuns da Favugn. Questas festivitads vegnan projectadas sin ina taila gronda che sa chatta en l'aula vischina e pon uschia vegnir persequitadas da la populaziun che giauda là l'ustaria da festa. La saira returna il tren spezial a Berna.

Gremi: chanzlia chantunala dal Grischun
Funtauna: rg chanzlia chantunala dal Grischun
Neuer Artikel