L'elecziun cumplementara d'ina commembra u d'in commember da la regenza grischuna per il rest da la perioda d'uffizi dal 1. da schaner 2007 fin ils 31 da december 2010 ha lieu dumengia, ils 30 da mars 2008. Quai ha concludì la regenza.
Ils 12 da december 2007 ha l'assamblea federala plenara elegì la cussegliera guvernativa Eveline Widmer-Schlumpf en il cussegl federal. In di pli tard ha ella declerà ch'ella acceptia questa elecziun. Cun quai datti ina vacanza en la regenza dal chantun Grischun. La perioda d'uffizi ordinaria da las commembras e dals commembers da la regenza dura anc fin ils 31 da december 2010. Tenor la lescha davart il diever dals dretgs politics en il chantun Grischun sto la regenza disponer en in tal cas in'elecziun cumplementara per il rest da la perioda d'uffizi. Cun fixar il termin per l'elecziun cumplementara ha la regenza resguardà che las partidas politicas hajan suffizientamain temp per sa preparar.

La revisiun parziala da la lescha d'ustaria entra en vigur il 1. da schaner 2008
La regenza grischuna ha concludì da metter en vigur la revisiun parziala da la lescha d'ustaria per il chantun Grischun per il 1. da schaner 2008. Il medem mument ha ella adattà las disposiziuns executivas tar la lescha d'ustaria. Quellas entran medemamain en vigur per il cumenzament da l'onn.
La revisiun parziala da la lescha d'ustaria ha l'intenziun da simplifitgar la procedura da taxaziun da las bavrondas destilladas e da distgargiar administrativamain ils manaschis. Ultra da quai vegnan formuladas da nov las premissas per la permissiun per ustieras e per ustiers. Il cussegl grond aveva approvà la revisiun parziala ils 31 d'avust 2007. Il termin da referendum è scadì ils 12 da december 2007 senza ch'i saja vegnì fatg in tal.

Ils projects da votaziun dals 24 da favrer 2008 èn fixads
Dumengia, ils 24 da favrer 2008 vegni votà en il Grischun davart l'iniziativa chantunala dal pievel "Cussegl grond: 80 bastan". Quai ha concludì la regenza grischuna.
Sin plaun federal vegnan suttamessas a la votaziun dal pievel l'iniziativa dal pievel dals 3 da november 2005 "Cunter la canera d'aviuns da cumbat en territoris turistics" sco er la lescha federala dals 23 da mars 2007 davart la meglieraziun da las cundiziuns generalas fiscalas per activitads e per investiziuns d'interpresas (lescha davart la refurma da l'imposiziun da taglia sin interpresas II).

Per "planisar novas colliaziuns da traffic" duai vegnir nominada ina organisaziun dal project
La regenza grischuna ha fixà la procedura per "planisar novas colliaziuns da traffic". Il cussegl grond aveva reservà il zercladur 2006 tranter auter 10 milliuns francs or dals meds finanzials d'agio da la banca chantunala grischuna per planisar novas colliaziuns da traffic innovativas en il Grischun ed en il territori alpin che cunfinescha cun il Grischun.
En in'emprima fasa duain vegnir tschernids quels projects che paran adattads per vegnir elavurads ulteriuramain. Tenor l'avis da la regenza e dal cussegl grond pon projects innovativs vegnir sustegnids, sch'els adempleschan almain la funcziun d'ina avertura regiunala e sch'els empermettan in niz supplementar per l'economia publica.
La cunvegna da prestaziun cun la confederaziun davart il mantegniment da las vias naziunalas po vegnir sutsegnada
La regenza grischuna ha approvà la cunvegna da prestaziun davart il mantegniment da las vias naziunalas sin il territori dal chantun Grischun. La cunvegna da prestaziun cun l'uffizi federal da vias po vegnir sutsegnada. Per questas prestaziuns vegn il chantun indemnisà da la confederaziun cun ina contribuziun globala da circa 18 milliuns francs per onn.
Cun l'introducziun da la nova concepziun da la gulivaziun da finanzas e da la repartiziun da las incumbensas tranter la confederaziun ed ils chantuns (NGF) vegn surdada la responsabladad e la proprietad da las vias naziunalas a partir dal 1. da schaner 2008 a la confederaziun. Il mantegniment dal manaschi da las vias naziunalas ed il mantegniment architectonic da las vias naziunalas che na fa betg part d'in project pon ils chantuns dentant ademplir vinavant independentamain sin basa d'ina cunvegna da prestaziun cun la confederaziun.

Da vischnancas e da regiuns
- Favugn: Il project supplementar tar il project "Ovras da protecziun a Favugn" da la vischnanca da Favugn vegn approvà. Als custs vegn garantida ina contribuziun da maximalmain 12'920 francs.
- Tartar: La revisiun parziala da la constituziun communala da la vischnanca da Tartar, concludida da la radunanza communala dals 20 da november 2007, vegn approvada.
- Madulain: La lescha davart las taxas da giasts e da turissem da la vischnanca da Madulain dal 1. d'october 2007 vegn approvada.
- Maladers: La planisaziun d'utilisaziun ch'è vegnida relaschada da la vischnanca da Maladers per engrondir la chava da gera "Tummi-Hügel" vegn approvada cun resalvas.
- Vella e Degen: La planisaziun d'utilisaziun ch'è vegnida relaschada da las vischnancas da Vella e da Degen ils 31 da matg respectivamain ils 13 da fanadur 2007 en vista a l'engrondiment da l'indriz d'ennavar en il territori da skis da Vella vegn approvada cun in pèr resalvas.
- Zernez: La revisiun parziala da la planisaziun locala da la vischnanca da Zernez dals 25 da zercladur 2007 vegn approvada.
- Cursa internaziunala da muntogna "Arosa Classic Car": A l'organisaziun da la "4. cursa internaziunala da muntogna Arosa Classic Car" vegn concedida la permissiun da duvrar venderdi, ils 12 da settember 2008, sco er sonda, ils 13, e dumengia, ils 14 da settember 2008 la ruta previsa sin la via chantunala tranter Langwies ed Arosa.
- Telefericas "Engiadina San Murezzan SA": En sia consultaziun a l'uffizi federal da traffic davart la dumonda da concessiun e d'approvaziun dal plan da las telefericas "Engiadina San Murezzan SA (BEST)" dals 3 da fanadur respectivamain dals 30 da fanadur 2007 per construir duas sutgeras accuplablas "Bernina Diavolezza - Collinas" ed "Alp da Buond Suot - Muots Ravulaunas" propona la regenza da dar la concessiun.

Contribuziuns chantunalas a differentas instituziuns
- Fond da sport: La regenza ha approvà contribuziuns pauschalas da circa 800'000 francs or dal fond da sport per las circa 45 organisaziuns e federaziuns da sport da l'associaziun grischuna da sport (AGS).
- Promoziun da la cultura: La regenza ha concedì contribuziuns da totalmain 363'500 francs per promover 21 occurrenzas ed ovras culturalas.
- Login da la furmaziun professiunala: Al login "furmaziun professiunala" (login) vegn garantida ina contribuziun chantunala unica da maximalmain 150'000 francs per avair acquirì ulteriuras partenarias ed ulteriurs partenaris da cooperaziun per realisar il lieu da furmaziun da la Svizra sidorientala a Landquart.
- Cuminanza grischuna per sendas CGS: La cunvegna da prestaziun 2008 tranter il chantun Grischun e la cuminanza grischuna per sendas (CGS) vegn approvada. La contribuziun pauschala annuala dal chantun importa 125'000 francs.
- Institut per turissem e temp liber (ITT): A l'institut per turissem e temp liber (ITT) da la scola auta da tecnica ed economia a Cuira vegn garantida ina contribuziun dad annualmain 100'000 francs per ils onns 2008 fin 2010.
- Uniun da gimnastas e da gimnasts da Cuira, atletica leva: L'uniun da gimnastas e da gimnasts da Cuira, atletica leva, survegn ina contribuziun dad 11'400 francs or dal fond da sport per realisar l'exposiziun speziala "atletica leva" a chaschun da l'exposiziun da commerzi e da mastergn Higa 2008 a Cuira.
- Fonoteca naziunala svizra: A la fonoteca naziunala svizra vegn garantida ina contribuziun da 5'263 francs.

Projects da vias
La regenza ha approvà totalmain 4'620'000 francs per construir e per sanar ils suandants trajects da vias:
- via naziunala A13: lavurs d'inschigneria d'electromecanica vi dal sviament da Roveredo, tunnel San Fedele
- via dal Partenz: lavurs d'impressari sin la punt da la Landquart a Claustra
- via naziunala A13: lavurs sanitaras Pian San Giacomo - Malabarba

Per la fin da l'onn
La regenza grischuna ha gì 43 sesidas durant l'onn 2007. A chaschun da quellas ha ella prendì 1521 conclus (l'onn precedent: 1459). President da la regenza daventa il 1. da schaner 2008 Stefan Engler, schef dal departament da construcziun, traffic e selvicultura. Vicepresident daventa Hansjörg Trachsel, schef dal departament d'economia publica e fatgs socials. La regenza giavischa a tut las conburgaisas ed a tut ils conburgais tut il bun per la fin da l'onn, fidanza e bainstar.

Gremi: regenza
Funtauna: rg chanzlia chantunala dal Grischun