La regenza grischuna beneventa da princip il plan d'acziun che vegn
proponì da la confederaziun cunter la pulvra fina sco er las midadas da
l'ordinaziun per mantegnair l'aria pura ch'èn colliadas cun quai. Il
plan d'acziun mussa ch'i basegna ulteriurs sforzs per reducir
l'impestaziun da l'aria che vegn chaschunada tras la pulvra fina
privlusa.
Il plan d'acziun ha la finamira da sminuir gia a la funntauna
emissiuns da pulvra fina, da fulin da diesel e da fulin da stgaudaments
da laina. Tras las midadas da l'ordinaziun per mantegnair l'aria pura
ch'èn vegnidas tramessas en consultaziun duain vegnir realisadas trais
da las totalmain 14 mesiras dal plan d'acziun. Per stgaudaments da laina
pli pitschens vegn introducida ina decleraziun da confurmitad areguard
las normas da l'uniun europeica. Stgaudaments da laina pli gronds ston
plinavant vegnir provedids pass per pass cun filters. La finala vegn
sbassada la limita generala da pulvra. La limita per emissiuns totalas
da pulvra or da stabiliments industrials e commerzials duai vegnir
reducida en quest connex per passa la mesadad.
La regenza beneventa da princip ch'igl è vegnì prendì en mira da
reducir l'emissiun da pulvra da stabiliments staziunars. Cun sbassar las
limitas da pulvra tar gronds stgaudaments da laina e cun introducir ina
decleraziun da confurmitad per stabiliments pitschens vegnan prestadas
contribuziuns impurtantas per distgargiar l'ambient. La regulaziun che
vegn proponida per stabiliments pitschens na cuntenta percunter betg
anc, menziunescha la regenza en sia consultaziun. Tenor las retschertgas
las pli novas po l'emissiun esser fitg gronda gist tar quests
stabiliments. Segund la regenza basegni en quest sectur - ultra da la
revisiun qua avant maun - sforzs supplementars ed innovaziuns tecnicas.
La concessiun da l'aual da Taschinas vegn transferida sin la Rezia
energia SA
La regenza grischuna ha approvà il transferiment da la concessiun
dal dretg da las auas da las vischnancas da Seewis, da Fanas e da
Grüsch, e quai da l'ovra electrica Taschinas SA sin la Rezia energia SA.
Tras il transferiment da la concessiun - che las vischnancas avevan dà
ils 24 da zercladur respectivamain ils 7 da fanadur 1997 per utilisar
l'aual da Taschinas - sto vegnir adattà il contract da concessiun. La
midada la pli impurtanta è quella che las vischnancas concessiunaras
survegnan - empè da la participaziun a la societad sco fin ussa - in
dretg da retrair energia per custs annuals. Uschia han las vischnancas
il dretg sin 2,5 pertschient energia gratuita, quai che correspunda ad
ina prestaziun media da var 975'000 uras kilowat per onn.
Il project oriund preveseva da constituir l'ovra electrica Taschinas
SA tranter las vischnancas da Seewis, da Fanas e da Grüsch d'ina vart e
las ovras electricas grischunas SA (oz: Rezia energia SA) da l'autra
vart. Igl era previs che las vischnancas sa participeschian a l'ovra
electrica Taschinas SA cun ina participaziun da chapital e da vuschs da
totalmain 60 pertschient. A chaschun da las radunanzas communalas da
l'october 2006 han las trais vischnancas concludì che l'ovra electrica
Taschinas SA na duaja betg vegnir realisada tras ina societad che
stoppia vegnir fundada aposta per quest intent, mabain tras la Rezia
energia SA.
Da vischnancas e da regiuns
- Favugn: La revisiun parziala da la constituziun communala da la
vischnanca da Favugn, ch'è vegnida concludida a la votaziun a l'urna
dals 26 da november 2006, vegn approvada.
- Donat: La revisiun parziala da la constituziun communala da la
vischnanca da Donat, ch'è vegnida concludida da la radunanza communala
ils 25 d'avust 2006, vegn approvada.
- Organisaziun regiunala da la Calanca: La regenza ha approvà ils
statuts da l'organisaziun regiunala da la Calanca (ORC). Uschia survegn
la corporaziun regiunala ORC la persunalitad giuridica.
- Ardez, Guarda, Lavin, Susch, Zernez: Il statut d'organisaziun dal
consorzi da scola da las vischnancas d'Ardez, da Guarda, da Lavin, da
Susch e da Zernez vegn approvà.
- Plan directiv regiunal per la via da velos dal Partenz: Il plan
directiv regiunal per la via da velos dal Partenz, ch'era vegnì concludì
da la corporaziun regiunala pro Partenz ils 18 da matg 2006, vegn
approvà e vegn declerà sco liant per las autoritads dal chantun
Grischun.
Contribuziuns chantunalas a differentas instituziuns
- Exposiziun "Expressiunissem da las muntognas": L'exposiziun
"Expressiunissem da las muntognas" vegn sustegnida cun ina contribuziun
da 50'000 francs. Questa exposiziun ha lieu dals 15 da favrer fin ils 25
da matg 2008 en il museum d'art dal Grischun ed avant en il museum d'art
a Berna sco er en il museum da Groningen (NL).
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun