Navigation

Inhaltsbereich

  • Erste Mitteilung
  • Neuen Beitrag einfügen
Durant la sessiun da favrer 2007 vegn il cussegl grond a sa fatschentar cun il rapport grischun da famiglia. La cumissiun predeliberanta ch'era vegnida nominada per quest intent ha predeliberà il rapport per mauns dal cussegl grond, e quai a chaschun da pliras sesidas sut il presidi da Barla Cahannes Renggli. A las sesidas èn stads preschents er il president da la regenza Martin Schmid sco er represchentantas e represchentants da l'administraziun. A hearings èn plinavant vegnids envidads represchentantas e represchentants da differentas gruppas d'interess, uschia da la federaziun spezialisada per la tgira d'uffants, da la federaziun da las persunas d'instrucziun dal Grischun, da l'uniun grischuna d'artisanadi e da mastergn, da la chombra da commerzi dal Grischun e dal post da cussegliaziun per la planisaziun da famiglia "adebar".
Il postulat da l'onn 2002, ch'era stà il punct da partenza per il rapport da famiglia, aveva incumbensà la regenza d'elavurar in rapport che dueva d'ina vart sclerir la basa statistica davart la situaziun da las famiglias en il Grischun e da l'autra vart furnir in catalog da mesiras cun ina glista da prioritads per rinforzar e per promover las famiglias.
Sco quai che la regenza menziunescha en il rapport grischun da famiglia ch'è ussa avant maun, sa fatschenta il rapport cun quels secturs ch'èn - tenor l'avis da la regenza - centrals per l'agir politic che duai meglierar la situaziun da las famiglias en il chantun Grischun. Latiers tutgan ils suandants secturs centrals: tgira d'uffants cumplementara a la famiglia, scola, activitad da gudogn, finanzas e cussegliaziun.
La cumissiun è sa fatschentada detagliadamain cun il project. Ella sustegna da princip las finamiras, las maximas e las mesiras che la regenza propona en ses rapport. Tar singulas mesiras propona ella dentant al cussegl grond da procurar per ulteriuras explicaziuns.

Gremi: cumissiun predeliberanta dal rapport grischun da famiglia
Funtauna: rg cumissiun predeliberanta dal rapport grischun da famiglia
Neuer Artikel