Cunquai che extraordinariamain pauca aua è currida en ils lais da fermada l'onn 2006, ha quai chaschunà che las ovras electricas dal Grischun han producì lunsch sut la media electricitad. Perencunter è s'augmentà vinavant il consum d'electricitad en il chantun.

Record negativ tar la producziun d'electricitad
La producziun d'electricitad da tut las ovras electricas en il Grischun ha importà l'onn chalendar 2006 5'682 milliuns uras kilowatt. Quai èn 27 pertschient damain che l'aspectativa da producziun media da 7'786 milliuns uras kilowatt. La raschun principala per questa producziun extremamain pitschna: las precipitaziuns èn stadas lunsch sut la media l'onn 2006 e consequentamain è currida pauca aua en ils lais da fermada.

Record negativ tar ils tschains d'aua
Las entradas dals tschains d'aua dal chantun (er numnada taglia sin implants idraulics) stattan circa en proporziun cun la producziun d'electricitad. Perquai èn resultadas l'onn 2006 entradas correspundentamain pitschnas da 32.9 milliuns francs. Quai èn 28 pertschient damain che las entradas da 45.4 milliuns francs en in onn normal.
Las vischnancas concessiunaras survegnan en total entradas ord tschains d'aua da circa la medema dimensiun sco il chantun. Cunquai che la producziun d'electricitad è sut la media, vegnan ad obtegnair er las vischnancas concessiunaras entradas correspundentamain bassas l'onn 2006.

Record tar il consum d'electricitad
En la perioda 2005/2006 (october 2005 fin settember 2006) è resultà in consum total da 1'932 milliuns uras kilowatt (perioda anteriura 1'879 milliuns uras kilowatt). Uschia è vegnida cuntanschida ina nova valur maximala. Il consum correspunda - cumpareglià cun l'onn precedent - ad in augment da 2.8 pertschient.
En la perioda 2005/2006 hai dà las suandantas midadas tar las singulas gruppas da consumentas e da consuments: tar la gruppa economia da chasa, mastergn, agricultura, prestaziuns da servetsch po vegnir registrà in augment visavi l'onn precedent da 2.6 pertschient (da 1'561 milliuns uras kilowatt a 1'601 milliuns uras kilowatt), tar las viasfier in augment da var 5.2 pertschient (da 91 milliuns uras kilowatt a 96 milliuns uras kilowatt) e tar l'industria in augment da var 3.4 pertschient (da 227 milliuns uras kilowatt a 235 milliuns uras kilowatt). Var 65 pertschient dal consum d'electricitad è vegnì duvrà durant il semester d'enviern. En tut la Svizra è s'augmentà il consum d'electricitad durant la medema perioda per 1.9 pertschient.

Gremi: uffizi d'energia
Funtauna: rg uffizi d'energia